सर्वोच्चको आदेश : विदेश भएका नेपाली सम्भव हुन्छ ल्याऊ, नत्र खाने-बस्ने व्यवस्था मिलाइदेऊ

सर्वोच्चको आदेश : विदेश भएका नेपाली सम्भव हुन्छ ल्याऊ, नत्र खाने-बस्ने व्यवस्था मिलाइदेऊ

A+ A A-

सर्वोच्च अदाललतले विदेश तथा सिमानामा रहेका नेपालीहरूलाई सम्भव भएसम्म नेपाल ल्याउनका लागि सरकारको नाममा आदेश जारी गरेको छ । मंगलबार न्यायाधीश दीपककुमार कार्की र मनोज शर्माको इजलासले यस्तो आदेश जारी गरेको हो ।

सरकारको नाममा ५ बुँदे आदेशमा सम्भव भए नेपाल ल्याउने, नसके कूटनीतिक पहलमार्फत् उपचारसहितको सबै व्यवस्था मिलाउन भनिएको छ ।

विदेशमा खान-बस्न र स्वास्थ्य उपचारको अभाव झेलिहेका वा विपदमा परेका नेपाली नागरिकलाई पहिचान गरी नेपाल फर्कन चाहने नागरिकलाई सम्बन्धित मुलुकसँग कूटनीतिक माध्यमबाट समन्वय गरी नेपाली नागरिक ल्याउन आवश्‍यक व्यवस्था गर्न/गराउन आदेशमा भनिएको छ । उक्त कार्य तत्काल सम्भव नभएको अवस्थामा खान- बस्न र स्वास्थ्य उपचारमा यथोचित प्रबन्ध मिलाउन भनिएको छ ।

विदेशबाट आएका नेपालीको अभिलेख अद्यावधिक राखेर प्रवेश गराउने र क्वारेन्टाइनमा राख्ने व्यवस्था मिलाउन सर्वोच्चले भनेको छ ।

नेपाल-भारतको सीमामा रहेका नेपाल आउन इच्छुक नागरिकलाई नेपाल ल्याई निश्‍चित समय क्वारेन्टाइनमा राख्ने व्यवस्था मिलाउन पनि भनिएको छ । तर, तत्काल सम्भव नभए लकडाउन अवधिसम्मका लागि खाने, बस्ने र उपचारको यथोचित व्यवस्था मिलाउन सरकारलाई आदेश दिइएको छ ।

विश्‍व स्वास्थ्य सङ्गठनको मापदण्डअनुसार क्वारेन्टाइनमा सेवा दिन र व्यवस्थित क्वारेन्टाइन सञ्चालन गर्न पनि सर्वोच्चले आदेश दिएको छ ।

विदेशमा रहेका नेपालीको भिसा र राहदानीको म्याद समाप्‍त भएका कारण कुनै समस्या पर्ने अवस्था भएका त्यस्ता नागरिक रहेको मुलुकसँग समन्वय गरी नेपाली नागरिकको विदेश बसाइ नियमित गर्ने व्यवस्था मिलाउन पनि सर्वोच्चले आदेश दिएको छ ।

प्रकाशित मिति: मंगलबार, चैत २५, २०७६ १८:५८