महाविपत्तिका बेला किनिएको स्वास्थ्य सामग्रीमा गडबडी छानबिन हुनै पर्छ : पम्फा भुसाल

महाविपत्तिका बेला किनिएको स्वास्थ्य सामग्रीमा गडबडी छानबिन हुनै पर्छ : पम्फा भुसाल

A+ A A-

नेपाल कम्युनिस्ट पार्टी (नेकपा)की स्थायी कमिटी सदस्य एवं प्रतिनिधिसभा सांसद पम्फा भुसालले महाविपत्तिको सामना गरिरहेका बेला खरिद गरिएको सामानमा अनियमितता भए छानबिन हुनै पर्ने बताएकी छन् ।

उनले सामाजिक सञ्जाल फेसबुकमा लेखेकी छन्, देश महाविपत्तिको सामना गरिरहेका बेलामा अनियमितता भएको भए छानबिन त हुनै पर्छ ।

सरकारले खरिद गरेका स्वास्थ्य सामग्रीको गुणस्तर, खरिद प्रक्रिया र मूल्यमा प्रश्‍न उठिरहेका बेला नेकपा सांसद भुसालको यस्तो प्रतिक्रिया आएको हो ।

उनले सरकारको पहिलो प्राथमिकताको काम भनेको कोरोना भाइरसको जाँचका लागि यथाशीघ्र परीक्षण सामग्री ल्याउने रहेको बताएकी छन् । त्यसका लागि उनले नेपाल सरकारले चीन सरकारसँग (जीटुजी)मार्फत् सिधै स्वास्थ्य उपकरण किन्नु उपयुक्त हुने सुझाएकी छन् । सबैभन्दा भरपर्दो र विश्वसनीय विधि सरकारले चीनसँग सिधै सामान खरिद गर्नु भएको उनलको भनाइ छ ।

नेपाल सरकार अहिलेका लागि सबैभन्दा विश्वसनीय विधि सरकारले चीन सरकारसित कुरा गरी चीन सरकारमार्फत् (जीटुजी विधिबाट) खरिद गर्नुहुनेछ । यो विधिबाट सामग्री खरिद गर्दा छिटो र गुणात्मक हुनेछ , उनले फेसबुकमा लेखेकी छन् ।

विश्वभर महामारीको रूप लिएको कोरोना भाइरसका संक्रमित नेपालमा पनि देखिएपछि सरकारले कोरोना परीक्षण र उपचारसम्बन्धी मेडिकल सामग्री खरिदका लागि ओम्नी विजनेस कर्पोरेट इन्टरनेसनलसँग सम्झौता गरेको थियो । तर, ओम्नीले सम्झौताअनुसार सामान समयमै ल्याउन नसकेको भन्दै ऊसँग भएको सम्झौता सरकारले रद्द गरेको छ ।

स्वास्थ्य तथा जनसंख्या मन्त्रालयमा बुधबार आयोजित नियमित पत्रकार सम्मेलनमा स्वास्थ्य सेवा विभागका महानिर्देशक महेन्द्रप्रसाद श्रेष्ठले खरिद सम्झौता रद्द भएको जानकारी दिएका थिए । सम्झौतामा उल्लेख भएअनुसारको सामान निर्धारित समयभित्र ल्याउन नसकेकाले ओम्नीसँगको सम्झौता रद्द गरिएको उनको भनाइ थियो ।

यद्यपि, उक्त कम्पनीले कोरोना भाइरसको संक्रमण परीक्षण गर्ने र्‍यापिट टेस्ट किटको गुणस्तरमाथि पनि प्रश्न उठेको छ । उक्त किटको गुणस्तर परीक्षण गरेर मात्र प्रयोगमा ल्याइने भएको छ ।

प्रकाशित मिति: बिहीबार, चैत २०, २०७६ १२:३७