‘लकडाउन’ ले कृषक मारमा, तरकारी खेतमै कुहिन थाल्यो

A+ A A-

लामो समयको लकडाउनका कारण किसानले लगाएका तरकारी खेतमै नष्ट हुन थालेको छ । बजारसम्म तरकारी पु¥याउन नपाएका कारण तयारी अवस्थामा रहेको तरकारी खेतमै सुक्न थालेको हो ।

तरकारीको पकेट क्षेत्रको रूपमा रहेको मोरङको कटहरी गाँउपालिका– ४ को फुलटोल, मदुरामाका किसानले लगाएका विभिन्न तरकारी खेतमै कुहिन थालेका हुन् ।

फुलटोल मदुरामा बसोबास गर्ने १ सय २० परिवारमध्ये ८० परिवारले व्यावसायिक रूपमा तरकारी खेती गर्दै आएका छन् । यहाँबाट उत्पादित तरकारीको मुख्य बजार प्रदेश– १ को राजधानी विराटनगरका साथै, सुनसरीको इनरुवा, इटहरी र धरान हो ।

सर्वसाधारणको स्वास्थ्यलाई ध्यानमा राख्दै ११ चैतयता लगाइएको लकडाउनका कारण खेतमा फलेका तरकारी खेतमै सुक्न थालेका हुन् ।

विगत वर्षझैँ यस वर्ष पनि ४ विगाह खेतमा तरकारी बाली लगाएकी कटहरी– ४ की तारादेवी सिंहले खेतमै तरकारी सुक्न थालेकाले यसपल्ट घाटा बोहोर्नुपर्ने अवस्था आएको गुनासो गरिन् ।

‘थोरैथोरै त खेतबाटै तरकारी बिक्छ । तर, यसरी कहिले बेचेर सक्नु ? यो लकडाउनले तरकारी बजारसम्म पु¥याउन नसक्दा खेतमै कुहिने भयो ।’

उनले भनिन्, ‘सरकारले तरकारी सजिलै बेच्न सक्ने वातावरण सिर्जना नगरिदिए ठूलो घाटा लाग्ने निश्चित छ ।’

खेतमै तरकारी नष्ट हुन थालेपछि कतिपय किसानले जोखिम मोलेरै भए पनि तरकारी लिएर विराटनगर बजारसम्म पुग्ने गरेका छन् । तर, प्रहरीको आँखा छलेर तरकारी बजारसम्म पु¥याए पनि सस्तो मूल्यमा बेचेर फर्किनुपरेको अनुभव उनले सुनाइन् ।

कटहरी–४ का किसान किसनाथ मण्डलले १५ दिनअघिसम्म टमाटर प्रतिकिलो ५० रुपैयाँसम्ममा बिक्री गर्दै आएका थिए । तर, अहिलेको असहज अवस्थाका कारण न्यूनतम १० रुपैयाँ प्रतिकिलोमै बेचेर फर्किनुपरेको उनले बताए ।

‘यहाँ नाफाभन्दा पनि हामीलाई लगानी निकाल्न नै धौधौ पर्ने अवस्था आयो,’ मण्डलले भने, ‘टमाटर र तरकारी खेतमै कुहिन थालेपछि बजार पुग्नुपर्ने जोखिम मोल्नुको विकल्प छैन । त्यसमा पनि हतारहतार सस्तोमै बेचेर फर्कनुपरिरहेको छ ।’

कात्तिक महिनामा किसानले लगाएका विभिन्न तरकारी बाली यतिखेर तयारी अवस्थामा छन् भने नयाँ लगाइएका बालीलाई पनि सिँचाइ गर्न नपाएका कारण खेतमै सुकन थालेको किसानहरू बताउँछन् ।

फुलटोल, मदुराका ८० किसान परिवारको मुख्य रोजीरोटी नै तरकारी खेती रहेका कारण हालको यो लकडाउनले सिङ्गो गाउँ नै प्रभावित भएको स्थानीय विनोद सिंहले बताए । थोक व्यापारीहरू तरकारी लिन नआएको तथा मलखाद र डिजेलको समस्याका कारण तरकारीहरू खेतमै नष्ट हुन थालेको उनले बताए ।

एकातिर किसानका तरकारी खेतबारीमै सुक्न थालेको छ भने अर्कोतर्फ लकडाउनका कारण घरमै बस्नुपरेका बजारक्षेत्रका सर्वसाधारणले आसपासका पसलहरुमा चर्को मूल्यमा तरकारी किन्न बाध्य छन् ।

प्रकाशित मिति: आइतबार, चैत २३, २०७६ २०:५५