कोरोना भाइरस संक्रमणको दोस्रो चरणमा नेपाल, सावधान ! चाैथाेमा नपुगाेस्

A+ A A-

नेपालमा थप तीन जनामा कोरोना संक्रमण देखिएको छ । शनिबार स्वास्थ्य तथा जनसंख्या मन्त्रालयको आधिकारिक फेसबुक पेजबाट नेपालमा थप तीन जनामा कोरोना भाइरस संक्रमण देखिएको पुष्टि गरेको हो ।

नेपालमा कोरोना भाइरस संक्रमणको पहिलो केस ९ माघमा भेटियो । चीनबाट फर्किएका एक नेपाली विद्यार्थीमा कोरोना भाइरसको संक्रमण देखिएको थियो । उपचारपछि उनी संक्रमणमुक्त भएर घर फर्किसकेका छन् ।

त्यसपछि, १० चैत गते फ्रान्सबाट कतारको दोहा हुँदै एयरवेजको ‘क्यूआर ६५२’ विमानबाट ४ चैतमा नेपाल आएकी १९ वर्षीया किशोरीमा संक्रमण भेटियो ।

त्यसको दुई दिनपछि अर्थात् १२ चैतमा युएईबाट एयर अरेबियाको विमानबाट ६ चैतमा नेपाल आएका धादिङका ३२ वर्षीय युवकमा पनि कोरोना भाइरसको संक्रमण पुष्टि भयो ।

चौथो संक्रमित युएईबाट फर्किएका ३४ वर्षीय युवकमा १४ चैत्रमा पत्ता लागेको थियो। उनी दुबईबाट भारतको दिल्ली हुँदै नेपाल आएका थिए ।

पाँच केसका रूपमा चैत १५ गते बेल्जियमबाट ४ चैतमा नै कतार एयरवेजको ‘क्यूआर ६५२’ विमानबाटै नेपाल आएकी बागलुङकी एक युवतीमा कोरोना भाइरस संक्रमण पुष्टि भयो ।

त्यसपछि चैत २० मा कोरोना भाइरस छैटौं संक्रमित भेटिइन् । उनी पनि कतार एयरवेजको जहाजबाट गत चैत ४ मा दोहाबाट काठमाडौं आएकी बागलुङकी ६५ वर्षीया महिला थिइन् । उनी पनि चैत ४ मा बेल्जियमबाट कतार हुँदै नेपाल आएकी थिइन् । कतार एयरवेजको क्युआर ६५२ नम्बरको उडानबाट काठमाडौं आएका तीन यात्रुमा कोरोना संक्रमण देखिएको छ ।

त्यसैगरी, चैत २२ गते (आज) कोरोना भाइरस संक्रमण पुष्टि भएका मुम्बइबाट फर्किएका कैलालीका २१ वर्षीय पुरूष, उत्तराखण्डबाट फर्किएका कञ्चनपुरका ४१ वर्षीय पुरूष, कैलालीकै ३४ वर्षीय महिलामा हुन् ।

नेपालमा अहिलेसम्म कोरोना भाइरसका संक्रमित भेटिएका मध्ये आजको एउटा केस भने फरक छ । यसअघि कैलालीमा संक्रमित भेटिएका पुरुषकी भाउजूमा कोरोना संक्रमण देखिएको हो । यो केसले पहिलोपटक नेपालभित्रै अर्को व्यक्तिमा कोरोना संक्रमण सरेको पुष्टि गर्छ । यसअघि भने नेपालमा देखिएका केस विदेशबाट आएका व्यक्ति मात्रै थिए ।

विदेशबाट आएका व्यक्तिबाट नेपालमै रहेका व्यक्तिमा सर्नुलाई स्वास्थ्य मन्त्रालयले कोरोना भाइरस संक्रमण दोस्रो चरण मान्छ । कोरोना संक्रमणले चार वटा चरणमा पुगेर महामारीको रूप लिने बताएको छ । पहिलो चरण आयातीत संक्रमण हो । जसमा संक्रमण फैलिएका मुलुकमा भ्रमण गरेका मानिसबाट मुलुकमा भाइरस मुलुकमा भित्रिनुलाई मानिन्छ ।

दोस्रो चरणमा स्थानीय रूपमा संक्रमण फैलिनुलाई मानिन्छ । दोस्रो चरणमा बाहिरबाट आएका मानिसमा देखिएको संक्रमण स्थानीय मानिसमा सर्न थाल्छ । अहिले नेपालमा दुबईबाट आएका संक्रमितबाट आफन्तमा सरेको छ । यसलाई कोरोना संक्रमणको दोस्रो चरण मानिन्छ ।

तेस्रो चरणमा सामुदायिक रूपमा संक्रमण फैलिनुलाई लिइन्छ । यो चरणमा संक्रमित वा विदेशबाट आएका मानिससँग नभेटेकाहरूमा पनि संक्रमण हुन थाल्छ । संक्रमितबाट नेपालमै भएको अर्को व्यक्तिमा सर्दै लोकल वा कम्युनिटी ट्रान्समिसन हुन्छ ।

चौथो चरण भनेको महामारीको रूप हो । कोरोना भाइरस संक्रमणको अन्तिम र सबैभन्दा खराब अवस्था हो । यो अवस्थामा पुगिसकेपछि भाइरसको प्रकोप न्यूनीकरण र रोकथामा निकै कठिन हुन्छ । ठूलो धनजनको क्षति हुन्छ ।

इटालीमा पनि यसैगरी कोरोना व्यक्तिबाट समुदायमा फैलिएपछि महामारीको रूप लिएको थियो । विश्‍व स्वास्थ्य संगठनले पनि समुदायमा संक्रमण फैलिनुलाई सबैभन्दा जोखिम मानेको छ ।

प्रकाशित मिति: शनिबार, चैत २२, २०७६ १४:४१