सीमामा सशस्त्र प्रहरी : लुकीछिपी घर फर्किने क्रम जारी

A+ A A-

कोरोना भाइरस (कोभिड १९) को सुदूरपश्चिम उच्च जोखिममा रहेको छ । भारतसँग सिमाना जोडिएका विभिन्न गैरनाकाहरूबाट नेपाल भित्रिनेका कारण सुदूरपश्चिम उच्च जोखिममा परेको हो ।

सुदूरपश्चिममा अहिलेसम्म ४ जनामा कोरोना संक्रमणको पुष्टि भएको छ । दार्चुलादेखि कञ्चनपुरसम्मका विभिन्न नाका बन्द रहेको समयमा गैरनाकाहरूबाट दैनिक रूपमा नेपाल भित्रिनेहरूको संख्या बढ्दै गइरहेका कारण सुदूरपश्चिममा अझै संक्रमण फैलिन सक्ने चिन्ता बढ्न थालेको हो ।

तारउतार घाट बन्द रहे पनि नेपाल तथा भारततर्फका विभिन्न स्थानमा ट्युब सञ्चालन गरी रातिको समयमा ओहोर–दोहोर गर्ने गरिएको स्थानीय बासिन्दा बताउँछन् ।

नेपाल प्रवेश गर्ने क्रम रोकिएन

सुदूरपश्चिममा नेपालकै सबैभन्दा बढी कोरोना भाइरस (कोभिड–१९) पोजेटिभ देखिएको पुष्टि भएपछि यस क्षेत्रमा उच्च सतर्कता अपनाउन थालिएको छ ।

सीमानाका बन्द भएको अवस्थामा पनि ट्युबमार्फत नेपालीहरू स्वदेश फर्किन थालेपछि भारतसँग सीमा जोडिएका सुदूरपश्चिमका विभिन्न नाकाहरूबाट अवैध रूपमा नेपाल प्रवेश गर्नेहरूको संख्या नरोकिएपछि थप सुरक्षाकर्मीहरू परिचालन गरिएको छ ।

कोरोना भाइरसका बिरामी बढेसँगै डडेल्धुराका सीमावर्ती क्षेत्रका थप ३ वटा नाकामा परशुराम नगरपालिकाको तातोपानी, शीर्ष र असुरानी क्षेत्रमा सशस्त्र प्रहरी बल खटिएको छ ।

बैतडीको दशरथचन्द नगरपालिकाको बाराकोट र सेरा, शिवनाथ गाउँपालिकाको कुस्मौद घाट, पञ्चेश्वर गाउँपालिकाको रोलघाट र हल्दुविनायक घाटमा सशस्त्र प्रहरी परिचालन गरिएको छ ।

सुदूरपश्चिमका भारतसँग सीमा जोडिएका मुख्य नाकाहरूमा सशस्त्र प्रहरी परिचालन गरिए पनि अन्य स–साना नाकाहरूबाट लुकेर नेपाल प्रवेश गर्नेहरूको संख्या अझै नरोकिएको बैतडीको पञ्चेस्वरका स्थानीय नरेश तिवारीले बताए । ट्युबमा तर्दा प्रतिव्यक्ति १ हजार भारतीय रूपैया लिने गरेको समेत उनको भनाइ छ ।

डडेल्धुरा जिल्लाको भारतसँग सिमाना जोडिएको परशुराम नगरपालिकाको कौवानी क्षेत्रदेखि भागेश्वर गाउँपालिकाको गैरीबगडसम्म १ दर्जनभन्दा बढी स्थानबाट नेपाल प्रवेश गरिरहेका छन् ।

उता बैतडीको तल्लो सोराड क्षेत्रमा रहेका शिवनाथ गाउँपालिका र पञ्चेश्वर गाउँपालिकाका विभिन्न क्षेत्रबाट पनि नेपाल भित्रिने क्रम नरोकिएको परशुराम नगरपालिका– ७ का वडाअध्यक्ष केशव बोहराले बताए । सोमबार मात्रै बैतडीको शिवनाथ गाउँपालिकासँग जोडिएको महाकाली नाकाबाट १७ जना नेपाली नागरिक नेपाल प्रवेश गरेको उनको भनाइ छ ।

‘४÷५ दिन भारतबाट हिँडेर सीमामा पुगेका रहेछन् । साँझको ७ बजेदेखि बिहान २ बजेतिर महाकाली तर्ने गरेका छन्,’ वडाअध्यक्ष बोहराले भने, ‘सीमामा प्रहरी परिचालन गरिए पनि महाकालीको सिमाना लामो छ । कहाँबाट तरेर नेपाल प्रवेश गर्छन् भन्ने यकिन गर्नै समस्या छ ।’

अहिलेसम्म ४४ जनालाई क्वारेन्टाइनमा राखिएको अध्यक्ष बोहराले जानकारी दिए । उनीहरूलाई वडाले व्यवस्थापन गरेको शिवशंकर मावि सादनीमा रहेको क्वारेन्टाइनमा राखिएको वडाअध्यक्ष बोहराले जानकारी दिए ।

भारतमा ‘लक डाउन’ गरेपछि आफूहरूलाई मालिकले निकालेपछि अलपत्र परेको भारतबाट नेपाल प्रवेश गर्नेहरू बताउँछन् । सोमबार नेपाल प्रवेश गरेकाहरूले भारतबाट आउँदा जंगलमा बसेको र खाना पनि सकिएपछि भोकभोकै सीमानाकासम्म पुगेको बताएका छन् ।

भारतीयको गाउँमा जाँदा कोरोनाका कारण आफूहरूलाई बास नदिएको र उनीहरूले उल्टै हप्की र दप्की गरेर लखेटेको उनीहरूको गुनासो छ । उनीहरू महाकाली तरेर नेपाल आउँदा ग्यालिनबाट महाकाली तरेको प्रत्यक्षदर्शीले बताएका छन् ।

बैतडीको नागार्जुन घाटको डुङ्गा नै हटाइयो

बैतडीको शिवनाथ गाउँपालिका– १, नागार्जुन घाटमा रहेको डुङ्गा हटाइएको छ । कामको सिलसिलामा भारत गएका मजदुरलाई ठेकेदारले भारतबाट डुङ्गामार्फत नेपाल प्रवेश गराउन थालेपछि घाटमा रहेको डुङ्गा नै हटाइएको हो ।

ठेकेदारले मनपरी ढंगले रातिको समयमा डुङ्गा चलाउन थालेपछि प्रशासनलगायत जनप्रतिनिधिहरूले ट्रयाक्टरमार्फत डुंगालाई नदीको किनारभन्दा माथि ल्याएर राखिएको स्थानीय पदमराज जोशीले बताए । घाटमा रहेको डुङ्गा ट्रयाक्टर लगाएर तान्दा डुङ्गा नै फुटेको जोशीको भनाइ छ ।

ठेकेदारले अवैध रूपमा नेपाल प्रवेश गराउन थालेपछि डुङ्गालाई माथि तान्दा सामान्य क्षति पुगेको शिवनाथ गाउँपालिकाका अध्यक्ष करनसिंह साउदले बताए ।

‘लकडाउन’ हुँदा सरकारले सीमा बन्द गरेका कारण कोरोनाको जोखिमलाई लिएर ट्रयाक्टरमार्फत प्रहरी लगाएर माथि तान्दा क्षति पुगेको गाउँपालिकाका अध्यक्ष करनसिंह साउदले बताए ।

प्रकाशित मिति: सोमबार, चैत २४, २०७६ २१:५६