बजार नपाएर खेतमै कुहिन थाल्याे अदुवा, किसानकाे गुनासाे- हामी भाेकै भयाैँ

A+ A A-

कोरोना भाइरस राेकथामका लागि गरिएकाे ‘लकडाउन’ निर्विकल्प लम्बिरहँदा डोटीका किसान चिन्तित बनेका छन्। जिल्लाको जोरायल गाउँपालिकामा उत्पादित अदुवा बजार लैजान नपाउँदा किसान चिन्तित बनेका हुन्।

बजार नपाएपछि अदुवा बारीमै कुहिन थालेकाे किसानहरूकाे गुनासाे छ । अदुवा बारीमै कुहिन थालेपछि यहाँका किसानहरू मर्कामा परेका छन्। जोरायल गाउँपालिका र अदुवा बेसार जोनले गत वर्ष वडा नम्बर-४ नकुलाई अदुवा पकेट क्षेत्र घोषणा गरेको थियो।

अदुवा पकेट क्षेत्र घोषणा गरेपछि किसानले अदुवा खेतीलाई प्राथमिकतामा राख्दै आएका छन्। यस क्षेत्रमा गाउँपालिका–४ भित्रका करिब ५० परिवारले अदुवा खेती गर्दै आएका छन्।

अदुवा बिक्री गरेर यस क्षेत्रका कृषकले दैनिक उपभोग्य सामाग्री खरिददेखि छोराछोरीकाे पढाइ खर्चसम्म जाेहाे गर्ने गरेका छन् । कोरोना भाइरस राेकथामका लागि गरिएकाे लकडाउनका कारण अदुवा ढुवानी गर्न असहज भएको कृषक बताउँछन्।

गएका वर्षहरूमा राम्रो मूल्य पाउन थालेपछि धान र मकै खेती त्यागेर अदुवा रोप्न तम्सिएका किसान यो वर्ष बजार नपाँउदा आत्तिएका छन् ।

गाउँपालिकाले पकेट क्षेत्र घोषणा गरेपछि अन्य बाली छोडेर अहिले १५ रोपनी जग्गामा अदुवा खेती गरेको कृषक लाल देउवाले बताए।

अदुवा बारीमै कुहिन थालेपछि साँझ बिहानको छाक कसरी टार्ने भन्ने समस्याले सताएको उनको भनाइ छ। ‘अहिले अदुवा बिक्री गर्ने समय भएको छ। यही समयमा ‘लकडाउन’ भयो , उनले भने, ‘वर्ष भरी गरेको मिहेनत खेर गयो। अब के गर्ने? हामी किसान समस्यामा छाैँ।’

गाउँपालिकाले नै ४ हजार ३ सय रूपैयाँको बीउ दिएको र त्यही बीउबाट अदुवा खेती गरेको इन्द्रादेवी बोहाराले बताउँछिन्। तर, उत्पादित अदुवाले बजार नपाउँदा समस्या परेकाे उनकाे गुनासाे छ ।