विप्लवलाई शान्तिपूर्ण राजनीतिमा आउन कांग्रेसको आव्हान

A+ A A-

नेपाली कांग्रेसले नेत्र बिक्रम चन्द (विप्लव) नेतृत्तवको पार्टी नेकपालाइ शान्तिपुर्ण राजनीतिमा आउन आव्हान गरेको छ ।

आज वसेको पार्टी केन्द्रीय कार्यसमितिको बैठकले चन्दको नेतृत्वमा रहेको नेपाल कम्युनिष्ट पार्टीलाई हत्या, हिंसा र चन्दा आतङ्कको मार्ग परित्याग गरेर शान्तिपूर्ण राजनीतिमा आउने अपिल गरेको हो । सरकारले विप्लवका गतिविधिमा प्रतिबन्ध लगाएकोप्रति असन्तुष्टि जनाउदै कांग्रेसले विप्लवलाइ विस्वासमा लिन अग्रह समेत गरेको छ ।

‘निषेधको मार्गबाट होइन वार्ताको माध्यमबाट सो समूहलाई विश्वासमा लिन शासकीय योग्यता प्रस्तुत गर्न बैठकले सरकार समक्ष आग्रह गरेको छ । दशक लामो हिंसाबाट जर्जर भएको मुलुकले भर्खरै मात्र शान्ति प्राप्त गरेको स्मरण गर्दै बैठकले सत्तारुढ र विद्रोही दुबै नेकपालाई नागरिकको जीवनप्रति गम्भीर बन्न सचेत गराएको छ,’ बैठकपछि जारी बिज्ञप्तिमा भनिएको छ ।

बैठकले सीके राउत र सरकारवीच भएको ११ बुँदे सहमतिमा उल्लेख गरिएको जनअभिमतमा आधारित लोकतान्त्रिक बिधि भन्ने वाक्यांशको साझा व्याख्या गर्न सरकार र राउतलाई सचेत समेत गराएको छ ।

सम्झौताको दुई साता पुग्दासम्म ‘जनअभिमतमा आधारित लोकतान्त्रिक विधि’ को साझा व्याख्या नगरिनु आपत्तिजनक भएको कांग्रेसको ठहर छ । सत्तापक्षले प्रतिपक्षीलाइ राष्ट्रिय महत्वको निर्णय गर्दा विस्वासमा लिन नसकेको कांग्रेसको ठहर छ ।

‘राष्ट्रिय संवेदनशीलताका विषयमा कुनै पनि महत्वपूर्ण निर्णय गर्नु अघि र पछि पनि प्रमुख प्रतिपक्षलाई विश्वासमा लिने संसदीय लोकतन्त्रको परम्परा र संविधानको मर्म अनुरुपको अभ्यासलाई वर्तमान सरकारले त्याग गरिरहेको विषयप्रति गम्भीर आपत्ति प्रकट गर्दछौ, ’ कांग्रेसले जारी गरेको बिज्ञप्तिमा भनिएको छ ।

अनुशासन समितिमा दुइ नेता थपिए

बैठकले कांग्रेसको विधान, २०१७ (संशोधित र परिमार्जित) को धारा ३४ (७) अनुसार भीष्मराज आङ्दम्वेको संयोजकत्वमा गठित ‘केन्द्रीय अनुशासन समिति’ को सदस्यमा उमाकान्त चौधरी र धनराज गुरुङलाई चयन गर्ने निर्णय गरेको छ ।

दुई समिति गठन

यसैगरी बैठकले रमेश लेखकको संयोजकत्वमा नियमावली मस्यौदा समिति गठन गरेको छ । समितिको सदस्यमा मीन विश्वकर्मा, जीवन परियार,ईश्वरी न्यौपाने र प्रदीप पौडेल छन् । त्यसैगरी राधेश्याम अधिकारीको संयोजकत्वमा केन्द्रीय निर्वाचन समिति गठन भएको छ ।

समितिको सदस्यमा गोपालकृष्ण घिमिर, खम्मबहादुर खात, सिताराम के.सी.र एकराज पोखरेल छन् ।

प्रकाशित मिति: बुधबार, चैत ६, २०७५ ०५:५४