राहत वितरणका नाममा तस्वीर आतंक

A+ A A-

कोरोना भाइरस नियन्त्रण तथा रोकथामको प्रयासमा मुलुक १० दिनयता लकडाउनमा छ । लकडाउनका कारण आर्थिक रूपमा विपन्न नागरिक र दिनभर काम गरेर छाक टार्ने वर्गको अवस्था टिठ लाग्दो बनेको छ ।

यस्तोमा अति विपन्न र दैनिक ज्यालादारी मजदूरलाई राहत वितरण गर्ने कार्य पनि ठाउँ–ठाउँमा भइरहेको छ । तर, यसरी राहत वितरण गर्दा भइरहेका हर्कत भने बिर्सनलायक देखिन्छ ।

राहत दिँदा सरकारी कर्मचारी, जनप्रतिनिधि वा राजनीतिक दलका नेताले पोज पोजका फोटो लिएर फेसबुकमा पोस्ट गर्ने परिपाटी हास्यास्पद मात्र छैन, मानवीय संवदनाको विरुद्ध पनि छ ।

यति मात्र होइन, ‘सोसल डिस्टेन्सिङ’ बनाएर कोरोना रोकथाम गर्नका लागि सरकारले लकडाउन गरेको हो । तर, कतिपय जनप्रतिनिधि र कर्मचारीले यो कुरा नबुझेको उनीहरूका गतिविधिले प्रस्ट पार्छ ।

कतिपयले त मास्क नै नलगाइ राहत वितरण गर्दै गरेको तस्वीर पनि आफ्नै फेसबुक अकाउन्टमा पोस्ट गर्ने गरेका छन् ।

केही तस्वीर हेरौँ :माथि राखिएको तस्वीर बाग्लुङको काठेखोला गाउँपालिका वडा नम्बर १ मा राहत वितरण गर्दाको हो । १५ परिवारलाई राहत वितरण गर्दा यसरी पोज दिएको फोटो खिचेर फेसबुकमा राखिएको छ ।यो दोस्रो तस्वीर रौतहटको गौर नगरपालिकाको हो । नगरप्रमुख अजय गुप्तासहितका जनप्रतिनिधि र कर्मचारी तस्वीरकै लागि बोरा समाएर बसेका देखिन्छन् । यहाँ सोसल डिस्टेन्सिङको ख्याल गरिएको छैन ।तेस्रो तस्वीर रुपन्देहीको कञ्चन गाउँपालिकाको हो । तस्वीरमा गाउँपालिका अध्यक्ष गोकर्णबहादुर क्षेत्री राहत वितरण गर्दा पोज दिएर फोटो खिचाइरहेका देख्न सकिन्छ ।
चौथो तस्वीर चितवनको भरतपुर महानगरपालिकाको हो । वडामा राहत वितरण गर्दैगर्दा मेयर रेणु दाहालसहितका जनप्रतिनिधि र कर्मचारीले विपन्न परिवारका व्यक्तिलाई हातमा नुन, तेलको प्याकेट र चामलको बोरा बोकाएर तस्वीर खिचाएका छन् । र, सामाजिक सञ्जालमा पोस्ट गरेका छन् ।माथिको तस्वीर सामाजिक सञ्जालमा भेटिएको हो । तस्वीरमा देखिएका ११ मध्ये ७ जनाले मास्क लगाएका छन् । यसको अर्थ यो लकडाउन अवधिभित्रकै तस्वीर रहेको अनुमान लगाउन सकिन्छ ।

जनप्रतिनिधि वा सामाजिक संघसंस्थाका प्रतिनिधिले नै यसरी राहत वितरण गरेको हुनुपर्छ ।
धेरै कुरा त तस्वीरले नै बोलेको छ । यो तस्वीरमा न ‘सोसल डिस्टेन्सिङ’ कायम छ न त मानवीय संवेदनाको ख्याल गरिएको छ ।

एक व्यक्तिलाई चामल दिनका लागि ११ जनाले नै पोज दिएका छन् ।

यी त प्रतिनिधि घटना मात्र हुन् । देशका धेरै ठाउँमा गरिबलाई राहत दिँदा यसरी पोजसहित फोटो खिचाउने चलन बढ्दो छ । यसरी तस्वीर फेसबुकमा राखेर वाहवाही कमाउने कतिपयको चाहना हुन्छ भने कतिपयले चाहिँ अर्को चुनावमा भोट बढाउन यसो गरिरहेको बुझ्न सकिन्छ ।

सामाजिक सेवाको भावले राहत वितरण गरेकाहरूले शायदै यसरी पोज दिएर तस्वीर खिचाउँछन् । रेकर्डका लागि खिचाए पनि फेसबुकमा शायदै पोस्ट गर्छन् ।

इन्डोनेसियामा विपन्नलाई राहत वितरण गर्दा एउटा ठाउँमा राहत राखिएको हुन्छ, एक व्यक्तिले उक्त राहत लिएर गइसकेपछि अर्का व्यक्ति गएर आफ्नो भागको राहत लिएर जान्छन् ।

हाम्रैजस्तो अन्य विकासोन्मुख मुलुकमा पनि राहत वितरण गर्दा ‘चटक’ देखाइएको पाइँदैन ।

तर, हामीकहाँ त राहत लिनेको असहमतिका बाबजुद तस्वीर खिचाउने गरिएको पाइन्छ । कतै बच्चा बोकेर राहत लिन गएका महिलालाई बोरा बोकाएर फोटो खिचाइएको छ त कतै ज्येष्ठ नागरिकलाई ।

के यो मानवीय संवेदन विपरीतको कार्य होइन ?

प्रकाशित मिति: शनिबार, चैत २२, २०७६ १६:१९