लुकिछिपी भारतबाट नेपाल प्रवेश गर्ने बढेपछि सीमावर्ती क्षेत्रका वासिन्दा त्रसित

लुकिछिपी भारतबाट नेपाल प्रवेश गर्ने बढेपछि सीमावर्ती क्षेत्रका वासिन्दा त्रसित

A+ A A-

छिमेकी मुलुक भारतमा कोरोना भाइरस (कोभिड–१९)का कारण ज्यान गुमाउनेको संख्या बढ्दै जान थालेपछि सीमा क्षेत्रमा बसोबास गर्ने नेपाली त्रसित भएका छन् ।

अझ खुल्ला सीमानाको फाइदा उठाउँदै दैनिक ठूलोे संख्यामा भारतबाट नेपाल प्रवेश गर्न थालेपछि मोरङका सीमावर्ती क्षेत्रमा बसोबास गर्ने स्थानीय त्रसित भएका हुन् । यतिबेला सडकमा अत्यावश्यक बाहेकका सवारीसाधन देखिँदैनन् भने हिँड्डुल गर्ने सर्वसाधारणसमेत संख्या पनि पातलिँदै गएको छ ।

मोरङको मझारे, डुमरीया, नोचा, तरिगामा लगायतका नाकामा पनि दिउँसो बाटो सुनसान देखिन्छ । तर, भारतका विभिन्न ठाउँबाट आएका नेपाली प्रहरीलाई छल्दै यिनै नाकामा रहेका मकैबारी हुँदै दिनहुँ सयौंको संख्यामा नेपाल प्रवेश गरिरहेका गुनासो आएको छ ।

भारतबाट आएकाहरुको नेपाल प्रवेशले सीमा क्षेत्रमा बस्ने सबै नागरिकहरु कोरोना भाइरसको संक्रमण हुने हो कि भनेर त्रसित छन् । सीमा नजिक रहेको मकैखेतीबाट लुक्दै दैनिक सयौँको संख्यामा मानिसहरु आउने गरेको जहदा गाउँपालिका–४ स्थित सार्वजनिक माध्यमिक विद्यालयका शिक्षक अजय सिहंले बताए ।

‘भारतमा दिनदिनै कोरोनाका बिरामी बढ्न थालेपछि नेपाल प्रवेश गर्ने ठूला नाकामा बाक्लो सुरक्षाकर्मी तैनाथ छन् । तर, साना नाकाहरुमा आवश्यकता अनुसार सुरक्षाकर्मी परिचालन हुन नसक्दा लुकिछिपी नेपाल आउनेको संख्या बढ्दै गएको छ ।’ उनले भने, ‘मकैबारी बारीमा लुकेर ठूलो संख्यामा मान्छे नेपाल प्रवेश गरिरहेका छन् ।’

बुधनगर, नोचा, तरिगमा लगायतका सीमा नाकामा मकैखेती रहेकाले भारतबाट आउनेहरुलाई सहज भएको उनले बताए । खुल्ला नाकाहरुबाट लुकीछिपी नेपाल आउने भएकाले थप सुरक्षाकर्मीहरुको आवश्यकता रहेको उनको भनाइ छ ।

मोरङमा मात्रै भारतसँग ६३ किलोमिटर सीमा जोडिएको छ । मुख्य नाकामा सुरक्षाकर्मीको उपस्थिति भए पनि भित्री नाकाहरुमा नहुँदा भारतबाट नेपाल प्रवेश गरिरहेका छन् । सरकारले कोरोना भाइरसको संक्रमण फैलिन नदिन भारतसँगको सबै सीमा बन्द गर्नुका साथै मुलुकलाई लकडाउन गरेको छ ।

सीमा क्षेत्रबाट नेपाल प्रवेश गर्ने क्रम नरोकिएपछि स्थानीय चिन्तित बनेका छन् । कोराना संक्रमितले छोएका वस्तुबाट समेत कोरोना सर्छ भन्ने थाहा पाएका उनीहरु यतिबेला त्रसित बनेका छन् । यसरी प्रवेश गर्नेहरुलाई रोक्न स्थानीय आफैं सक्रिय हुन थालेका छन् ।

सुरक्षाकर्मीहरुसँग सहकार्य गरेर निगरानी बढाएको जहदा–५ का स्थानीय युवा नितेश साहले बताए । ‘भारतमा संक्रमित भएर एक जना मात्र नेपाल छिरे सिंगो गाउँनै जोखिममा हुन्छ । हामी बोर्डर छेउमा बसेका सबै अहिले एकदमै त्रासमा छौँ ।’ उनले भने, ‘भारतबाट नेपाल छिर्न नदिन हामी सुरक्षाकर्मीहरुसँगै मिलेर निगरानी थालेका छौँ ।’

भारतका विभिन्न शहरमा काम गरेर स्वदेश फर्किने मात्रै होइन सामान ओसार्नेको पनि आवतजावत हुने गरेको उनीहरुले दावी गरेका छन् । उनीहरुले रातीको समयमा बढी आवतजावत गर्ने गरेको नोचाका स्थानीय कैलाश मण्डलले बताए ।

मझारे, डुमरिया, नोचा, तरिगमालगायतका खुला सीमा नाकाहरुबाट दैनिक जसो लुकिछिपी प्रवेश गर्दा कोरोना भाइरसको संक्रमण फैलिन सक्ने जोखिम बढेको छ । खुल्ला सीमा नाकामा लुकीछिपी भइरहेको प्रवेशलाई रोक्न सम्बन्धित निकायको ध्यान पुग्नुपर्ने सीमा क्षेत्रमा बसोबास गर्नेहरुले बताएका छन् ।

प्रकाशित मिति: शनिबार, चैत २२, २०७६ १५:००