सीएमसीले कोरोना भाइरसविरुद्ध केन्द्रदेखि स्थानीय तहसम्म समन्वय गर्ने

A+ A A-

कोरोना भाइरस (कोभिड–१९) को रोकथाम तथा नियन्त्रण कार्यान्वयनका लागि एकीकृत रूपमा अब क्राइसिस म्यानेजमेन्ट सेन्टर (सीएमसी) ले केन्द्रदेखि स्थानीय तहसम्म समन्वय गर्ने भएको छ ।

कोरोनाको रोकथाम तथा नियन्त्रण गर्न केन्द्रीय सरकारबाट निर्णय हुने तर कार्यान्वयन चुस्त नहुँदा एकीकृत रूपमा अब कोभिड–१९ म्यानेजमेन्ट सेन्टरले समन्वयले गर्ने भएको हो ।

उक्त सेन्टरबाट केन्द्रीय, प्रादेशिक र स्थानीय तहसम्म निजामती, सुरक्षा निकाय र सबै सरोकारवालाहरूको संयुक्त समूहहरूमार्फत कोरोना भाइरसविरूद्ध एकीकृत रूपमा सबै प्रकारका प्रतिकार्यहरू सञ्चालन गरिने विज्ञप्तिमा जनाइएको छ ।

मन्त्रिपरिषद्को चैत १६ को निर्णयअनुसार कोरोना भाइरसविरूद्धको प्रतिकार्य गर्नका लागि उच्च स्तरीय निर्देशक समिति गठन गरिएको थियो । उक्त समितिको निर्णयहरूलाई सहजीकरण समितिअन्तर्गत रही प्रतिकार्यलाई प्रभावकारी ढंगले छिटो, व्यवस्थित र समन्वयात्मक रूपमा सम्पादन गर्न सेन्टरको स्थापना गरिएको हो ।

छाउनीस्थित सेनाको महावीर गण (रेञ्जर) को हाताभित्र प्रधानमन्त्री कार्यालयका सचिवको नेतृत्वमा नेपाली सेनाको प्रबन्ध रथी तथा स्वास्थ्य मन्त्रालयका १२औँ तहका प्रतिनिधिहरूको समन्वयकारी भूमिका रहने गरी सेन्टरको स्थापना गरिएको छ ।

उक्त सेन्टरको बुधबार उपप्रधान एवं रक्षामन्त्री ईश्वर पोखरेलले भ्रमण गरेका छन् । भ्रमणका क्रममा उनले उक्त केन्द्रद्वारा कोरोना भाइरसको रोकथाम, नियन्त्रण र उपचारसम्बन्धी गरिएको तयारी, प्रगति प्रतिवेदनलगायत भावी योजना सम्बन्धमा जानकारी दिएका थिए । साथै, उपप्रधानमन्त्री पोखरेलले केन्द्रको प्रभावकारी रूपमा सञ्चालनका लागि आवश्यक दिर्नेशनसमेत दिएका छन् ।

सीएमसीले जारी गरेको विज्ञप्तिमा उल्लेख गरेअनुसार सेन्टरले कोरोना संक्रमण रोकथाम, नियन्त्रण तथा उपचारका लागि व्यक्तिहरूको ट्रयाक, ट्रेसिङ र टेस्टिङ गर्ने, क्वारेन्टाइन, आइसोलेसन र ट्रिटमेन्ट गर्नेछ ।

साथै, आवश्यकताअनुसार मृतकको शव व्यवस्थापन गर्नेलगायत सेन्टरले केन्द्रदेखि स्थानीय स्तरसम्म एउटै चेन अफ कमान्ड स्थापना गरी प्रशासनिक चुस्तता हासिल गर्दै द्रुत गतिमा प्रतिकार्य गर्ने, स्रोत र साधनको सीमिततालाई मध्यनजर राख्नेछ ।

प्रकाशित मिति: बिहीबार, चैत २०, २०७६ ०९:५०