दिल्लीको धार्मिक सभामा सहभागी नभेटिएपछि चिन्तामा प्रदेश सरकार

A+ A A-

भारतको नयाँ दिल्लीको निजामुद्दीन मस्जिदमा भएको धार्मिक भेलामा (मरकज) सहभागी भएर फर्केकाहरू प्रदेश–२ मा चिन्ताको कारण बनेका छन् । एक साता यता उनीहरू दिल्लीबाट कतिको संख्यामा आए भनेर सुरक्षा अधिकारीहरूले समेत पत्ता लगाउन नसक्दा कोरोना संक्रमणको जोखिमसमेत बढेकाे छ ।

सप्तरीका प्रहरी उपरीक्षक कृष्ण प्रसाइले मुस्लिम टोलहरूमा गएर दिल्लीबाट फर्केकालाई सम्पर्कमा आउन पटकपटक आग्रह गरिरहेको बताए । साथै, उनीहरूको खोजी तीव्र पारिएको पनि उनले बताए ।

सप्तरीमा ७ जनाको नमूना संकलन

दिल्लीबाट आएका मध्ये सप्तरीमा भेटिएका ३० जनामध्ये सात जना शंकास्पदको नमूना संकल गरी बिहीबार परीक्षणका लागि पठाइएको छ । उनीहरूलाई सप्तरीको विभिन्न पाँच ठाउँको ‘क्वारेन्टाइन’मा राखिएको छ ।

जिल्ला स्वास्थ्य कार्यालय राजविराजका प्रमुख दुनियालाल यादवका अनुसार राजविराजस्थित साई कृष्ण क्वारेन्टाइनमा, तिलाठी कोइलाडीको क्वारेन्टाइन, बोदेबरसाइनको क्वारेनटाइनमा ७–७ जना, हनुमाननगरको क्वारेन्टाइनमा ८, र कञ्चलनरुप नगरपालिकाको बैरवा क्वारेन्टइनमा १ गरी ३० जनाले आफूहरू मरकजमा सहभागी भएर फर्केको स्वीकार गरेका छन् । बैरबा क्वारेन्टाइनमा राखिएका मध्ये १६ जनाले भने आफूहरू मरकजमा सहभागी भएको स्वीकार गरेका छैनन् ।

राजविराजको साई कृष्णा कोरेन्टाइनमा राखिएका ७ र चैत ४ गते कतार एयरवेजबाट नेपाल आएका १ गरी शंकास्पद ८ जनाको नमूना संकलन गरी परीक्षणका लागि विपी कोइराला स्वास्थ्य विज्ञान प्रतिष्ठान पठाइएको स्वास्थ्य प्रमुख यादवले बताए ।

निजामुद्दिन मस्जिदमा आयोजित मरकजमा (धार्मिक भेला) सहभागीहरूमा कोरोनाको संक्रमण देखिएको र नेपाली नागरिक पनि त्यसमा सहभागी भएको पुष्टि भएपछि उनीहरूको खोजी कार्य अघि बढाइएको छ ।

मरकजमा सहभागी भएर घर फर्केका १ जनालाई मंगलबार कञ्चनरुप नगरपालिकाका स्थानीयले पहिचान गरेका थिए । त्यसपछि जनप्रतिनिधिको सहयोगमा भारतबाट आएका १७ जनासहित मरकजमा सहभागी ती व्यक्तिलाई पनि स्थानीय लक्ष्मीनारायण माध्यमिक विद्यालयको क्वारेन्टाइनमा राखिएको नगरपालिकाका प्रवक्तासमेत रहेका वडा नम्बर ८ का अध्यक्ष राजकुमार साहले बताए । मरकजमा (धार्मिक भेला) नेपालबाट कति गएका थिए भनेर यकिन हुन सकेको छैन ।

दिल्लीमा कोरोनाका कारण मरकजमा सहभागीको मृत्यु हुन थालेपछि यहाँबाट गएकाहरू विभिन्न सवारी प्रयोग गरी भिमनगर सीमा नाका हुँदै पैदल आएको बताउँछन् । पाँचदेखि १३ मार्चसम्म चलेको उक्त भेलामा तीन हजार बढी सहभागी रहेको उनीहरू बताउँछन् । धेरै सहभागी २४ मार्चअघि नै आ–आफ्नो गन्तव्यतर्फ आइसके पनि ‘लकडाउन’का कारण एक हजारभन्दा बढी त्यहीँ रोकिएका थिए ।

कञ्चनरुप नगरपालिका शिक्षा शाखा संयोजक ललित नारायण यादवका अनुसार उक्त सम्मेलनमा सहभागी भएकामध्ये कञ्चनरुप नगरपालिका–१ बैरवाका हबिव मन्सुरी राति घर फर्केपछि हल्लीखली मच्यो । मंगलबार राती घरमै बसेका कारण उनको परिवारलाई समेत घरमै क्वारेन्टाइन गरिएको सयोजक यादवले बताए ।

मंगलबार राती नै बैरवामा १८ जनाभन्दा बढी व्यक्ति भारतबाट आएको सूचनाले गाउँमा त्रास फैलिएको अध्यक्ष साहले बताए । उनीहरू सबै भारतबाट आएका भए पनि दिल्लीको मरकजमा सहभागी भएको एक जनाले मात्र स्वीकारेका छन् ।

सीमा नाका पूर्ण रुपमा बन्द गरेपछि पनि कोरोना प्रभावित कार्यक्रममा सहभागी भएकाहरू खुल्ला सीमानाकाको प्रयोग गरी हुल बाँधेरै घर फर्किनुले जोखिम बढाएको वडा अध्यक्ष साहले बताए । उनका अनुसार सप्तरीको बोदेबरसाईन–५ जाँजरमा फागुन ३ गते भएको तीन दिने इज्तिमामा(विश्वस्तरीय धार्मिक सम्मेलन) सहभागी भएर त्यहीँबाट यस गाउँका करिब सात जना दिल्लीतर्फ गएको बुझिएको छ । सप्तरीका प्रहरी उपरीक्षक कृष्ण प्रसाइका अनुसार भारतको दिल्लीबाट फर्केकाहरूको पहिचान गरी निगरानीमा राख्ने कार्य भइरहेको छ ।

पर्सामा पनि विशेष निगरानी गर्दै

दिल्लीमा कोरोना भाइरस संक्रमण फैलाउन भूमिका खेलेको भनिएको मुस्लिमको धार्मिक सभामा सहभागी भएर नेपाल प्रवेश गरेको आशंकामा पर्साबाट प्रहरीले २६ जनालाई नियन्त्रणमा लिएको छ ।
पर्साको ग्रामीण भेगमा रहेका मदरसा र मस्जिदमा लुकेर बसेको अवस्थामा उनीहरूलाई प्रहरीले नियन्त्रणमा लिएको हो । पर्साको पटेर्वासुगौली गाउँपालिका–१ कन्चनपुर गदियानीस्थित मदर्शाबाट ११ र जगरनाथपुर गाउँपालिका–४ स्थित मस्जिदमा लुकेर बसेका १५ जनलाई पक्राउ गरिउको प्रहरलिे जनाएको छ ।

मदर्शाबाट नियन्त्रणमा लिएका सबैलाई वीरगन्ज श्रीपुरस्थित सिद्धामार्थ माविको क्वारेन्टाइनमा राखिएको छ ।

दिल्लीको धार्मिक सभामा सहभागी भएर पर्सामा छिरेका ११ जना गाउँको मस्जिदमा ४/५ दिनदेखि बसेको सूचना पाएपछि उनीहरूलाई प्रहरीले नियनत्रणमा लिएको हो । गाउँपालिकाका प्रमुख प्रशासकीय अधिकृत भूजेन्द्र यादवका अनुसार गाउँलेको सूचना पाएलगत्तै इलाका प्रहरी कार्यालय पटेर्वासुगौलीबाट खटिएको प्रहरी टोलीले मस्जिदमा बसिरहेको अवस्थामा ११ जनालाई नियन्त्रणमा लिएको हो ।

प्रहरीले गदियानीको मदरसाबाट नियन्त्रणमा लिएका सबै ११ जना रौतहट घर भएका मुस्लिम समुदायका हुन् । पर्साकै जगरनाथपुर गाउँपालिका–४ स्थित मस्जिदमा लुकेर बसेका १५ जनालाई पनि बिहीबार प्रहरीले नियन्त्रणमा लिएको छ ।

उनीहरू पनि भारतको दिल्लीमा भएको धार्मिक सभामा सहभागी भएर आएको पर्सामा लुकेको आशंका गरिएको छ । जगरनापुरको मस्जिदबाट प्रहरीले नियन्त्रणमा लिएका १५ मध्ये रौतहटका ३, बाराको जितपुर सिमरा उपमहानगरपालिका–१ का ३ जना, सुवर्णपुर गाउँपालिका–२ कबहीगोठका ६, सिम्रौनगढ नगरपालिका–५ का १ जना, पर्साको वीरगन्ज महानगरपालिकाका १ जना र पर्साकै जगरनाथपुर गाउँपालिका–३ का १ जना छन् ।

स्थानीयले दिएको सूचनाका आधारमा उनीहरूलाई नियन्त्रणमा लिन जिल्ला प्रहरी कार्यालय पर्साबाट बिहीबार गएको प्रहरी टोलीलाई गाउँपालिका अध्यक्ष जालिम मियाले भने प्रहरीको गाडीमा वीरगन्ज लैजान नदिने भन्दै विवाद गरेका थिए।

त्यसपछि उनीहरूलाई गाउँपालिका अध्यक्ष मिया चढ्ने गाडी र एम्बुलेन्समा राखेर साँझ मात्रै वीरगन्ज ल्याइर्पुयाइएको प्रहरी निरीक्षक रवि यादवले बताए ।

कन्चनपुरको मदर्शा र जगरनाथपुरको मस्जिदबाट ल्याइएका सबै २६ जनालाई वीरगन्जको श्रीपुरस्थित सिद्धार्थ मा.विको क्वारेन्टाइनमा राखिएको छ ।

दिल्लीको तबलिगी जमातमा सहभागी भएर भारतबाट भागेर पर्सामा आएर लुकिछिपी बसेको स्थानीयले आशंका गरे पनि उनीहरूले भने आफूहरूबाट दिल्लीबाट नआएको दाबी गरेका छन् । उनीहरूले आफूहरू मुस्लिम धार्मिक प्रवचन दिने क्रममा पर्सामा आएर ४ सातादेखि बसेको बताएका छन् ।

क्वारेन्टाइनमा रहेकामध्ये हजमिनियाका शेख महफुजले सप्तरीमा फागुन ३ देखि ५ गतेसम्म आयोजित इज्तिमा (धार्मिक सम्मेलन) सकेर पर्सामा आएर विभिन्न मदर्शामा धार्मिक प्रवचन दिने क्रममा प्रहरीले आफूहरूलाई पक्रेर ल्याएको बताए । उनले भने, ‘हामी दिल्लीको तबलिगी जमातमा गएर यहाँ आएको हल्ला चलाइएको छ, तर यो सरासर झुट हो ।’

पर्साकी प्रहरी उपरीक्षक गंगा पन्तले उनीहरू दिल्ली वा कहाँबाट आएका हुन् भन्ने विषयमा अनुसन्धान भइरहेको बताइन् ।

नियन्त्रणमा लिइएकाहरूलाई क्वारेन्टाइनमा १४ दिनसम्म राखिने पनि उनले जानकारी दिइन् । भारतीय सञ्चार माध्यमका अनुसार दिल्लीको मरगज निजामुद्दिन दरगाहमा आयोजित तबलिगी जमातमा नेपालको पर्सा, बारा, रौतहट, सप्तरी, गोरखा, चितवनका पनि मुस्लिम धर्मावलम्बी सहभागी थिए ।

प्रकाशित मिति: शुक्रबार, चैत २१, २०७६ १२:२०