कोरोना त्रासः दुर्गममा नयाँ मान्छे पस्न पूर्ण रोक

A+ A A-

कोरोना भाइरस (कोभिड–१९) संक्रमणबाट जोगिन दुर्गमका गाउँलेले नवागन्तुकलाई गाउँ पस्न पूर्ण रोक लगाएका छन् ।

जुम्ला तिला गाउँपालिका ७, ८ र ९ वडामा पर्ने सूँडी, पुरु, जुम्लाकोट, रिपी, मालापानी, राँसा, ढिपुलगयात गाउँले नयाँ मान्छेलाई गाउँ पस्न पूर्ण निषेध गरेका हुन् । गाउँहरु अहिलेसम्म सुरक्षित रहेको र नयाँ मान्छेबाट कोरोना भाइरस सर्ने डरले नयाँ मान्छेलाई गाउँ पस्न रोक लगाइएको तिला–८ का वडाध्यक्ष सन्तविर रावतले जानकारी दिए ।

‘यी गाउँहरु जुम्लाकै दुर्गम क्षेत्रमा पर्छन् । लाग्छ, अहिलेसम्म हामी सुरक्षित छौंँ’ वडाध्यक्ष रावतले भने, ‘प्रत्येक गाउँले नयाँ मान्छे आए गाउँ पस्न निषेध गर्ने र एक गाउँको मान्छे अर्को गाउँमा नजाने भनेर सूचना गरेका छौंँ ।’ गाउँमा प्रहरी प्रशासन नपुग्ने भएकाले युवाको सहयोगमा बन्द आदेशलाई प्रभावकारी बनाइने वडाध्यक्ष रावतको भनाई छ ।

उनका अनुसार गाउँका सबैलाई कोरोनाबाट बच्न हातमुख धुने सिकाइएको छ भने मास्क र साबुन वितरण गरिएको छ । नयाँ मान्छे प्रवेश नगरुन् भनेर हेरालो पनि राखिएको छ । नियम तोडे कारवाही पनि गरिने छ । ‘लकडाउन’ले गाउँमा प्रभाव नपरेकाले गाउँ तथा वडापालिका, स्थानीय राजनीतिक दल, युवा र महिला मिलेर गाउँ पस्न पूर्ण निषेध गरिएको वडाध्यक्ष रावतले बताए ।

यसपालि माइती गएनौंँ

कोरोना भाइरसको जोखिमबाट बच्न वर्षेनी चैते दसैँमा माइत जाने यहाँका छोरीचेलीसमेत यसपालि माइती गएनन् । तिला–८ जुम्लाकोटकी कमला बुढाले यस वर्षको चैते दसैँमा माइती नगएको बताइन् । बुढाले भनिन्, ‘सरकारले घरमै बस भनेको छ । बाहिर जाँदा जीवन लिने कोरोना सर्छ भनेकोले यस पालिको चैतेदसैँ माइती नजाने निधो गरेका हौं ।’

सोही वडाकी हरिकला विकले पनि प्रत्येक वर्ष चैतेदसैँमा माइत जाने र विश्वाँ (चैत्र २०) पर्व मनाउने धोको यस वर्ष पूरा नभएको बताइन् ।

कोरोनाबारे दुर्गम गाउँका नागरिकलाई अधिकतम सचेतना दिन गाउँपालिकाका उपाध्यक्ष विष्णु बुढा नेतृत्वको स्वास्थ्य, सुरक्षा तथा सञ्चारकर्मी पत्रकारको टोली त्यहाँ पुगेको छ । पालिकाभरिका नौवटै वडाका गाउँमा पुगेर कोरोनाबारे सचेतना जगाउने र नागरिकलाई कोही कसैसँग घुलमेल नगरी घरमै बस्न गर्न आग्रह गर्ने हेतुले गाउँमा पुगेको उपाध्यक्ष बुढाले बताए ।