बुटवलका सडक र पेटीमा साढे ४ लाख लिटर औषधि छर्किइँदै

A+ A A-

बुटवल उपमहानगरपालिकाले नगरभित्रका सडक र पेटीमा क्लोरिन झोल र ब्लिचिङ पाउडर मिश्रित औषधि छर्ने काम सुरु गरेको छ ।

कोरोना भाइरसको नियन्त्रणको पूर्वतयारीका लागि भन्दै उपनगरपापलिकाभित्र रहेका ३० फिटभन्दा बढीका सडकहरूमा क्लोरिन झोलसहितको औषधि छर्न सुरु गरिएको हो ।

३ दिनमा उपमहानगरपालिकाभित्रका सडकमा उक्त क्लोरिन औषधि छरिसकिने उपमहानगरपालिकाका नगरप्रमुख शिवराज सुवेदीले जानकारी दिए । यो क्लोरिन औषधि छर्दा सडक किनारमा टाँसिएर रहेका कोरोना भाइरस मर्ने विश्वास गरिएको छ । एक पटकमा ४५ सय लिटर औषधि दमकलमा राखेर सडक र पेटीमा छर्किने उपमहानगरपालिकाका जनस्वास्थ्य प्रमुख कुन्दनकुमार सिंहले जानकारी दिए ।

पहिलो चरणमा ४ लाख ६८ हजार लिटर क्लोरिन औषधि छर्किइने र अपुग भएमा औषधि ल्यायने र छर्किइने उनको भनाइ छ ।

बुटवलको चिडिया चौकीदेखि योगीकुटी सिमानासम्म, मिलनचोकदेखि वाणिज्य क्याम्पससम्म, बेलबास पुलदेखि १४ नंं वडा कार्यालय, भुड्की चोकबाट बेसक्याम्प, कृषि पजबाट योगीकुटी कालिकापथसम्म औषधि छर्किइने उपमहानगरपालिकाले जनाएको छ ।

त्यस्तै, तामनगरदेखि १४ नं. वडा कार्यालय, मधैया चोक, तामनगर, समेनार हुँदै शुद्धोधन सिमाना, नहरपुरदेखि वडा नं. १८ को कार्यालयसम्म, बेलबासदेखि नुवाकोट जाने बाटो, हिलपार्क, मणिमुकुन्द पार्कवरपरि, देवीनगर चोकदेखि देवद्धि, श्रवणपथदेखि प्रहरी तालिम केन्द्र, बुटवल मण्डप, लक्ष्मीनगर गेटदेखि बहुमुखी, दुर्गामन्दिर हुँदै गोलपार्कलगायतका सडकमा औषधि छर्कने बताइएको छ । उपमहानगरपालिकाले यस कार्यका लागि विपद् व्यवस्थापन कोषबाट बजेट खर्च गर्नेछ ।

उपमहानगरपालिकाले क्लोरिन झोल छर्कने समयमा १ घण्टा घरभित्र झ्याल ढोका लगाएर बस्नसमेत आग्रह गरेको छ ।

प्रकाशित मिति: आइतबार, चैत २३, २०७६ २१:४८