यस्ता देशमा कम फैलिएको छ कोरोना, नेपाल कति सुरक्षित ?

A+ A A-

चीनको वुहान सहरमा गत ३१ डिसेम्बरमा पहिलो पटक देखा परेको कोरोना भाइरस यतिबेला विश्वव्यापी महामारीका रुपमा फैलिएको छ । हालसम्म कोरोना भाइरस विश्वका दुई सयभन्दा बढी देशमा फैलिसकेको छ भने पौने १३ लाख संक्रमित भइसकेका छन् ।

कोरोना भाइरस संक्रमणका विषयलाई लिएर अनेक खोजहरु भइरहेका छन् । यसको उत्पत्तिदेखि औषधिसम्म तीव्र खोजी भइरहेको छ । विश्वका शक्तिशाली भनिएका राष्ट्र कोरोना भाइरससँगको लडाइमा सफल हुन सकिरहेका छैनन् ।

फरच्युन डटकमका अनुसार सोही क्रममा अमेरिकामा भएको एउटा अध्ययनमा गम्भीर बिरामी हुनबाट बचाउन नवजात शिशुलाई लिने बीसीजी खोप कोरोना भाइरस संक्रमणमा सुरक्षाको रुपमा देखिएको छ ।

यो अध्ययनअनुसार कोरोना भाइरस संक्रमण र यसबाट मृत्यु बीसीजी खोपको व्यवस्था नभएका या फेरि बन्द भएका देशमा बढी रहेको देखिएको छ ।

जुन देशमा बीसीजी खोप अनिवार्य छ, ती देशमा अपेक्षाकृत रुपमा कोरोना भाइरसबाट हुने मृत्युदर कम रहेको पाइएको छ ।

न्युयोर्क इन्स्टिट्युट अफ टेक्नोलोजीको बायो मेडिकल साइन्सेसले बीसीजीको खोप अनिवार्य भएका देशमा संक्रमणको असरको विश्लेषण गर्न अध्ययन गरेको थियो ।

यसमा बीसीजीको खोप नलगाइएका देश इटली, स्पेन, अमेरिका, लेबनान, नेदरल्यान्ड, बेल्जियमजस्ता देशको तुलनामा नेपाल, जापान, भारतजस्ता बीसीजीको खोपको व्यवस्था भएका देशमा कोरोनाको संक्रमण र मृत्युका घटना कम देखिएका छन् ।

यद्यपि बीसीजीको खोपकोे व्यवस्था छ । तर, त्यहीबाट कोरोना भाइरस सुरु भएको थियो । त्यसैले चीनको घटनालाई अपवाद मानिएको छ ।

यद्यपि यो रोगबाट वृद्ध उमेरका मानिसहरु सबैभन्दा बढी प्रभावित भएका छन् । चीनमा सन् १९७६ अघि बीसीजी खोपको राम्रो व्यवस्था थिएन ।
न्युयोर्क इन्स्टिट्युट अफ टेक्नोलोजीका सहायक प्राध्यापक गोन्जालो ओटाजुले बीसीजीको खोप केबल क्षयरोगको ब्याक्टेरिया मात्र नभएर संक्रामक रोगका जीवाणुलाई पनि रोक्ने क्षमता बढाउने बताउँछन् ।

अहिले कोरोनाको भाइरसको उच्च संक्रमण रहेका इटली, अमेरिकाजस्ता देशमा क्षयरोगको उच्च जोखिममा रहेका बच्चालाई मात्र खोप अनिवार्य छ । जर्मनी, स्पेन, फ्रान्स, इरान र बेलायतमा खोप अनिवार्य गर्न छाडिएको चार दशक पुगेको छ ।

जापान र दक्षिण कोरियामा अहिले पनि खोप अनिवार्य छ । कोभिड–१९ मा बीसीजी खोपको प्रभावकारिताको विषयमा सबैभन्दा पहिला राडबाउड युनिभर्सिटीका संक्रामक रोग विशेषज्ञ मिहाई नेटीको टोली ६० वर्षभन्दा माथिका मानिसमा बीसीजी खोपको प्रभावका विषयमा पनि अनुसन्धान गर्ने तयारीमा छ ।

उनको टोलीले यसअघि करिब ४ सय स्वास्थ्यकर्मीलाई अनुसन्धानमा समावेश गरेको थियो । जसमा दुई सयलाई बीसीजी खोप दिइएको थियो । अहिले वैज्ञानिकहरुले कोरोना भाइरसविरुद्ध क्षयरोगको खोप प्रभावकारी बन्नुको कारणबारे अनुसन्धान गरिरहेका छन् ।

नेपालसहित धेरै देशमा जन्मिनेबित्तिकै बीसीजी खोप अनिवार्य रुपमा लगाउने गरिन्छ । यसले क्षयरोगजस्ता रोगसँग लड्न सहयोग पुग्छ ।
विश्वमा क्षयरोगको खोपको सुरुवात सन् १९२० देखि सुरु भएको हो ।

ब्राजीलमा त्यसबेला देखि नै, जापानमा १९४७, भारतमा १९४९ देखि बीसीजी खोपको सुरुवात भएको थियो । इरानमा यसको सुरुवात १९८४ देखि भएको हो । यसअनुसार खोवको सुरुवात भएका देशमा पनि यो खोप लगाउन सुरु गर्नुभन्दा पहिले जन्मिएका मानिसहरु अझै जीवित छन् ।

प्रकाशित मिति: सोमबार, चैत २४, २०७६ १२:१२