डडेल्धुरामा उच्च सतर्कताः सीमामा सशस्त्रदेखि एकअर्काको घर जानसमेत रोक

A+ A A-

सुदूरपश्चिमका ४ जनामा कोरोना भाइरस (कोभिड–१९) को संक्रमण देखिएपछि डडेल्धुरामा उच्च सतर्कता अपनाइएको छ । कोरोनाको सम्भावित संक्रमण रोक्न जिल्लामा विभिन्न योजनाका साथ सतर्कता अपनाइएको हो ।

अहिले जिल्ला सदरमुकाममा कीटनाशक औषधि छर्किनेदेखि सबै पालिकामा ‘लकडाउन’लाई पूर्णरुपमा कार्यान्वयन गराउन स्थानीय, प्रहरी प्रशासन, जनप्रतिनिधि सक्रियताका साथ काम गरिरहेका छन्।

कारोना नियन्त्रण गर्न अमरगढी नगरपालिकाले सार्वजनिक क्षेत्रमा कीटनाशक औषधि छर्कन सुरु गरेको छ । दमकल प्रयोग गरेर नगरमा कीटनाशक औषधि छर्कन थालिएको नगरपालिकाका प्रमुख प्रशासकीय अधिकृत लक्ष्मीप्रसाद उपाध्यायले बताए ।

नगरपालिकाले सम्भावित जोखिमलाई मध्य नजर गर्दै दुई वडा सील गरिसकेको छ । भारतबाट आएका नेपाली धेरै भएकाले नगरपलिकाले वडा नम्बर १० र ११ लाई सील गरेको हो ।

सीलसँगै यी २ वडा भित्रका नागरिकले एउटा घरबाट अर्को घर जानसमेत नपाउने अमरगढी नगरपालिकाका नगरप्रमुख विशेश्वरप्रसाद ओझाले बताए । वडा सील गरुन्जेलसम्म टोलटोलमा प्रहरीसमेत खटाइने उनले बताए ।

‘टोकन प्रणाली’मार्फत राहत वितरण

अमरगढी नगरपालिकाले ‘टोकन प्रणाली’मार्फत् राहत वितरण सुरु गरेको छ । नगरपालिमा रहेका म्निवर्गका व्यक्तिको तथ्यांक संकलन पछि वडा नं. ५ मा सोमबारदेखि राहत वितरण सुरु गरिएको हो ।

वडा अध्यक्षको हस्ताक्षर गरिएको टोकनमा राहत पाउने व्यक्तिले पाउने सामग्री चामल १५ केजी, दाल २ केजी, तेल, नुन १–१ पोका र साबुन २ पिस उल्लेख गरी पसलमा पठाइने व्यवस्था गरिएको छ ।

खाद्यान्न सामग्री बिक्री गर्ने पसलहरूसँग सम्झौता गरी वडा कार्यालयले सबैको पायक पर्ने पसलका नाममा टोकन उपलब्ध गराएर राहत वितरणको अभ्यास सुरु गरेको हो । वडामा हरेक स्थानमा पसल रहेकाले कसैलाई पनि असहज नहुने वडा अध्यक्ष खेमराज पाठकले बताए । वडामा रहेका करिव १५० जना दैनिक ज्याला मजदुरी गर्ने परिवारलाई राहत वितरण गरिएको उनले बताए ।

डडेल्धुरामा १०४ जना ‘क्वारेन्टाइन’मा

भारतका विभिन्न स्थानबाट आएका डडेल्धुराका १०४ जनालाई ‘क्वारेन्टाइन’मा राखिएको छ ।

कोरोनाको जोखिम नियन्त्रणका लागि बाहिरबाट आएका नागरिकलाई कम्तीमा २ हप्तासम्म ‘क्वारेन्टाइन’मा राख्नुपर्ने हुँदा उनीहरुलाई स्थानीय तहले बनाएका ‘क्वारेन्टाइन’मा राखिएको स्वास्थ्य कार्यालय डडेल्धुराका प्रमुख आशुतोष श्रेष्ठले जानकारी दिए ।

कुन स्थानीय तहमा कति जना ‘क्वारेन्टाइन’मा छन् भन्ने एकिन जानकारी नभए पनि तथ्यांक संकलन जारी रहेकाले साँझसम्ममा विस्तृत विवरण आउने उनले बताए ।

गन्यापधुरामा र आलितालमा एक गाउँबाट अर्कोमा जान रोक

जिल्लाको गन्यापधुरा र आलिताल गाउँपालिकाले एक गाउँबाट अर्को गाउँमा जान पूर्णरूपमा रोक लगाउने निर्णय गरेका छन् । कोरोनाको जोखिमलाई मध्यनजर गर्दै गाउँपालिकाले यस्तो निर्णय गरेका हुन् ।

गन्यापधुरा गाउँपालिकाको गाउँपालिकाका हरेक गाउँ सील गर्नुका साथै भारतबाट घर फर्किएकाको उच्च निगरानी गर्ने निर्णय गरेको गाँउपालिका अध्यक्ष नवलबहादुर मल्लले जानकारी दिए ।

यस्तै, आलिताल गाउँपालिकाका हरेक गाउँ सी गर्नुका साथै भारतबाट घर फर्किएकाको उच्च निगरानी गरिने गाउँपालिकाका उपाध्यक्ष जलाकुमारी विष्ट बोगटीले जानकारी दिइन् । गाउँपालिकाले कोरोनाको संक्रमणबाट बच्न र बचाउन गाँउपालिका भित्रका एक गाँउबाट अर्को गाउँमा जान रोक लगाएको उनले बताइन् ।

‘लकडाउन’को अवधिमा एक वडाबाट अर्को वडा, एक वस्तीबाट अर्को वस्तीमा समेत आवतजावत गर्न पूर्ण निषेध गरेका छौं,’ उपाध्यक्ष बोगटीले भनिन्, ‘कहीँ कतै नियमको उल्लंघन गरेको पाइएको कडाभन्दा कडा कारबाही गरिने छ ।’

परशुराममा एक घरबाट अर्कोमा जानसमेत रोक

डडेल्धुराको भित्री मधेशमा पर्ने परशुराम नगरपालिकाले एक गाउँबाट अर्को गाउँमा जानसमेत रोक लगाएको छ । एक अपील जारी गर्दै नगरप्रमुख भीमबहादुर साउँदले एक गाउँबाट अर्को गाउँमा जान रोक लगाएको जानकारी गराएका हुन् ।

नगरपालिकाका हरेक गाउँ सी गर्नुका साथै भारतबाट घर फर्किएकाको उच्च निगरानी गरिने नगरप्रमुख साउँदले बताए । नगरपालिकाले कोरोना भाइरसको संक्रमणबाट बच्न र बचाउनका लागि नगरपालिका भित्रका एक वडाबाट अर्को वडा तथा एक गाँउबाट अर्को गाउँमा जान रोक लगाएको हो ।

तीन नाकामा सशस्त्र प्रहरी

भारतसँग सीमा जोडिएका सुदूरपश्चिमका विभिन्न नाकामा थप सुरक्षाकर्मी परिचालन गरिएको छ । कोरोनाका बिरामी बढेसँगै डडेल्धुराका सीमावर्ती क्षेत्रका थप ३ वटा नाकामा आइतबारदेखि सशस्त्र प्रहरी बल खटिएका छन् ।

परशुराम नगरपालिकाको तातापानी, शीर्ष र असुरानी क्षेत्रमा सशस्त्र प्रहरी बल खटिएको हो । सशस्त्र प्रहरी नायब निरीक्षक दलबहादुर कुँवरको नेतृत्वमा ३० जनाको टोली खटाइएको डडेल्धुराका सशस्त्र प्रहरी नायब उपरीक्षक भुवनराज पन्तले जानकारी दिए ।

उनका अनुसार ससाना नाका र चोरबाटो हुँदै भारतमा रहेका नेपाली नेपाल प्रवेश गर्नसक्ने भन्दै तीन वटा साना नाकामा सशस्त्र प्रहरी खटाइएको हो ।

प्रकाशित मिति: मंगलबार, चैत २५, २०७६ १३:२२