सुदूरपश्चिम कोरोना भाइरसको 'रेड जोन' बन्दै, हजारौँको भीडसँगै आएका थिए २ संंक्रमित

सुदूरपश्चिम कोरोना भाइरसको 'रेड जोन' बन्दै, हजारौँको भीडसँगै आएका थिए २ संंक्रमित

A+ A A-

सुदूरपश्चिम प्रदेशमा ४ जनामा कोरोना भाइरसको सङ्क्रमण रहेको पुष्टि भएको छ । शनिबार थप ३ सङ्क्रमित फेला परेसँगै सङ्ख्या ४ पुगेको हो ।

जनसङ्ख्या स्वास्थ्य मन्त्रालयका अनुसार कैलालीका दुई जना र कञ्चनपुरमा एक जनाको थ्रोट स्वाबको रिपोर्ट पोजेटिभ आएको छ ।

भारतको मुम्बईबाट आएका एक कैलालीको लम्की चुहानगरपालिकाका २१ वर्षीय युवकमा पनि कोरोनाको सङ्क्रमण रहेको पुष्टि भएको छ । केही समयअघि मुम्बईबाट आएका उनी क्वारेन्टाईनमा रहेका थिए ।

त्यस्तै, भारतको उत्तर खण्डबाट केही समयअघि फर्केका कञ्चनपुरको बेदकोटका ४१ वर्षीय पुरुषमा पनि कोरोनाको सङ्क्रमण रहेको पाइएको छ । उनी पनि क्वारेन्टाइनमा रहेका थिए ।

कैलालीमा शनिबार भेटिएका दुई जना सङ्क्रमितसँगै सङ्क्रमित हुनेका सङ्ख्या तीन पुगेको छ । कञ्चनपुरमा समेत भेटिएका एक जना सङ्क्रमित सहित सुदूरपश्चिममा सङ्क्रमित हुनेको सङ्ख्या चार पुगेको छ ।

हजारौँको भीडसँग आएका थिए सङ्क्रमित

शनिबार सङ्क्रमण पुष्टि तीन जनामध्ये दुई जना पुरुष भारतबाट आउने क्रममा धनगढी र गड्डाचौकीमा सयौँको भीडमा रहेको खुलेको छ । गौरीफान्टा नाकामा ११ गते बिहान भारतबाट फर्किएकाहरूले नेपाल प्रवेश गर्न पाउनुपर्ने माग गर्दै सरकारविरुद्ध नारा बाजी गरे ।

मन्त्रिपरिषद् बैठकको निर्णयपछि सीमामा रोकिएका ९ सय ९९ जनालाई प्रहरीले २१ वटा बसमार्फत गन्तव्यतर्फ पठायो ।

११ गते साँझ नै लम्की पुगेका उनलाई १२ गते बिहान मात्र लम्की चुहा नगरपालिका वडा नम्बर ९ को प्रतापपुर सरस्वती माध्यमिक विद्यालयको क्वारेन्टाइनमा राखियो । १२ गते बिहान घरबाटै युवकलाई क्वारेन्टाइनमा लगिएको थियो ।

उनीमा शंकास्पद लक्षण देखिन थालेपछि नमुना सङ्कलन गरी परीक्षणका लागि काठमाडौं पठाएकोमा शनिबार रिर्पोट पोजेटिभ आएपछि एम्बुलेन्समार्फत उनलाई सेती प्रादेशिक अस्पताल धनगढी ल्याइएको छ ।

ती युवक गौरीफन्टा नाकामा ९ सय ९९ जनाको बीचमा थिए । तीमध्ये अधिकांश घर फर्किसकेका छन् । न्यूनमा मात्रामा क्वारेन्टाइनमा छन् ।

कञ्चनपुरको बेदकोटमा फेला परेका सङ्क्रमित पनि भारतको उत्तर खण्डबाट चैत १३ गते गड्डाचौकी हुँदै घर पुगेका हुन् । उनी पनि भारतबाट नेपाल भित्रिने सयौँ नेपालीको भीडमा थिए । उनी आएको दिन झन्डै दुई हजार पाँच सय नेपाल गड्डाचौकी नाकाबाट नेपाल प्रवेश गरेका थिए ।

दुवै जना सयौँको सङ्ख्याको भीडमा रहेकोले भीडमा रहेका अरू पनि सङ्क्रमित भएको हुनसक्ने आशङ्का गरिएको छ । भारतबाट आएका केही व्यक्तिहरू सम्बन्धित तहमा बनाईएका क्वारेन्टाइनमा रहे पनि अधिकांश भने घरघरमै छन् ।

पहिलो पटक स्थानीयमा पनि सङ्क्रमण

दुबईबाट दिल्ली, दिल्लीबाट काठमाडौं, काठमाडौंबाट नेपालगन्ज जहाज र नेपालगन्जबाट सार्वजनिक यातायातमा धनगढी पुगेका हसनपुरका युवकमा १५ गते सङ्क्रमण भएको पुष्टि भएको थियो । त्यसयता उनका परिवारका १० जना सदस्य घरकै क्वारेन्टाईनमा थिए ।

परिवारका १० जना सदस्यको थ्रोट स्वाबको नमुना सङ्कलन गरेर काठमाडौं पटाइएकोमा उनकी भाउजूमा सङ्क्रमण रहेको पुष्टि भएको हो ।

बाहिरबाट आएका व्यक्तिबाट स्थानीय व्यक्तिमा पनि सङ्क्रमण सरेको पुष्टि भएपछि धनगढी कोरोना सङ्क्रमणको उच्च जोखिममा छ ।

क्वारेनटाइबाट घर फर्काइको थियो ती महिलालाई

कोरोना भाइरसको सङ्क्रमित कैलालीकी एक महिलालाई लक्षण नदेखिएको भन्दै क्वारेन्टाइनबाट घर फर्काएको थियो ।

स्थानीय सङ्क्रमण देखिएकी ३४ वर्षीया महिला, चौथो सङ्क्रमितका आफन्त हुन् । दुबईबाट नयाँ दिल्ली हुँदै नेपाल आएका धनगढी उपमहानगरपालिका–५ का ३४ वर्षका पुरुषलाई कोरोना सङ्क्रमण भएको रिपोर्ट १४ चैतमा आएको थियो ।

त्यसको भोलिपल्ट परिवारका सबै सदस्यलाई १५ गते धनगढी रङ्गशालामा बनाइएको क्वारेन्टाइनमा ल्याइएको थियो ।

तर, कोरोनाको कुनै लक्षण नदेखिएको भनेर दुई दिनपछि घर पठाइएको पाइएको छ । ‘१५ र १६ गते क्वारेन्टाइनमा बसेर घर फर्किएको जिल्ला प्रहरी कार्यालय कैलालीका प्रवक्ता प्रहरी नायव उपरीक्षक दक्ष बस्नेतले बताए ।

त्यसबेला सङ्क्रमित युवकको परिवारका सबै सदस्यको नमुना सङ्कलन गरिएको थियो । ३४ वर्षीया महिलाबाहेक अरूको रिपोर्ट आउन बाँकी रहेको उपचारमा संलग्न डाक्टर जगदीश जोशीले बताए ।

चिकित्सक के भन्छन्

कोरोनाको सङ्क्रमण फैलिँदै नदिन सङ्क्रमितका परिवारको पनि तत्काल स्वास्थ्य जाँच आवश्यक रहेको सेती प्रादेशिक अस्पतालमामा रहेका कोरोना सङ्क्रमितको उपचारमा रहेका डाक्टर जगदीश जोशी बताए । हालसम्म विदेश र भारतबाट आएकाहरूमा मात्रै सङ्क्रमण देखिए पनि अब भने स्वदेशमै रहेकाहरूमा पनि सङ्क्रमण पुष्टि भइसकेकाले सबैले सचेतना अपनाउनुपर्ने उनले बताए ।

विश्वमा महामारीको रूप लिएको कोरोना भाइरसको सङ्क्रमण सुदूरपश्चिम प्रदेशका ४ जनामा देखिएको छ, उनले भने, ‘भारतबाट आएका २ जनामा पनि सङ्क्रमण पुष्टि भइसक्यो, क्वारेन्टाइन र आइसुलेसनमा रहेका अधिंकासको नमुना परीक्षण गर्न बाँकै नै हुँदा सङ्क्रमितको सङ्ख्या बढ्न सक्ने भएकाले विशेष सजगता अपनाइनुपर्ने बेला आएको छ ।’

हाल सेती प्रादेशिक अस्पतालमा ४ जना सङ्क्रमित र एक जना शङ्कास्पद गरी ५ जना बिरामीको आइसुलेसन कक्षमा उपचार भइरहेको छ । सङ्क्रमितहरूको स्वास्थ्य अवस्था भने सामान्य रहेको डाक्टर जोशीले बताए ।

बिहीबारबाट सेती प्रादेशिक अस्पतालमा नमुना परीक्षण मेसिन जडान गरी परीक्षणको काम भइरहेको छ । हालसम्म धनगढीमै पाँच जनाको नमुना परीक्षण गरिएकोमा सबै नेगेटिभ रिपोट आएका छन् । सेती प्रादेशिक अस्पतालमा जडान भएको मेसिनले दैनिक ६ देखि ८ नमुना परीक्षण गर्न सक्छ । क्रमशः सङ्क्रमितको सङ्ख्या बढ्दै गए जनशक्ति अभावका कारण परीक्षणमै समस्या देखिन सक्ने सेती प्रादेशिक अस्पतालका प्रयोगशाला प्रमुख रमेश शाहीले बताए ।

सेती प्रादेशिक अस्पतालमा मात्रै हाल सम्म ४९ जनाको प्रयोगशाला जाँच गरिएको छ । जसमध्ये ३७ जनाको रिपोट नेगेटिभ र ४ जनाको रिपोट पोजेटिभ आएको छ भने ८ जनाको रिपोट आउन बाँकी छ । विदेश र भारतबाट ठूलो सङ्ख्यामा नेपालीहरू सुदूरपश्चिम प्रदेश प्रवेश गरेका थिए । तीमध्ये न्यूनको मात्रै स्वास्थ्य परीक्षण भएको छ ।

प्रकाशित मिति: शनिबार, चैत २२, २०७६ १८:३५