प्रदेश १ सरकारकाे ‘जनसुरक्षा’ कोषमा सिभिल बैंकको ५ लाख सहयाेग

A+ A A-

विश्वभर महामारीका रूपमा फैलिएको कोरोना भाइरस (कोभिड– १९) को रोकथाम, प्रतिरक्षा र उपचारका लागि प्रदेश १ सरकारले स्थापना गरेको ‘कोरोना जनसुरक्षा कोष’ मा सिभिल बैंकले ५ लाख रुपैयाँ दिने घोषणा गरेको छ ।

सिभिल बैंक प्रदेश नं. १ ले प्रदेश सरकारले स्थापना गरेको कोषमा आइतबार ५ लाख रूपैयाँ योगदान गरेको हो । उक्त रकमबराबरको चेक सिभिल बैंक प्रदेश नं. १ का प्रमुख राजेश ढकालले मुख्यमन्त्री शेरधन राईलाई आइतबार हस्तान्तरण गरेका हुन् ।

बैंकले सामाजिक उत्तरदायित्वअन्तर्गत प्रदेश सरकारले स्थापना गरेको उक्त कोषमा रकम जम्मा गरेको बैंकका प्रदेश प्रमुख ढकालले जानकारी दिए ।

चेक हस्तान्तरणपछि मुख्यमन्त्री शेरधन राईले प्रकोप रोकथाम तथा नियन्त्रणमा कोषको खर्च गरिने रकम र प्रकोप नियन्त्रण पछाडि पारदर्शी ढंगबाट हिसाबकिताब सार्वजनिक गर्ने प्रतिवद्धता जनाएको बैंकका प्रदेश प्रमुख ढकालले बताए ।

ढकालले लक डाउनका कारण दैनिक जीवनयापनमा समस्या पर्दै आएका परिवारलाई प्रदेश नं. १ अन्तर्गत रहेका पाँचथर जिल्लाका हिलिहाङ, याङवरक, इलामको माई जोगमाई, मोरङ जिल्लाको सुनवर्षी र विराटचोक शाखाहरूमार्फत पनि राहतस्वरूप खाद्य सामग्रीहरू वितरण गरिने जानकारी दिए ।

कोरोना भाइरसको रोकथाम, प्रतिरक्षा र उपचारका लागि प्रदेश सरकारले कोषको स्थापना गरेको हो । कोष राष्ट्रिय वाणिज्य बैंक विराटनरको कोरोना जनसुरक्षा कोष खाता नं २१२०००५८८१०१ मा जम्मा गर्न तथा फोन पेबाट पनि रकम जम्मा गर्न सकिने मुख्यमन्त्री तथा मन्त्रिपरिषदको कार्यालयले जनाएको छ ।

उक्त कोषमा हालसम्म ११ करोड ५९ लाख १९ हजार ८९ रूपैयाँ जम्मा भएको मुख्यमन्त्रीको कार्यालयले जानकारी दिएको छ ।

प्रकाशित मिति: आइतबार, चैत २३, २०७६ २०:३५