यी वडाध्यक्ष, जो आफैँ मास्क बनाएर बाँड्छन्

A+ A A-

लकडाउनका बेला सबै घरमा बस्न चाहन्छन् । सरकारले पनि बाहिर निस्कन रोक लगाएको छ तर जनकपुरधामका एक वडाध्यक्षलाई लकडाउनको पर्वाह छैन । उनले घरघरमा गएर कोभिड- १९ विरुद्ध सचेतना अभियान चलाइरहेका छन् ।

जनकपुरधाम- ३ का वडाध्यक्ष दीपेन्द्र साह बिहानै झोलामा मास्क र केही स्यानिटाइजर लिएर घरदैलोमा निस्किहाल्छन् । अहिलेसम्म सयौँ मास्क वितरण गरिसकेका छन् उाले । जोसँग स्यानिटाइजर छ, उसलाई कसरी त्यो लगाउने, जो सँग छैन, उसलाई साबुन-पानीले हात कसरी सफा गर्ने, त्यसको जानकारी दिने गर्छन् । व्यक्ति-व्यक्तिसँग उनी भेट गरिरहेका छन् ।

यो रोग कति सम्वेदनशील छ, धेरैलाई थाहा छैन , उनले भने, औषधि नबनेकाले जनचेतनाबाट मात्र नेपाली जनतालाई बचाउन सकिन्छ ।

यस बेला धेरै घरमै बस्छन् तर सामाजिक दूरी कायम भइरहेको छैन । मूल सडकमा सुरक्षाकर्मीका कारण कोही आउँदैनन् तर टोल महल्लामा महिलाहरू एकअर्काको घरमा गइरहेका छन् ।

एक ठाउँमा दर्जनौँ घरका महिला कुराकानी गरिरहेका हुन्छन् । पुरुषहरूले पनि यसलाई बिदाकै रूपमा लिएको देखिन्छ । कति पुरुष तास, जुवामा पनि अहिले लागेका देखिन्छ । हामी त्यहाँ पुगेर यस्तो नगर्न आग्रह गर्छौं , वडाध्यक्ष साहले भने ।

यसको प्रभाव पनि निकै परेको नेपाल उद्योग वाणिज्य महासंघ प्रदेश २ का अध्यक्ष शिवशंकर साह हीराले बताए । गरिब र निरक्षर जनता जनप्रतिनिधिका कुरो धेरै बुझ्छन् राम्रो ढंगले सम्झायो भने त्यसको निकै असर पर्ने गर्छ , हीराले वडाध्यक्षको कामको सराहना गर्नै पर्ने बताए ।

विना तामझाम, आफ्नो ज्यान जोखिममा राखेर कसैले राम्रो काम गर्छन् भने त्यसको प्रशंसा गर्नै पर्ने उनको भनाइ छ । वडाध्यक्ष साह कपडा किनेर मास्क बनाउँछन् र बाँड्ने गर्छन । सुरुमा मास्क नै किनेर बाँडने गरे पनि यो त्यो महँगो भएकाले अहिले कपडा किनेर मास्क बनाउँदा धेरै सस्तो परिरहेको उनले बताए । सबै मास्क अहिले निजी लगानीमा बाँडिरहेका छन् उनले ।

आवश्यकता परमा भने साथीभाइसँग मास्कको सहयोग पनि लिनेछु तर अहिले आफँै बाँडिरहेको छु , वडाध्यक्ष साहले भने ।

स्थानीयवासी यसो भन्छन्

वडाध्यक्ष दीपेन्द्रको अहिले जनकपुरधाममा निकै चर्चा रहेको छ । दीपेन्द्रको अभियानबाट गरिब दलितहरू धेरै लाभान्वित भइरहेका छन् ।

धेरै खर्च छैन, सयौँ व्यक्तिलाई खुवाउनमा खर्च गरिरहनुभएको छैन तर उहाँले जुन काम गरिरहनुभएको छ, जताततै प्रशंसा भइरहेको छ , जनकपुरधाम- ३ की दलित महिला सुनिता दास भन्छिन्, मलाई त मास्क लगाउन पनि आउँदैनथ्यो, वडाध्यक्षले नै सिकाउनुभयो ।

अर्की महिला खेहरी भन्छिन्, कोरोना यति ठूलो रोग हो भन्ने थाहै थिएन । वडाध्यक्षले भनेपछि टोल महल्लामा घुम्नै छोडिदिएकी छु । पहिला खेहरी दिनभर सडकमै बस्थिन् । ३-४ जना महिलासँग कुरा गरेर दिन काट्नु नै उनको दिनचर्या थियो ।

दीपेन्द्रलाई देखेर जनकपुरधामका अरू वडाध्यक्षहरू पनि यस्ता अभियानमा सक्रियता देखाउन थालेका छन् । राम्रो कार्यको सबैले अनुसरण गर्नुपर्छ , नेपाल उद्योग वाणिज्य महासंघ प्रदेश २ का अध्यक्ष साहले भने, गरिबका लागि धनी व्यक्तिले, वडाका लागि जनप्रतिनिधिले, समाजका लागि समाजसेवीले केही गर्न चाहेको छ भने यही मौका हो । यस्तो मौका फेरि आउँदैन । ७ पुस्ताले वाहवाही लिनेछ ।

भ्रष्टाचारविरुद्ध अभियन्ता

वडाध्यक्ष दीपेन्द्र भ्रष्टाचारविरुद्ध अभियान्ता पनि हुन् । जनकपुरधामको प्रसिद्ध जानकी मन्दिरको जग्गा सडकलाई दिइएको विरोधमन पहिलोचोटि उनले बोलेका थिए । केही व्यक्तिको करोडौँ रुपैयाँका जग्गा बचाउन पैसाको लेनदेन गरी जानकी मन्दिरको जग्गा कब्जा गरिएको उनले बताएपछि अख्तियारलगायतका निकाय सक्रिय भएका छन् ।

उनले जनकपुरधाम उपमहानगरपालिकाका मेयर लालकिशोर साहमाथि नै पैसा खाएको खुला आरोप लगाएका थिए । ८५ लाख रुपैयाँ भने केही महिनासम्म फेसबुकमा ट्रेन्ड भएको थियो ।

यसका अतिरिक्त नगरपालिकाका अन्य भ्रष्टाचार मुद्दा उठाउने व्यक्तिको रूपमा उनलाई चिनिन्छ ।

२०३८ कातिक १० गते जन्मिएका दीपेन्द्र केही वर्ष वैदेशिक रोजगारीमा गएका थिए । सामाजिक क्षेत्रमा पनि उनी निकै सक्रिय छन् ।

प्रकाशित मिति: शनिबार, चैत २२, २०७६ १४:५०