प्रदेश १ बाट ५४ जनाको नमूना संकलन, ४२ को रिपोर्ट आयो

A+ A A-

प्रदेश–१ बाट कोरोना भाइरस (कोभिड–१९) का शंकास्पद ५४ जनाको नमूना संकलन गरिएको छ । प्रदेशका विभिन्न अस्पतालहरुबाट बुधबारसम्म ५४ जनाको नमूना संकलन गरिएको हो । नमूना संकलन गरिएकामध्ये ४२ जनाको रिपोर्ट नेगेटिभ देखिएको छ ।

नमूना संकलन गरिएका १२ जनाको रिपोर्ट आउन बाँकी रहेको सामाजिक विकास मन्त्रालय प्रवक्ता डा. सुरेश मेहताले जानकारी दिए । उनकाअनुसार झापाबाट ५, मोरङबाट ९, सुनसरीबाट २५, धनकुटाबाट १, तेह्रथुमबाट २, संखुवासभाबाट १, भोजपुरबाट २, सोलुखुम्बुबाट २, उदयपुरबाट ४ र पाँचथरबाट ३ जनाको नमूना संकलन भएको छ । प्रदेश नं. १ बाट बुधबार थप ८ जनाको नमूना संकलन गरिएको छ ।

मोरङबाट २, सुनसरीबाट १, भोजपुरबाट २ र उदयपुरबाट ३ जनाको नमूना संकलन गरिएको प्रवक्ता डा. मेहताले बताए । सुनसरी स्थित धरानको विपी कोइराला स्वास्थ्य विज्ञान प्रतिष्ठान धरानबाट कोरोना परीक्षण शुरु भएपछि रिपोर्ट आउन छिटो भएको उनले बताए । ‘आज मात्रै १२ जनाको रिपोर्ट आयो । प्रदेशभरिमा आजसम्म कोरोना भाइरसका शंकास्पद १ सय १९ जना बिरामीले अस्पतालमा नाम दर्ता गराएका छन् ।’ उनले भने, ‘सुनसरीबाट १ सय ६, मोरङ र झापाबाट ५÷५ जना छन् ।’

उनका अनुसार बुधबारसम्म आइसोलेसनमा ३ पुरुषसहित ९ जना विरामी भर्ना भएका छन् । ओखलढुङ्गा, उदयपुर र पाँचथर २÷२ जना महिला र सोलुखुम्वु, पाँचथर र ताप्लेजुङबाट १÷१ जना पुरुष आईसोलेसनमा भर्ना भएका हुन् ।

प्रदेश नं. १ का ४३ अस्पतालले ३ सय ८५ आइसोलेसन वेड तयारी अवस्थामा राखेको प्रवक्ता डा. मेहताले जानकारी दिए । उनले प्रदेशभरीमा ३ सय ६१ वटा फिवर क्लिनिक सञ्चालनमा रहेको बताए ।

फिवर क्लिनिकमा बुधबार १ हजार २ सय ४६ जना विरामी आएको डा. मेहताले बताए । आज प्रदेशका विभिन्न जिल्ला स्वास्थ्य कार्यालय, स्थानीय तह, सुरक्षा निकाय तथा अस्पतालहरुलाई व्यक्तिगत सुरक्षा सामाग्री ५ सय ७ थान वितरण गरिएको सामाजिक विकास मन्त्रालयले जनाएको छ ।

प्रकाशित मिति: बुधबार, चैत १९, २०७६ १८:१२