यी हुन् फोर्ब्सको प्रभावशाली सूचीमा परेका ५ नेपाली

A+ A A-

अमेरिकी म्यागाजिन फोर्ब्सले एसियाका ३ सय जना प्रशावशाली युवाहरुको सूची सार्वजनिक गरेको छ । सो पत्रिकाले उद्यमी, सामाजिक काममा सक्रिय, नेतृत्वदायी र समाजमा सकारात्मक भूमिका निर्वाह गरेका ३० वर्षभन्दा कम उमेरका युवाहरुलाई यो सूचीमा राखेको छ ।

फोब्र्सले करिब ३ हजार ५ सय जनाबाट ३ सय जनाको नाम टुंगो लगाएको हो ।

सूचीमा नेपालका पाँच जना परेका छन् । नेपाली युवाहरु प्रतीमा शेर्पा, निकिता आचार्य, किरण तिम्सिना, शुभांगी राणा र जेस्सेलिना राणा यो सूचीमा अटाएका छन् ।

यो सूचीमा परेका निकिता आचार्य र किरण तिम्सिनाले सन् २०१२ मा ‘अर्बान गर्ल’ अनलाइन कम्पनी स्थापना गरेका थिए । फोर्ब्सको सूचीमा उनीहरू ‘रिटेल एन्ड इकमर्स’ विधाका ३० मध्येमा छानिएका हुन् ।

उनीहरुले करिब २० हजार रुपैयाँ लगानी गरेर व्यवसाय सुरु गरेका थिए । अर्बान गर्लले विभिन्न डिजाइनका गरगहनादेखि ‘कस्टमाइज्ड’ टि–सर्ट, पानीको बोतलका साथै मेकअप, घर सजावटका र विद्युतीय सामान बिक्री गर्ने गर्छ ।

अहिले काठमाडौं र पोखरामा गरी दुई ठाउँमा यसले काम गरिरहेको छ । जसमा ५० जनाभन्दा बढीले काम गर्छन् । यसले सन् २०१६ देखि बेकरीजन्य सामग्रीको पनि बिक्री गर्न सुरु गरेको छ । ‘युजी केक्स’ नामक यो कार्यक्रमले कान सुन्न नसक्ने महिलाहरूलाई तालिम दिएर रोजगारी दिँदै आएको छ ।

प्रतीमा शेर्पा इन्टरटेन्मेन्ट तथा स्पोर्ट्स विधाबाट यो सूचीमा परेकी छन् । ११ वर्षको उमेरदेखि नै गल्फ खेल्न थालेकी उनी रोयल नेपाल गल्फ कोर्षमा काम गर्ने बुवाका साथमा हुर्किएकी हुन् । त्यही बस्दादेखि नै उनले गल्फ खेल्न थालेकी हुन् ।

फाब्र्सका अनुसार ११ वर्षको उमेरमा खेल्न सुरू गरेकी उनको पहिलो गल्फ क्लब रूखको हाँगाबाट बनाइएको थियो । उनी नेपालकी अब्बल गल्फ खेलाडी हुन् । उनका आमाबुवा अझै पनि रोयल गल्फ कोर्षभित्रै बस्छन् । उनको सपना नेपालका तर्फबाट पहिलो महिला गल्फ खेलाडीका रुपमा अन्तर्राष्ट्रिय प्रतियोगितामा सहभागिता जनाउँनु हो ।

शुभांगी राणा इन्जिनियर र जेस्सेलिना राणा मानवअधिकारवादी अधिवक्ता हुन् । उनीहरु ‘प्याड–टु–गो’ संस्थाका संस्थापक हुन् । उनीहरु ‘सोसल अन्ट्रप्रनर’ विधामा प्रभावशाली ३० जनाभित्र परेका हुन् ।

उनीहरूले आफ्नो संस्था सन् २०१८ मा स्थापना गरेका हुन् । यो संस्थाले महिनावारी स्वास्थ्य र यसबारे समाजमा रहेका भ्रम निवारणको काम गर्दै आएको छ । यो संस्थाले सातै प्रदेशमा विभिन्न बैंक, स्कुल, फिल्म हल, अस्पताल लगायत ठाउँमा ८० वटा ‘प्याड भेन्डिङ मेसिन’ राखेको छ ।

संस्थाले महिनावारीबारे सचेतना कार्यक्रम र स्यानिटरी प्याड सस्तोमा उत्पादन गर्ने कम्पनीसँग सहकार्य पनि गर्छ । प्याड–टु–गो संस्थाले स्विट्जरल्यान्डमा भएको एक कार्यशालामा प्रथम पुरस्कार र सिंगापुरमा भएको ‘स्टार्ट–अप पिच कन्टेस्ट’ मा दोस्रो पुरस्कार पाएको थियो ।

प्रकाशित मिति: शुक्रबार, चैत २१, २०७६ १२:४२