ओम्नी समूहसँगको विवादस्पद स्वास्थ्य सामग्री खरिद सम्झौता रद्द

A+ A A-

सरकारले मेडिकल सामाग्री खरिदका लागि ओम्नी समूहसँग गरेको सम्झौता रद्द गरेको छ ।

विश्वभर कोरोना भाइरसको संक्रमण फैलिदै गएको र नेपालमा पनि कोरोनाका पोजेटिभ विरामी देखिएपछि सरकारले कोरोना परीक्षण र उपचारसम्बन्धी मेडिकल सामाग्री खरिदका लागि ओम्नी बिजनेस कर्पोरेट इन्टरनेसनलसँग सम्झौता गरेको थियो ।

स्वास्थ्य तथा जनसंख्या मन्त्रालयमा बुधबार आयोजित नियमित पत्रकार सम्मेलनमा स्वास्थ्य सेवा विभागका महानिर्देशक महेन्द्र प्रसाद श्रेष्ठले खरिद सम्झौता रद्द भएको जानकारी दिएका हुन् । सम्झौतामा उल्लेख भएअनुसारको सामान निर्धारित समयभित्र ल्याउन नसकेकाले ओम्नीसँगको सम्झौता रद्द गरिएको उनले बताए ।

उनले आवश्यकताको १० प्रतिशत मात्रै सामान आएको र सो सामानले केही समयका लागि पुग्ने भएकाले थप सामाग्री ल्याउनका लागि सरकारले भोली देखि नै नयाँ प्रक्रिया सुरु गर्ने पनि जानकारी दिए ।

कुल कबोल अंकको १८ प्रतिशत मात्रै सामान ल्याएको र अन्य सामान नल्याएकाले आज मैले त्यो सम्झौता रद्द गरेको छु र कालो सूचीका लागि आग्रह गर्नु भनेको छु उनले भने हामीले तुरुन्तै भोली नयाँ टेण्टर प्रक्रिया सुरु गर्दै छौँ । ३ दिनभित्र सप्लायर्सको प्रस्ताव आएपछि सबैभन्दा कम भएकासँग सम्झौता गर्छौं ।”

उनले कुनै पनि अस्पताललाई मेडिकल सामाग्रीको अभाव हुन नदिने प्रतिबद्धता जनाउँदै स्वास्थ्य सामाग्रीको अभावमा विरामीको उपचारमा सम्झौता नगर्न पनि अनुरोध गरे । विश्वस्तरमा संक्रमणको फैलावट तीब्र हुँदै गएपछि थप सामान किन्नका लागि सरकारले प्रक्रिया अघि बढाएको भन्दै उनले सो क्रममा भएका छलफलको फेयरिस्त नै सुनाए ।

उनले ओम्नीसँग गरिएको खरिद सम्झौता बजार भाउभन्दा २० प्रतिशत बढी भएको पनि स्वीकार गरे । बजार भाउभन्दा २० प्रतिशत बढी थियो । बढी छ । तर ३० तारिकभित्र ल्याउनुपर्ने थियो । सबै सामान नआएकाले सम्झौता रद्द गरियो उनले भने ।

उनले र्यापिट टेस्ट किट परीक्षण पछि आवश्यकता हेरेर प्रयोग गर्ने स्पष्ट पारे। र्यापिट टेस्ट किटको परीक्षण गरेपछि मात्रै पेमेण्ट गरिने पनि उनले बताए । र्यापिट टेस्ट किट संसार भरी प्रयोग हुन्छ । अहिले चाईना सरकारले १९ वटा कम्पनीलाई मात्रै मान्यता दिएको छ उनले भने आइसकेको टेस्ट किटहरूको परीक्षणको क्रममा नै छ । परीक्षण भएपछि पास भएपछि मात्रै लिन्छौ र पेमेण्ट गर्छौं ।

संक्रामक रोगको टेष्ट गर्दा जहिले र जहाँ पनि सेन्सेटिभिटी र स्पेसिभिटी हुने उल्लेख गर्दे उनले समुदायमा संक्रमण देखिएको र महामारी फैलिएको अवस्थामा मात्रै र्यापिट टेस्ट किट प्रयोग गरिने बताए । ७५ हजार टेस्ट किट किनेका छौँ । अहिले हामीले प्रयोग गर्दैनौँ । भोलि महामारी भयो भने । ५ सय भन्दा बढी विरामी भए भने तुरुन्तै हामीले त्यो टेष्ट प्रयोग गर्नु पर्छ । सबै ठाउँमा प्रयोग गर्नुपर्छ उनले भने ।

प्रकाशित मिति: बुधबार, चैत १९, २०७६ १७:३३