कोरोना परीक्षण : प्रदेश २ बाट ७३ जनाको नमुना सङ्कलन, २३ नमुनाको 'नेगेटिभ रिजल्ट'

कोरोना परीक्षण : प्रदेश २ बाट ७३ जनाको नमुना सङ्कलन, २३ नमुनाको 'नेगेटिभ रिजल्ट'

A+ A A-

करोना भाइरसको संक्रमणसम्बन्धी परीक्षण गर्नका लागि प्रदेश २ मा हाल सम्म कुल ७३ जनाको नमुना संकलन गरिएको छ ।

अहिलेसम्म कुल ७३ जनाको स्वाब संकलन गरिएकोमा २३ जनाको रिजल्ट नेगेटिभ आएको प्रदेश २ सरकारअन्तर्गत रहेको सामाजिक विकास मन्त्रालयका सचिव डा. राम प्रसाद घिमिरेले बताए ।

‘प्रदेशका आठवटै जिल्लाअन्तर्गत रहेका क्वारेन्टाइन तथा आइसोलेसन सेन्टर बाट कुल ७३ जनाको स्वाब संकलन गरिएको छ,’ सचिव घिमिरेले भने, ‘त्यसमध्ये २३ वटा को परिणाम आएको छ, २३ वटै नेगेटिभ पाइएको छ ।’ काठमाडौंस्थित राष्ट्रिय जनस्वास्थ्य प्रयोगशालामा पठाइएको ती सबै परीक्षणमध्ये ५० वटा नमुनाको परिणाम आउन बाँकी नै रहेको उनले बताए ।

प्रदेश २ मा हालसम्म कुल १ सय २७ वटा क्वारेन्टाईन संचालन गरिएको छ । १२७ क्वारेन्टाइनमा कुल २ हजार ५ सय १ बेड क्षमताको व्यवस्थापन मिलाइएकोमा अहिलेसम्म कुल ७ सय ७१ जना क्वारेन्टाईनमा रहेको घिमिरे बताउँछन् ।

‘त्यसका अतिरिक्त क्वारेन्टाइनमा आएर सम्पर्क गरेर होम क्वारेन्टाइनमा नै बस्ने गरी कुल ९ सय २५ जना घर फर्किएका छन्,’ सचिव घिमिरेले भने, ‘उनीहरूलाई सेल्फ होम क्वारेन्टाइनमा नै बस्न भनिएको छ ।’

प्रदेश २ मा अहिलेसम्म कुल ८१ बेडसहितको आइसोलेसन सेन्टर संचालन गरिएकोमा कुल १४ जना मानिस अहिले आइसोलेसन सेन्टरमा भर्ना भएर उपचार गराइरहेको उनले बताए ।

प्रदेश २ मा नै अब कोरोना भाइरससम्बन्धी परीक्षण गर्नका लागि प्रादेशिक अस्पताल जनकपुरधाममा संचालनमा आएको प्रादेशिक जनस्वास्थ्य प्रयोगशालामा कुल ४ जनाको स्वाब संकलन गरेर परीक्षण गरिएको छ ।

प्रदेशभरिमा आईसोलेसन सेन्टर बढाउनका लागि विभिन्न विद्यालय, भेन्टिलेटर तथा आइसियुसहितको व्यस्थापन भएको निजी अस्पताललाई समेत ब्याक अप प्लानका रुपमा तयारी प्रदेश सरकारले अगाडि बढाएको उनले बताए । प्रदेश स्वास्थ्य निर्देशनालयका अनुसार रौतहटमा ५ सय ३१ बेड संख्याको १६ वटा क्वारेन्टाइन बनाइएको छ । जहाँ १ सय ८२ जनालाई क्वारेन्टाइनमा र ४ जनालाई होम क्वारेन्टाइनमा राखिएको छ भने ९ बेड क्षमताको आईसोलेशन वार्डमा अहिले कुनै शंकास्पद बिरामी नरहेको बताइएको छ ।

त्यस्तै बारामा ३ सय ७९ बेड क्षमताको ११ वटा क्वारेन्टाइनमा अहिलेसम्म ४० जनालाई राखिएको छ । बारा जिल्लास्थित कलैया अस्पतालमा निर्माण गरिएको २० वटा आईसोलेशन बेडमा अहिले ५ जना कोरोनाका शंकास्पद बिरामीलाई राखिएको झाले जानकारी दिए । बारामा अहिले १६ जना होम क्वारेन्टाइनमा रहेका छन् ।

पर्सामा १ सय ७१ बेड क्षमताको ७ वटा क्वारेन्टाइन बनाइएको छ । त्यहाँ २१ जना क्वारेन्टाइनमा र ४ जना होम क्वारेन्टाइनमा रहेका छन् । पर्साको वीरगञ्जस्थित नारायणी अस्पतालमा बनाइएको ८ बेडको आईसोलेशन वार्डमा अहिले ४ जना शंकास्पद बिरामीलाई राखिएको छ ।

सप्तरीमा ४ सय ९५ बेड क्षमताको २९ वटा क्वारेन्टाइनमा अहिले २ सय २३ जनालाई निगरानीमा राखिएको छ । राजविराजस्थित गजेन्द्र नारायण सिंह सगरमाथा अस्पतालमा रहेको ९ वटा आईसोलेशन वार्डमा अहिले कुनै शंकास्पद बिरामी नरहेको उनले बताए ।

सिरहामा १ सय ३८ बेड क्षमताको १९ वटा क्वारेन्टाइनमा अहिले १ सय ४१ जना र होम क्वारेन्टाइनमा ७२ जना रहेका छन् । त्यस जिल्लामा १३ बेडको आईसोलेशन रहेकोमा त्यहाँ अहिलेसम्म कुनै पनि शंकास्पद बिरामीलाई राखिएको छैन् । धनुषामा ३ सय २६ बेड क्षमताको १६ वटा क्वारेन्टाइनमा अहिले ७४ जनालाई राखिएको छ । यस जिल्लामा अहिले २० जनालाई होम क्वारेन्टाइनमा पठाइएको उनले बताए । धनुषामा १२ वटा आइशोलेसन रहेकोमा ५ जना शंकास्पद बिरामीलाई आईसोलेशनमा राखिएको छ ।

त्यस्तै, महोत्तरीमा २ सय २५ बेड क्षमताको १२ वटा क्वारेन्टाइन बनाइएको छ । त्यहाँ अहिलेसम्म ४ सय ४९ जनालाई होम क्वारेन्टाइनमा पठाइएको छ भने क्वारेन्टाइनमा ३७ जनालाई राखिएको छ । महोत्तरीमा ८ वटा आईसोलेशन वार्ड निर्माण गरिएपनि अहिले ति आईसोलेशनमा कुनै पनि शंकास्पद बिरामी नआएको उनले बताए ।

सर्लाही जिल्लामा २ सय ४६ बेड क्षमताको १७ वटा क्वारेन्टाइनमा अहिले ५३ जना रहेका छन् भने ३२ जनालाई होम क्वारेन्टाइनमा पठाइएको उनले बताए । दुईवटा आईसोलेशन वार्ड निर्माण गरिएपनि अहिले ती आईसोलेशनमा कुनैपनि शंकास्पद बिरामी आएका छैनन् ।

यता सप्तरीको राजविराजस्थित गजेन्द्र नारायण सिंह सगरमाथा अस्पतालको आइसोलेशनमा रहेका ९ जनाको थ्रोट स्वाब परीक्षणका लागि सुनसरीको धरानस्थित बिपी कोइराला स्वास्थ्य विज्ञान प्रतिष्ठानमा पठाइएकोमा सबैको रिजल्ट निगेटिभ आएको निर्देशनालयले जनाएको छ ।

प्रकाशित मिति: शनिबार, चैत २२, २०७६ १८:१९