‘प्रदेश–२ मा भाषणबाजी बाहेक केही भइरहेको छैन्’

A+ A A-

कोरोना भाइस (कोभिड–१९) नियन्त्रणका लागि सरकारले घोषणा गरेको ‘लकडाउन’बाट सबै क्षेत्र ठप्प छ । ‘लकडाउन’का कारण उद्योगी व्यवसायीको अवस्था झन् खराब बनेको छ ।

प्रदेश–२ का उद्योग व्यवसायी अनुसार त्यहाँ राज्य र अन्य निकायबीच समन्वय नै छैन । यसैबीच, ‘लकडाउन’लाई लिएर नेपाल उद्योग वाण्ज्यि महासंघ प्रदेश–२ का अध्यक्ष शिवशंकर साह हिरासँग शिलापत्रकर्मी सुजीतकुमार झाले कुराकानी गरेका छन्

‘लकडाउन’ पछि प्रदेश २ को व्यापारिक अवस्थाको तपाई कसरी मूल्यांकन गर्नुहुन्छ ?

मूल्यांकनको अवस्था आएको छ । विकसित राष्ट्रहरु धरासायी भइरहेका छन् । हामी गरिव मुलुक र यहाँको व्यवसायको अवस्था कति खराब भइरहेको छ त्यसको कल्पना नै गर्न सकिन्न । लामो समयसम्म यस्तै रह्यो भने देशमा भोकमरी नआउला भन्न सकिन्न ।

राज्यसँग तपाइहरुले अहिलेदेखि नै लबिङ गर्नुपर्ने अवस्था आएको छैन ?

अहिले सबै मिलेर कोरोना भाइरसमाथि विजयी प्राप्त गर्ने समय आएको छ । त्यसमा पनि सरकार गम्भीर छैन । हामी उद्योगी व्यवसायी केही गर्न चाहन्छौं । तर, सरकार केमा व्यस्त छ बुझ्न सकिरहेका छैनौं ।

देशमा संघीय, प्रदेश र स्थानीय तह गरी तीनवटा सरकार छ कसको विषयमा कुरो गरिरहनु भएको छ ?

तीनवटै सरकारको अवस्था उस्तै रहेको छ । तीनवटै सरकारबीच सहकार्य छैन । सबै आफ्नै तरिकाले काम गरिरहेका छन् । समस्या जटिलतातर्फ बढीरहेको छ तर हामी एकअर्कालाई तल देखाउनमा लागेका छौं । तत्काल सुधार गरिएन भने नेपालमा भयावह स्थिति आउन बेर छैन ।

तीनटै निकायबीच सामञ्जस्यता ल्याउन तपाइहरु नै अगाडि आउँदा हुन्छ नि ?

के हुनु? प्रदेश–२ का मुख्यमन्त्री लालबाबु राउतलाई आजै तीन पटक फोन गरेको फोन उठाउनु भएन, मन्त्रीहरु पनि हामीसँग कुरो गर्न चाहिरहेका छैनन् । उहाँहरु केमा व्यस्त हुनुहुन्छ थाहा छैन । जबकी प्रदेश–२ मा भाषणबाजी बाहेक केही भइरहेको छैन् । क्वारेन्टाइन बनाइएको छ, त्यसमा हेल्थ असिस्टेन्ट बसिरहेका छन् । चिकित्सकलाई मुख्यमन्त्रीले अनावश्यक धम्की दिन्छन् । प्रदेश–२ मा टेष्ट सुरु भएको छैन् ।

बाहिरबाट प्रदेश–२ मा चैत महिनामा को–को आएका छन् अहिले पनि हावादारी रुपमै खोजी भइरहेको छ । दिल्लीमा भएको मुस्लिमको कार्यक्रमबाट निकै संख्यामा प्रदेश–२ मा फर्केका छन् । तिनीहरुलाई अहिलेसम्म पूर्णरुपले क्वारेन्टाइनमा राखिएको छैन् । जति हलुका ढंगले हामी लिइरहेको छौ स्थिति त्यति नै भयावह बन्दै गएको छ ।

तपाइहरु पनि कालोबजारी गर्नतर्फ लाग्नु भएको छ भनेर सुनिन्छ नि ?

कसले भनेको छ? जति लकडाउनलाई व्यापारीहरुले सहयोग गरिरहेको छ त्यति अरुले गरिरहेको छ मलाई लाग्दैन । व्यापारीसँग दोहोरो जिम्मेवारी छ । एकातिर लकडाउन पालन गर्नु र अर्कोतर्फ खाद्यान्नको अभाव हुन नदिनु । ज्यान जोखिममा राखेर व्यापारीहरु काम गरिरहेका छन् ।

यो पनि सत्य हो कालोबजारीमा प्रदेशभरी निकै संख्यामा व्यापारीहरु पक्राऊ रहेका छन् नि ?

सानोतिनोलाई पक्राउ गरेर वाहवाही भेटाउँदैन । ठूलोलाई समात्नुपर्छ । गलत गर्नेको पक्षमा हामी छैनौ । तर, ठूलो माछालाई समात्नुपर्छ । अनि मात्रै कालोबजारी रोकिन छ । हामीसँगै अनुगमनमा जान तयार छौ ।

प्रदेशमा भ्यान्टिलेरको अवस्था धेरै खराब छ केही लगानीको अवस्था छ, त्यतातर्फ तपाइहरुले ध्यान दिनु पर्यो नि ?

त्यति मात्रै कहाँ रहेछ । अहिले गरीवहरुलाई भोजन गराउनु, मास्क वितरण गर्नु, सेनिटाइजर वितरण गर्नु । हामी व्यापारीहरु त्यसतर्फ पनि कार्य गरिरहेका छौं । कुनै कुराका लागि समन्वय हुनु पर्‍याे नि । समन्वयतर्फ प्रदेश सरकार पूरै उदासिन रहेको छ ।

स्थानीय तहको भूमिकाको विषयमा के भन्नुहुन्छ ?

जो निकाय मच्छर नियन्त्रण गर्न सकिरहेको छैन्, नगर सफाई गर्न सकिरहेको छैन् त्योसँग के आशा गर्न सकिन्छ । अहिले मेरो शरीरमा हेर्नुस् पूरै लामखुट्टेको दाग छ । जनकपुरधाममा मेरो मात्रै होइन सबैको यस्तैै अवस्था छ । यो विषयमा मेयरलाई कुरा राख्दाराख्दै थाकियो । तर, त्यसतर्फ उहाँ गम्भीर हुनुहुन्न ।

अन्त्यमा के भन्नुहुन्छ ?

जुन महामारीबाट संसार गुर्जिरहेको छ । यसलाई हामीले हल्का ढंगले लिनु हुँदैन । सीमित साधन भएका देशका हामी जनता राम्रो व्यवस्थापन समन्वयले मात्रै सफलता प्राप्त गर्न सक्छौं ।

प्रकाशित मिति: शुक्रबार, चैत २१, २०७६ ०९:०९