सबै मिलेर सङ्कटको सामना गर्नुपर्छ : अर्थमन्त्री डा. खतिवडा

A+ A A-

अर्थ एवं सञ्चार तथा सूचना प्रविधिमन्त्री डा. युवराज खतिवडाले कोरोना रोगको संक्रमण रोकथाम सरकारको मात्र नभई सबैको साझा दायित्व भएको बताएका छन् ।

कोरोना रोगको संक्रमण रोकथाम गर्न चालेका कदमले अर्थतन्त्रमा पारेको प्रभाव तथा आगामी दिनमा चाल्नुपर्ने कदम सम्बन्धमा राष्ट्रिय योजना आयोगका पूर्व उपाध्यक्ष र स्वास्थ्य विज्ञसँग शुक्रबार भएको छलफलमा अर्थमन्त्री डा. खतिवडाले सबै मिलेर संकटको समाना गर्नुपर्ने बताएका हुन् ।

‘राष्ट्रिय सोच र दृष्टिकोणलाई एकताबद्ध गर्दै संघीय सरकारले सबै राजनीतिक दल, सबै तहका सरकार र निजी क्षेत्रसँग छलफल र समन्वय गरी कोरोनाको सक्रमण रोकथाम तथा लक्षित वर्गसम्म राहत पुर्‍याउने कामलाई प्राथमिकतामा राखेको छौँ मन्त्री डा. खतिवडाले भने, यसमा जनाताको पनि साथ हुनुपर्‍यो।’.

सरकारले समयमा नै चालेको कदमहरूबाट संक्रमण नियन्त्रणमै रहेको बताउँदै यसलाई अन्तर्राष्ट्रिय क्षेत्रबाट पनि सराह्ना गरिएको बताए ।

मन्त्री डा. खतिवडाले संघीय संरचनाअनुरूप जनप्रतिनिधिको उपस्थितिले कोरोना जोखिम न्यूनीकरणमा थप सहज भएको उल्लेख गदै स्थानीय तहलाई संक्रमण रोकथाम र राहत वितरणमा जिम्मेवार र सक्रिय रुपमा परिचालित गराइएको बताए ।

अन्तर्राष्ट्रिय सीमा नाकाबाट थप जोखिम हुन नदिन सीमा बन्द गरिएको जानकारी दिँदै नेपालमा भएका विदेशी नागरिकलाई नेपालले सुरक्षा दिने बताए ।

मन्त्री डा. खतिवडाले विश्वभर मानव जातिको सुरक्षा पहिलो प्राथमिकता भएकाले सबै पक्षले विनास्वार्थ कोरोना न्यूनीकरण तथा रोकथाममा लाग्नुपर्ने बताएका छन् । कोरोना संक्रमण पछि अर्थतन्त्रलाई चलायमान बनाउन राष्ट्रिय योजना आयोगका उपाध्यक्षको अध्यक्षतामा प्राविधिक विज्ञसमेत संलग्न गरी अध्ययन समिति गठन गरिने समेत डा खतिवडाको भनाइ छ ।

प्रकाशित मिति: शुक्रबार, चैत २१, २०७६ १७:२१