भारतमा सयौँ नेपाली अलपत्र, उद्धारको प्रयाससम्म भएन

A+ A A-

बैतडी डोगडाकेदारका वीरेन्द्र बिष्ट भारतको दिल्लीमा अलपत्र अवस्थामा छन् । रोजगारीको शिलशिलामा भारतमा रहेका उनी नेपाल–भारत ‘लक डाउन’का कारण दिल्लीमा अलपत्र परेका हुन् ।

कोरोनाको कहरका कारण घर फर्किँदै गरेका वीरेन्द्र ‘लकडाउन’का कारण अलपत्र परेको ११ दिन बितिसक्यो ।

भारतमा अलपत्र अवस्थामा रहँदा खानबस्न निकै समस्या भइरहेको उनको गुनासो छ । बिष्टले भने, ‘कोरोनाको संक्रमण बढ्दै गएपछि आफू कार्यरत रहेको कम्पनी बन्द भयो, काम नै बन्द भएपछि भारतमा हामी बिचल्लीमा पर्‍यौ । घर फर्किँदै थियौ, दिल्ली पुग्ने बेला भारत र नेपाल लकडाउन भए । सीमानाका बन्द भए अब के गर्ने? यहाँ अलपत्र परे ।’ उनले थपे, ‘यहाँ खान बस्नै समस्या छ, रोगले भन्दा पनि भोक र शोकले पो मरिने भयो’

उनी मात्रै हैन दिल्लीमा उनीसँगै बैतडीको डोगडाकेदारका १५ युवा अलपत्र अवस्थामा छन् । उनीहरूको सम्पर्कमा दिल्लीमा मात्रै अलपत्र अवस्थामा रहेका २ सय बढी नेपालीहरू छन् । रोगको त्रासका कारण नेपाल फर्किन लागेका उनीहरू अहिले रोग र भोगको शोकमा छन् ।

आफूहरूको उद्धारका लागि सम्बन्धित निकायलाई गुहार गर्दा पनि सुनुवाई नभएको अलपत्र अवस्थामा रहेका अर्का युवा डम्बर विष्टले बताए ।

‘आफूहरूको उचित व्यवस्थापनको लागि कसैले पहल गरेको छैन, राजदूतावासले फोन नै उठाउन छोडिसकेको छ, देशमा तिन तहको सरकार छ तर हाम्रो यो अवस्थामा पनि उद्धार वा उचित व्यवस्थापनका लागि पहल भएको छैन’ उनले भने ।

उनीहरुले इमानदारीका साथ क्वारेन्टाइनमा बस्न तयार रहेकाले यथाशीघ्र उद्धार गर्न माग गरेका छन् ।
कोरोनाको त्रासका कारण नेपाल फर्किन लागेका सयौँ नेपालीहरू भारतमा अलपत्र अवस्थामा छन् ।

यता कैलालीका प्रमुख जिल्ला अधिकारी यज्ञराज बोहराले सीमानाकामा रहेकाको उद्धार गरे पनि भारतको अन्य स्थानमा रहेका नेपाली उद्धार गर्न अहिलेकै अवस्थामा नसकिने बताए ।

प्रजिअ बोहराले भने, ‘चैत्र १२ गतेसम्म सीमानामा रहेका नेपालीहरूको उद्धार गरी सम्बन्धित जिल्लामा पठाइसकेका छौ, अब उद्धार गर्न सम्भव छैन । हामीले भारत सरकारसँग समन्वय गरी उनीहरूको उचित व्यवस्थापनको पहल गर्दैछौँ ।’

भारतका विभिन्न स्थानमा अलपत्र अवस्थामा रहेका नेपालीहरूको उद्धारको लागि प्रदेश सरकारले पनि चासो दिएको छैन ।

सुदूरपश्चिम प्रदेश सरकारका प्रवक्ता तथा आन्तरिक मामिला तथा कानुनमन्त्री प्रकाश शाहले कानूनी अड्चनका कारण अलपत्र अवस्थामा रहेका नेपालीहरूको उद्धार गर्न अप्ठ्यारो भएको बताए । यो विषयमा केन्द्र सरकारसँग समन्वय गरिरहेको उनको भनाई छ ।

तर, भारतमा अलपत्र परेका नेपालीले भने तिनै तहको सरकारबाट आफूहरूको उचित व्यवस्थापन तथा उद्धारको कुनै पहल नभएको गुनासो गरेका छन् । राजदूतावासले फोनसम्म नउठाइरहेको उनीहरूको गुनासो छ

प्रकाशित मिति: बिहीबार, चैत २०, २०७६ १३:०७