सरकार ! चैत्र २५ पछिको रणनीति र योजना के ? : गगन थापा

A+ A A-

नेपाली कांग्रेसका नेता गगन थापाले कोरोना भाइरस (कोभिड-१९) विरुद्ध सरकारको रणनीति र योजनाबारे प्रश्न गरेका छन् । उनले चैत २५ सरकारको रणनीति र योजना के हुन्छ भनी प्रश्न गरेका हुन् ।

साथै उनले स्वास्थ्य सामाग्री खरिद अनियमितताका बारेमा वास्तविक दोषी दण्डित नहुन्जेलसम्म प्रश्न गर्न नछाड्नु पर्ने बताएका छन् । उनले महासंकटको बेला घीनलाग्दो कृत्य गरेको भन्दै दिन ढल्यो, कुरा बिर्सियोको अवस्था आउन कदापि दिन नहुने बताएका छन् । बिहीबार दिउँसो सामाजिक संजाल ट्विटरमार्फत आफ्नो विचार राख्दै स्वास्थ्य सामाग्री खरिद अनियमितताका बारेमा वास्तविक दोषी दण्डित नहुन्जेल प्रश्न उठाउन छाड्न नहुने बताएका हुन् ।

उनले ट्विटमा लेखेका छन् :

महासंकटको अवस्थामा पनि यस्तो घिनलाग्दो कृत्य !

स्वास्थ्य सामाग्री खरिद अनियमितताका बारेमा वास्तविक दोषी दण्डित नहुन्जेल प्रश्न उठाउन नछाडौं ।

दिन ढल्यो,कुरा बिर्सियो हुन हामी कदापि दिने छैनौं ।

संगैमा यो प्रश्न पनि गरौं -

सरकार ! चैत्र २५पछिको हाम्रो रणनीति र योजना के?

सरकारले चीनबाट खरिद गरेका स्वास्थ्य सामग्रीको गणस्तर र खरिद प्रक्रियाका विषयमा आलोचना भइरहेका बेला पूर्वस्वास्थ्य मन्त्रीसमेत रहेका थापाको पछिल्लो टिप्पणी आएको हो ।

यद्यपि, सरकारले स्वास्थ्य सामग्री खरिद गर्ने विवादस्पद सम्झौता खारेज गरेको छ । विश्वभर कोरोना भाइरसको संक्रमण फैलिदै गएको र नेपालमा पनि कोरोनाका पोजेटिभ विरामी देखिएपछि सरकारले कोरोना परीक्षण र उपचारसम्बन्धी मेडिकल सामाग्री खरिदका लागि ओम्नी बिजनेस कर्पोरेट इन्टरनेसनलसँग सम्झौता गरेको थियो ।

स्वास्थ्य तथा जनसंख्या मन्त्रालयमा बुधबार आयोजित नियमित पत्रकार सम्मेलनमा स्वास्थ्य सेवा विभागका महानिर्देशक महेन्द्रप्रसाद श्रेष्ठले खरिद सम्झौता रद्द भएको जानकारी दिएका थिए । सम्झौतामा उल्लेख भएअनुसारको सामान निर्धारित समयभित्र ल्याउन नसकेकाले ओम्नीसँगको सम्झौता रद्द गरिएको उनको भनाइ थियो ।

सरकारले सम्झौता रद्द गरेको बताए पनि खरिद प्रक्रियाको अनियमितताका बारेमा वास्तविक दोषीमाथि कारबाही हुनुपर्ने माग बढिरहेको छ । यसबीच स्वास्थ्य तथा जनसंख्यामन्त्री भानुभक्त ढकालविरुद्ध सामग्री खरिद गर्दा अनियमितता गरेको भन्दै अख्तियार दुरुपयोग अनुसन्धान आयोगमा उजरी समेत परेको छ ।

विवेकशील नेपाली दलका नेता तथा बाग्मती प्रदेशसभा सदस्य रमेश पौड्यालले अख्तियारमा स्वास्थ्यमन्त्री ढकाल विरुद्ध उजुरी दिएका हुन् । बजार दरभन्दा चार गुणासम्म महँगो पर्ने गरी मेडिकल सामाग्री खरिद गरिएको देखिएपछि मन्त्री ढकालविरुद्ध उजुरी गरिएको जनाइएको छ ।

प्रकाशित मिति: बिहीबार, चैत २०, २०७६ १२:१५