घरघरमै तरकारी वितरण गर्दै छन् भक्तपुरका युवा

A+ A A-

बारीमा तरकारी कुहिने र उपभोक्ताले खान नपाउने स्थिति सिर्जना भएपछि भक्तपुरका युवाहरू उपभोक्ताको घरघरमा तरकारी पुर्‍याउने काममा जुटेका छन् ।

कोरोना भाइरसको संक्रमण फैलिन नदिन सरकारले मुलुकभर लकडाउनको घोषणा गरेपछि कृषि उत्पादनले बजार नपाउने तथा उपभोक्ताले खान नपाउने स्थिति सिर्जना भएपछि युवाहरू किसानको बारीबाट सिधै उपभोक्ताको घरमा तरकारी पुर्‍याउने काममा जुटेका हुन् ।

भक्तपुरका अगुवा कृषकहरू यतिबेला किसानको बारीमा गएर तरकारी संकलन गर्ने र उपभोक्ताको घरघरमा पुर्‍याउने काममा व्यस्त छन् ।

उनीहरूलाई प्रत्येक दिन बिहान किसानको खेतमा गई तरकारी संकलन गर्ने , संकलित तरकारीलाई प्याकेजिङ गर्ने र उपभोक्ताको घरघरमा पुर्‍याउने काम भ्याई नभ्याई छ ।

आफूहरूले टोलटोलमा पुगेर बिक्री गर्ने तरकारी बजार मूल्यभन्दा ३० प्रतिशतसम्म सस्तो पर्ने दाबी पनि उनीहरूको छ । तरकारी प्याकेजिङ गर्दै गरेका किसान प्रचण्ड प्रधान कालिमाटीको तरकारी बजारको मूल्यलाई आधार बनाई हरेक दिन कृषकबाट तरकारी किनेर ढुवानी र ज्याला खर्च थप गरी सिधै उपभोक्ताकोमा पुर्‍याउने गरेको बताउँछन् ।

उनले भने, ‘भक्तपुरका स्थानीय बासिन्दा तथा कृषकहरूले उत्पादन गरेका तरकारीहरू हामीले संकलन गर्छौं । अनि सय/पचास कति कति हुन्छ । हाम्रो ढुवानी भाडा पनि जोड्छौं, ज्याला पनि जोड्छौँ । अनि खुद्रा पैसाको जोहो गर्न नपर्ने गरी ठिक्क पचासको /सयको प्याकेट बनाउँछौँ ।’

खेर जाने हरियो तरकारीमा २५ देखि ३० र खेर नजाने आलु प्याजजस्तो तरकारीमा १० देखि १२ प्रतिशत मार्जिन राखेर यी युवाले उपभोक्ताको हातसम्म तरकारी पुर्‍याउने गरेका छन् ।

अहिले चाँगुनारायण र सूर्यविनायक नगरपालिका तथा वडाका पदाधिकारीसंग समन्वय गरेर तरकारी टोलटोलमा पुर्‍याउने गरिएको पनि बताए । लकडाउनको निर्णयसँगै किसानको तरकारी बारीमा नै कुहिने, उपभोक्ताले खान नपाउने परिस्थिति उत्पन्न भएपछि किसानको बारीबाट सिधै उपभोक्तासमक्ष पुर्‍याउने अवधारणा विकास भएको अर्का अगुवा कृषक कुलबहादुर नेमाफुकीले बताए ।

उनले भने, ‘देशको स्थिति र किसानले भोगेको समस्या सुन्दा, उपभोक्ता र किसानकोबीचमा हामीले पुलको काम गर्नुपर्छ भन्ने सोच्यौँ । किसानहरूको बिग्रिन लागेको तरकारीलाई चलेको भाउमा किनेर घरबाट निस्कन नपाउने उपभाेक्ताहरूलाई, कोरोनाको त्रास भइराखेको अवस्थामा उहाँहरूको घरदैलो, चोकचोकमा तरकारी लान हाम्रो भूमिका हुन सक्छ भन्ने हाम्रो ठम्याइ हाे ।’

तरकारी बोकेको गाडी स्थानीय पदाधिकारी र स्वयंसेवकहरूसँगको समन्वयमा टोलटोलमा पुग्छ । अनि १ /१ मिटरको दूरीमा रहेका उपभोक्तालाई प्याकेजिङ गरेको तरकारी दिने गरिन्छ ।

साँझबिहान उपभोक्ताको घरघरमा पुर्‍याउने तरकारी वितरणमा पनि यो समूहले थप सतर्कता अपनाएको छ । तरकारीमा विषादी छर्दा लगाउने रेनकोटजस्तो पोशाक, पञ्जा, मास्क लगाएर तरकारी वितरण गर्ने गरिन्छ । गतवर्ष कृषि ज्ञान केन्द्रले विषादी छर्ने बेला लाउने गरी दिएको पोशाक नै किसानसँग मागेर अहिले तरकारी वितरणका बेला लगाउने गरिएको नेमाफुकीले बताए ।

अगुवा कृषक प्रेमनारायण अधिकारीले टोलटोलमा तरकारी पुर्‍याउने कामले किसानले पाउने मूल्य र उपभोक्ताले तिर्नुपर्ने मूल्यबीचको अन्तरलाई कम गर्नुका साथै दुवै पक्षलाई फाइदा पुगेको बताए ।

तरकारी टोलटोलमा पुर्‍याउने कामको नेतृत्व गरेको जिल्ला कृषि सहकारी संघका अध्यक्ष सनिष लागेजूले संकटलाई अवसरको रूपमा लिएर काम गर्नुपर्ने निष्कर्षका साथ उपभोक्ताको हातहातमा तरकारी पुर्‍याउने काममा जुटेको बताए ।

कोरोना भाइरसको संक्रमणको त्रास सर्वत्र भइरहेका बेला अन्य कर्मचारी राख्दा आउन सक्ने समस्या र टिकाटिप्पणीका कारण संस्थाका अध्यक्षदेखि पदाधिकारीहरू आफैँ नै यो काममा खटिएको उनले बताए ।

उनले भने, ‘हामीले पहल गर्नुपर्छ । पहल नगरेर हो । यहाँ सम्भावना छ । हामीले यहाँ समस्यैसमस्या मात्रै देखिरहेका छौँ । समस्यासँगसँगै अवसर पनि छ । किसानले उत्पादन गरेका कुराहरूलाई हामीले बजार खोज्ने हो भने कुनै व्यवसायी वा व्यापारीलाई भन्नुपर्ने अवस्था छैन । यो संकटले हामी नै गर्न सक्छौँ भन्ने शिक्षा दिएको छ ।’

आफ्नै टोलटोलमा ताजा तरकारी पाएपछि उपभोक्ता पनि खुसी देखिएका छन् । भक्तपुरका केही स्थानबाट सुरू गरिएको यो सेवालाई सबैतर्फ र सधै पुर्‍याउने व्यवस्था मिलाउन सक्ने हो भने तरकारीमा रहेको बिचौलियाको बिगबिगी सधैँका लागि अन्त्य हुनुका साथै किसान र उपभोक्ता दुवै लाभान्वित हुनेछन् ।

प्रकाशित मिति: शनिबार, चैत २२, २०७६ १९:१०