दैनिक ज्यालादारीका काम ठप्प हुँदा सास्ती, पाँच सय ९० परिवारलाई राहात वितरण

A+ A A-

बाजुरा जिल्लाको सदरमुकाम बडिमालिका नगरपालिका–८ का असहायको घरमा दैनिक ज्यालादारी गर्न नपाउँदा चुलो बल्न छोडेपछि वडा अध्यक्ष प्रकाश रावलले खाद्यान्न सामग्री बोकेर उनीहरूको घरमा पुगेर वितरण गरेका छन् । विश्वभर महामारीका रूपमा फैलिएको कोरोना भाइरस (कोभिड १९) को संक्रमणबाट बच्न लकडाउन भइरएकाले सदरमुकामा दैनिक ज्यालामजुरी गर्न नपाएपछि उनीहरूलाई समस्या भएको हो ।

आफ्नो वडामा भएका एकल महिला, गरीब र सहाराबिहीन गरी पाँच सय ९० परिवारको परिवारिक स्थिति हेरी ५ देखि २५ किलो चामल, एक केजी नुन र एक चक्की साबुन बाँड्ने काम सुरु गरेको कुरा वडाअध्यक्ष रावलले बताए । नेपाल लकडाउनको अवस्थालाई मध्यनजर गर्दै एक पटकमा बडीमा १० देखि १५ जना जम्मा गरेर राहात सामग्री वितरण गरेको हो । वडावासीको खाद्य संकट टार्न २५ क्विन्टल चामल, ५ क्विन्टल नुन र एक चक्की सावुन वितरण गरेका छन् ।

‘हामीलाई ठूलो सहयोग भएको छ । दाउँरा र दूध बेचेर चामल किन्ने गरेका थियौँ, आजभोलि त्यो सबै बन्द भएको छ। केही दिन चुलो बाल्न सहयोग हुँने भयो’ बडिमालिका–८ की धुमा रावलले भनिन् ।

वडाको विपद व्यवस्थापन कोषबाट खर्च गर्ने गरी बस्तीमा पुगेर राहात विवतरण गर्न थालिएको वडा सदस्य नरबहादुर अयडीले बताए। ‘लकडाउनका कारण दूध, दौरा गिट्टी बालुवा बेचर पनि पेट पालन नपाएको भन्दै वडाकार्यालयमा जनताको गुनासो आएकाले जनताको जीवन रक्षाका लागि राहातस्वरूप उपभोग्य सामाग्री वितरण गरेकोहो। पहिले बाँच्नु पर्‍यो’ वडा सदस्या अयडीले भने ।

खाद्यन्न अभावका कारण जयालमजदरी गरी पेट पाल्नेको बिहान बेलुकी चुलोमा आगो बल्न छोडेपछि थारैभए पनि राहात महशुस भएको स्थानीले बताएका छन् ।

सदरमुकाम मार्तडी बजार लकडाउनका कारण ठप्प भएपछि दिनभर काम गरेर बिहान बेलुकी छाक टार्ने मजदुर तथा कृषकलाई खाद्यन्न समस्या भएपछि व्यक्तिगत लगानीमा राहात लगानी गरेको वडा अध्यक्ष रावलले बताए । उक्त सामग्री एक लाख पचास हजार रुपैयाँ बरावरको रहेको छ । राहात सामग्री धनगडी र मार्तडी बजारबाट खरिद गरी सीधै वडामा पुर्‍याएको वडा सदस्य अयडीले बताए ।

त्यसैगरी बाजुराका विभिन्न स्थानीय तहमा साबुन र मास्क वितरण गरेका गरिएको छ । कोरोनाबाट बच्न बाजुराका नगरदेखि गाउँ बस्तीसम्म जनचेतना फैलाउने, हेल्पडेक्स, क्वारनटाइन तथा आइसोलेसन कक्ष व्यवस्थापन र राहात सामग्री वितरणलगायतका कार्य तीब्ररूपमा भएका छन् । कोरोनाबाट बच्न सुरक्षा संयन्त्रको एकीकृत कार्यबाहेक अन्य स्थानीय वडा, प्रदेश र संघीय तहबाट आ–आफ्नै तरिकाबाट एकल कार्य भइरहेकाछन् ।

प्रकाशित मिति: सोमबार, चैत २४, २०७६ १५:४७