गेष्ट लेक्चर पनि अनलाइनमार्फत दिँदै युनिग्लोव कलेज

A+ A A-

काठमाडौंको नयाँ बानेश्वर स्थित युनि ग्लोव कलेजले ‘लकडाउन’को अवधिमा आफ्ना विद्यार्थीलाई नियमित कक्षादेखि गेष्ट लेक्चर क्लाससमेत अनलाइन मार्फत दिन थालेको छ ।

कोरोना जोखिमले गलेज बन्द भए लगत्तै भर्चुअल क्लास सञ्चालनमा ल्याएको र हालसम्म बीबीए, बीबीए–विआई, एमबीए र एमबीए–फाइनान्स कार्यक्रममा २५ प्राध्यापकद्वारा ७० बढी कक्षा सञ्चालन गरिसकेको क्याम्पसका प्राचार्य डा. नरबहादुर बिष्टले बताए ।

भर्चुअल सेवा प्रदायक जुम तथा गुगल मीट मार्फत सञ्चालन गरिएको कक्षामा विद्यार्थीको बाक्लो उपस्थिति हुनुका साथै अध्ययनमा अत्यन्तै सहयोग पुर्‍याएको क्याम्पसले जनाएको छ ।

कलेजका कार्यक्रम निर्देशक अनन्तराज घिमिरेका अनुसार कलेजले भर्चुअल कक्षा मात्र नभएर विभिन्न क्षेत्रका विशिष्ट व्यक्तिलाई बोलाएर अनलाइन मार्फत गेष्ट लेक्चर कार्यक्रम पनि गर्दै आएको छ ।

कार्यक्रम निर्देशक घिमिरेका अनुसार कोरोना महामारीको यस्तो अवस्थामा पनि विद्यार्थीले अनलाइनबाट नियमित कोर्ष मात्र नभएर विभिन्न क्षेत्रको विशिष्ट व्यक्तिको अनुभव र प्रयोगात्मक अभ्यास पनि प्राप्त गरिरहेका बताए ।

अनलाइन कक्षा लिन पाउँदा विद्यार्थीका साथै अविभावक पनि खुसी छन् । ‘नेपाल लगायत विश्वको हालको विषम परिस्थितिका बावजुत पनि टेक्नोलोजीको प्रयोग गरी अनलाइन मार्फत कक्षा सञ्चालनगर्दा हामीले घरबाटै पढ्न पाउनु नै ठूलो अवसर हो’ बीएमा अध्ययरत पूजा जोशीले भनिन्, ‘कलेजको कक्षा कोठामा पढ्दा शिक्षक बढी सक्रिय हुने अर्थात् शिक्षक केन्द्रित शिक्षण हुन्छ तर विद्यार्थी सक्रिय नहुने हुन्छ । तर, भर्चुअल अनलाइन कक्षामा विद्यार्थी–शिक्षक तथा विद्यार्थी–विद्यार्थीमा पनि अध्ययन गरिने विषयमा छलफल गर्दा झनै बुझ्न सजिलो छ ।’

कलेजका प्राचार्य डा. बिष्टले आगामी दिनमा युनि ग्लोव कलेजले विभिन्न सेमिनार, वर्कसप, समूह छलफल, अन्तर्वार्तामूलक लगायतका कार्यक्रम पनि अनलाइनमार्फत चाँडै सञ्चालनमा ल्याउने बताए ।

यस्ता प्रयासले विद्यार्थीको मनोबल उच्च राख्नुको साथै विद्यार्थीको अध्ययन–अध्यापनमा पनि विशेष मद्दत मिल्ने उनको विश्वास छ ।

प्रकाशित मिति: आइतबार, चैत २३, २०७६ १७:४८