फोर्ब्समा अटाएका पूर्वेली ‘अर्बान गर्ल’

A+ A A-

बुबाआमाको अपेक्षा थियो, छोरो सरकारी सेवामा छिरोस् र आफ्नो भविष्य बनाओस् । अर्को जमात थियो, नेपालमा सम्भावना नै नदेख्ने युवाहरूको । उनीहरूको एउटै लक्ष्य विदेश हुन्थ्यो, छ पनि ।

तर, झापाका किरण तिम्सिनाले न सरकारी सेवा रोजे, न त विदेश नै । उनले रोजे स्वउद्यम । अरूको जागिर खाने होइन, आफैँ केही गर्नुपर्छ । हरेक दिन उनी नयाँनयाँ आइडिया सोच्थे । खाँदा, बस्दा, उठ्दा, सुत्दा सोच्थे- नेपालमै नयाँ के गर्न सकिन्छ ?

उनको भेट मोरङकी निकिता आचार्यसँग हुन्छ । त्यसपछि एकअर्काले आफ्नो प्रोजेक्ट सुनाउँछन् । सँगै मिलेर काम गर्ने निर्णयमा पुग्छन् र सन् २०१२ मा उनीहरूले ‘अर्बान गर्ल’ सुरु गरे ।

दाउराले गल्फ खेल्थिन् फोर्ब्सकी प्रभावशाली महिला

तिम्सिना र आचार्य फोर्ब्स म्यागजिनले बिहीबार सार्वजनिक गरेको एसियाका प्रभावशाली युवाको सूचीमा परेका छन् । नेपालमै केही गर्न सकिन्छ भन्ने उदाहरणीय पात्र उनीहरू बनेका छन् ।

कोरोना भाइरस (कोभिड- १९)का कारण लकडाउन काठमाडौं । व्यापार, व्यवसाय, कलकारखाना ठप्प । बाहिर निस्कन पाइँदैन । त्यो दिन किरणले घरबाटै राति अबेरसम्म काम गरे । भोलिपल्ट बिहान ढिलासम्म पनि आँखा उघ्रेन उनको ।

तर, उनका आँखा उघ्रनुअघि नै उनको खुसीको किरण विश्वभर फैलिइरहेको थियो । उनी उठ्नुअघि नै बधाई र शुभकामनाले सामाजिक सञ्जाल रङ्गिएको थियो ।

अहिले उनीहरूलाई शुभचिन्तकहरूले सामाजिक सञ्जाल र फोनबाट बधाई र शुभकामना दिइरहेका छन् । तर, लकडाउनका कारण भेटेरै खुसी साट्न पाएका छैनन् । यो खुसी प्राप्त गर्नका लागि उनीहरूले धेरै मिहिनेत र परिश्रम गरेका छन् ।

उनी मिहिनेत र परिश्रमलाई नै सफलताको श्रेय मान्छन् ।

‘कसरी यहाँसम्म आइपुग्नुभयो ?

फोनबाटै उनले आफ्ना विगत र वर्तमान हामीसँग सेयर गरे ।

किरण कम्प्युटर इन्फर्मेसन सिस्टम पढ्दै थिए । निकिता बीबीए । पढाइ सकिएसँगै अब के गर्ने त ? उनीहरूलाई यो प्रश्नले बारबार घोच्थ्यो । सँगै पढेका साथी कोही विदेश, कोही जागिरे । फेरि अगाडि आउँछ- ‘हामी के गर्ने त ?’

सुरुमा उनीहरूले एक आईटी कम्पनीमा जागिर नै खाए । त्यही कम्पनीमा किरण र निकिताको भेट भयो । केही समय काम गरेपछि कम्पनी बन्द भयो । फेरि त्यही प्रश्न आयो, अब के गर्ने ? लामो छलफल र रिसर्चपछि निर्णयमा पुगे- अब आफैँ काम गर्ने ।

तर, के गर्ने ?

अनलाइन बिजनेस विदेशमा राम्रै चलेको थियो तर नेपालमा फाट्टफुट्ट ठमेलमा थियो । त्यो पनि विदेशमा रहेकालाई सामान पठाउने मात्र । नेपालमा पनि आमनागरिकले अनलाइनबाट सामान किन्ने सिस्टमको विकास किन नगर्ने ? उनीहरूले अनलाइनबाट सामान बेच्ने आइडिया निकाले ।

त्यसपछि सन् २०१२ मा २० हजार रुपैयाँबाट उनीहरूले अर्बान गर्ल स्थापना गरे ।

नक्कली गरगहनादेखि टि-सर्ट, पानीको बोतलका साथै मेकअप, घर सजावटका र विद्युतीय सामान बिक्री गर्न थाले ।

त्यतिबेला मार्केट रेडी थिएन । मान्छेलाई विश्वास गर्न गाह्रो थियो । फोन वा म्यासेजको भरमा अर्डर गर्नुपर्ने । अनलाइन बिजनेस, त्यो पनि नेपालमा । यहाँ काम सुरु गर्न साजिलो छ तर निरन्तरता दिन पो गाह्रो । रिस्क मोलेर उनीहरूले काममा हात हाले ।

‘रिस्क र अठोट हुनै पर्‍यो नि !’, किरण मुस्कुराउंँछन् ।

‘कस्ता चुनौतीको सामना गर्नुपर्‍यो ?’

सबैभन्दा बढी पोलिसी लेबलमा गाह्रो छ । विदेशीले आइडियामा पैसा हाल्छ तर नेपालमा त्यो सम्भव छैन । सरकारले पनि अनेक नीति ल्याउँछ, जसले असहज बनाइरहेको हुन्छ । मान्छेलाई विश्वास गर्न पनि गाह्रो, त्यो पनि अनलाइन बिजनेस ।

राज्यले राम्रो नीति बनाउन नसेकेकामा उनी चिन्तित हुन्छन् ।

‘गरगहनाबाट किन यू-टर्न ?’

‘नक्कली गरगहना नि बेच्ने ?’ यस्ता प्रश्नहरू उनीहरूलाई आउँथे । गरगहना बेच्दा त्यति राम्रो फस्टाउन पनि सकेन । तर, उनीहरूले हरेस खाएनन् । रेसमै दौडिए । सन् २०१७ मा फेरि अनलाइन ‘युजी केक’ प्रोजेक्टमा हात हाले ।

आफैँले केक बनाएर अनलाइनबाटै बेच्ने । त्यसपछि उनीहरूले सफलता हात पार्दै गए । २० हजार रुपैयाँँबाट सुरु गरेको व्यवसायमा अहिले ५० जनाले रोजगारी पाएका छन् ।

विदेश नगएको र सरकारी जागिर नखाएकामा उनीहरूलाई अहिले कुनै पछुतो छैन ।

सफलताको लामो सास फेर्छन् किरण ।

‘सफल हुन के आवश्यक रहेछ त ?’

एक पटक असफल हुँदैमा हार खाने डिसिजनमा पुग्नुभएन । १० चोटि ट्राई गर्दा ९ वटामा असफल नै हुन्छ । एउटामा सफल हुने हो । मनबाटै गरेको छ भने एक पटक असफल भयो भन्दैमा छाड्ने होइन । कामलाई निरन्तरता दिने हो । ट्राई गर्न छाड्नु भएन । हरेक पल आफ्नो आइडियालाई खेलाउने हो ।

उनी कामलाई नै विश्वास गर्छन् ।

२ जनाले कसरी काम गर्छन् ?

किरण टेक्नोलोजी हेर्छन् । निकिता म्यानेजमेन्टमा बढी फोकस हुन्छिन् । निकिता हरेक काममा रिस्क लिन चाहन्छिन् । नयाँ ट्राई गरौँ भन्ने सोच । उनको रिस्कले पनि कम्पनी यहाँसम्म आइपुगेको किरण बताउँछन् ।

उनी काम सफल हुनुमा र एसियाको प्रभावशाली युवाको सूचीमा परेको खुसीको श्रेय निकितालाई दिन्छन् ।

यी हुन् फोर्ब्सको प्रभावशाली सूचीमा परेका ५ नेपाली

प्रकाशित मिति: सोमबार, चैत २४, २०७६ ११:१०