कोरोनाविरुद्ध ट्राफिक प्रहरीको सजगता, गेटमै पीपीई लगाएका स्वास्थ्यकर्मीबाट ज्वरो मापन

कोरोनाविरुद्ध ट्राफिक प्रहरीको सजगता, गेटमै पीपीई लगाएका स्वास्थ्यकर्मीबाट ज्वरो मापन

A+ A A-

दैनिक सडकमा खट्टिनुपर्ने ट्राफिक प्रहरीहरूलाई कोरोना भाइरस (कोभिड-१९) को उच्च जोखिमलाई मध्यनजर गर्दै महानगरीय ट्राफिक प्रहरी महाशाखाले सजगताका उपायहरू अपनाएको छ ।

महाशाखाले कोरोना रोकथाम तथा सम्भावित माहामारीविरुद्ध न्यूनीकरण तथा प्रभावकारी व्यवस्थापनको लागि आवश्यक व्यवस्था गरेको जानकारी गराएको छ ।

महानगरीय ट्राफिक प्रहरी महाशाखाले आफ्ना प्रहरी कर्मचारीहरूमा नोभेल कोराना भाईरसको संक्रमणलाई मध्यनजर गर्दै बाहिरी प्रवेश गेटमा पीपीई पोसाक लगाई स्वास्थ्यकर्मीले थर्मल गनमार्फत ज्वरो नाप्ने व्यवस्था गरेको छ ।

महाशाखाले यसअघि नै कार्यालय प्रवेश गर्नुअघि हरेक प्रहरी कर्मचारी र सेवाग्राहीले पहिले साबुन पानीले अनिवार्य हात धुनका लागि पानीको धारा र छेउमा हेन्ड वास राखि सकेको छ । हात धोइसकेपछि मात्र कार्यलय प्रवेश गर्न पाइने व्यवस्था मिलाई सकेको छ । त्यस्तै महाशाखाका मातहतका ४४ वटै ट्राफिक कार्यालयहरूमा पनि नियमित रूपमा हात धुने व्यवस्था मिलाएको महाशाखाले जनाएको छ ।

महाशाखाका प्रमुख प्रहरी वरिष्ठ उपरीक्षक भिमप्रसाद ढकालकका अनुसार प्रहरी कार्यालयमा विभिन्न किसिमको मानिसहरू आवतजावत गर्ने तथा दैनिक प्रत्यक्ष सडकमा खट्टिनुपर्ने भएकाले बिश्व माहामारीको रुपमा फैलिरहेको नोभेल कोरोनो भाइरस संक्रमणबाट बच्नका लागि पूर्व सावधान रहन यस्तो व्यवस्था गरिएको बताए ।

महाशाखाले प्राविधिकहरूको सहयोगमा आफैँ सेनिटाइजर उत्पादन गरी प्रत्येक ट्राफिक प्रहरीहरूलाई सेनिटाइजरसँगै मास्क पनि वितरण गरिसकेको जानकारी प्रवक्ता जिवन कुमार श्रेष्ठले दिए ।

वर्तमान सुरक्षा अवस्था समेतलाई मध्यनजर गर्दै हरेक प्रहरी कर्मचारीहरूलाई सचेत रहन र संक्रमणबाट बच्नको सैदान्तिक तथा व्यवहारिक ज्ञान महाशाखा मातहतका ट्राफिक प्रहरीहरूलाई दिएको प्रमुख ढकालले जानकारी दिए ।

कोरोना भाईरस समन्वय डेस्क

महाशाखाले स्वास्थ्यकर्मीसहित प्रनाउको कमान्डमा समन्वय डेस्कसमेत गठन गरेको छ । त्यस्तै, महाशाखाले २५ जनाको लागि क्वारेन्टाइन वार्ड तयार गरेको जनाएको छ ।

ट्राफिक प्रहरीले विशेष परिस्थिति र आवश्यकताको आधारमा मात्र विदारछुट्टी छाड्ने व्यवस्था मिलाएको छ । विदाबाट फर्किएका व्यक्तिहरुलाई अनिवार्य रुपमा १४ दिनसम्म होम क्‍वारेन्टाइनमा राखेर चेकजाँचपछि मात्रै डिउटी खटाउने जनाएको छ । ब्यारेकभित्रका ट्राफिक प्रहरीको सम्पूर्ण सुरक्षा व्यवस्थाको प्रबन्ध मिलाइएको महाशाखाका प्रवक्ता तथा प्रहरी उपरिक्षक जिवन कुमार श्रेष्ठले बताए ।

ब्यारेकमा सुत्ने खाटको दुरी घटीमा एक मिटरको राख्ने व्यवस्था गरेको छ । त्यस्तै सबै ट्राफिक प्रहरीलाई ड्युटीपश्चात ब्यारेक हाताभित्र नै लकडाउन गरिएको छ । साथै ड्युटीमा कम्तिमा २ मि। दुरीमा नागरिक सँग दुरी कायम गर्ने व्यवस्थापनि मिलाएको छ ।

प्रकाशित मिति: बुधबार, चैत १९, २०७६ १७:३९