जब कोरोना संक्रमित बोक्न हिँडेको एम्बुलेन्सका चालक हराए ...

A+ A A-

बिहीबार साँझ नेपालमा छैटौँ कोरोना भाइरस सङ्क्रमित भएको खबरले अनलाइन मिडियाहरू भरिएका थिए ।

साँझ ६:३० बजे काठमाडौंस्थित राष्ट्रिय प्रयोगशाला टेकुले आधिकारीक रूपमा बागलुङकी एक ६५ वर्षीया वृद्धा कोरोना भाइरसबाट सङ्क्रमित भएको पुष्टि गरेपछि जिल्ला स्वास्थ्य कार्यालय बागलुङ र धौलागिरी अञ्चल अस्पतालको स्वास्थ्यकर्मी घरमै क्वारेन्टाइनमा बस्दै आएकी ती वृद्धालाई अस्पताल ल्याउने तयारीमा जुट्यो ।

जिल्ला विपद् व्यवस्थापन समितिको १६ चैतमा भएको निर्णयानुसार नेपाल रेडक्रस सोसाइटी बागलुङ शाखाको एम्बुलेन्स कोरोनाका भाइरसका बिरामी बोक्नका लागि तयारी अवस्थामा राखिएको थियो ।

कोरोना सङ्क्रमित ती वृद्धाको घर बागलुङ बजारनजिकै भएका कारण अस्पताल ल्याउनमा कुनै समस्या थिएन । तयारी अवस्थामा रहेको नेपाल रेडक्रस सोसाइटीको एम्बुलेन्सलाई धौलागिरी अञ्चल अस्पतालमा बोलाइयो ।

स्वास्थ्य कार्यालयका प्रमुख सुरज गुरौं र धौलागिरी अञ्चल अस्पतालका निमित्त मेडिकल सुपरिटेन्डेण्ट डा. शैलेन्द्र बी. पोख्रेलको नेतृत्वले कोरोना भाइरसबाट सङ्क्रमित बिरामी ल्याउन जानुपर्ने बताएपछि एम्बुलेन्स चालकले रेडक्रसले नियुक्तिपत्र नदिएको भन्दै आनाकानी गर्न थाले ।

अस्पताल तथा स्वास्थ्य कार्यालयले यस्तो सङ्कटको घडीमा सुरक्षा सामग्री लगाएर सङ्क्रमित बिरामी अस्पताल ल्याउनुपर्ने भने पनि चालकले आलटाल गर्दै एम्बुलेन्स छोडेर भागेको स्वास्थ्य कार्यालयका प्रमुख सुरज गुरौंले जानकारी दिए ।

हामीले तयारी अवस्थामा राखेको एम्बुलेन्स चालकलाई सुरक्षित तरिकाले सङ्क्रमित ल्याउन आग्रह गर्‍यौँ , उनले भने, हामीले अन्य तयारी गरिरहेको समयमा चालक नै एम्बुलेन्स छोडेर फरार भए ।

एम्बुलेन्स छोडेर चालक भागेपछि स्वास्थ्य कार्यालयको चालक र प्रमुख गुरौंले सोही एम्बुलेन्समा राखेर सङ्क्रमित ती वृद्धालाई धौलागिरी अञ्चल अस्पताल ल्याइएको धौलागिरी अञ्चल अस्पतालका निमित्त मेडिकल सुपरिटेन्डेण्ट डा. पोखरेलले जानकारी दिए ।

चालकको गैरजिम्मेवारीपनका कारण बिरामीलाई अस्पताल ल्याउन २ घण्टा ढिलोसमेत भएको थियो । प्रमुख गुरौंका अनुसार एम्बुलेन्स चालकलाई सुरक्षित राख्नका लागि एम्बुलेन्सलाई २ भागमा विभाजन गरेको र पीपीई लगाएर मात्र बिरामी ल्याउन आग्रह गर्दा पनि एम्बुलेन्स अस्पतालमै छोडेर चालक भागेका थिए ।

एम्बुलेन्स चालकले असुरक्षा तथा नियुक्तिपत्र नभएको भन्दै भागेपछि पीपीई लगाएर सङ्क्रमित बिरामी बोक्न कुनै समस्या नहुने भन्ने सन्देश दिनका लागि आफू र आफ्नो चालक बिरामी लिन सङ्क्रमितको घरमै पुगेको गुरौंको भनाइ छ ।

चालकले पीपीई लगाएर सङ्क्रमित बिरामी बोक्न कुनै समस्या नहुने डा. पोखरेलको भनाइ छ । अस्पतालमा निकै कम जनशक्तिमा पनि रातदिन उपचारमा खटिएका छौं , उनले भने, सुरक्षा सामग्री लगाएर बिरामी बोक्दा चालकलाई केही हुँदैन ।

धौलागिरी अञ्चल अस्पतालमा ती वृद्धासहित कोरोना भाइरसबाट सङ्क्रमित २ जनाको उपचार भइरहेको अस्पतालले जनाएको छ । एम्बुलेन्स चालक बिरामी भएका कारण अर्को चालकलाई अस्थायी रूपमा काममा लगाइएकाले बिरामी बोक्न अस्वीकार गरेको हुन सक्ने नेपाल रेडक्रस सोसाइटी जिल्ला शाखा बागलुङका सभापति जब्बरबहादुर लामिछानेले जानकारी दिए ।

लामिछानेले आफूले चालकलाई सुरक्षा सामग्री तथा तालिमको व्यवस्था गर्न आग्रह गरे पनि सम्बन्धित निकायले बेवास्ता गरेको आरोप लगाए ।

सङ्कटको घडीमा चालकले सुरक्षा सामग्रीसहित एम्बुलेन्स सञ्चालन नगरी भाग्दा नेपाल रेडक्रस सोसाइटीको एम्बुलेन्स थन्किने अवस्थामा पुगेको छ । तयारी अवस्थाको एम्बुलेन्स थन्किदा अन्य कोरोना भाइरसका सङ्क्रमित फेला परेमा अस्पताल ल्याउन झनै समस्या हुने बताइएको छ । रासस

प्रकाशित मिति: शुक्रबार, चैत २१, २०७६ १४:२५