लकडाउनको सदुपयोग : करेसाबारीदेखि कृषिजन्य काममा

A+ A A-

लकडाउनको समयलाई सर्वसाधारणले खेतीकिसानीमा प्रयोग गरिरहेका छन् । अन्यत्र हिँड्डुल गर्न नपाइने भएपछि उनीहरूले फुर्सदिलो समयलाई कृषिमा केन्द्रित गरेका हुन् । कोरोना महामारीलाई छेक्न सरकारले लकडाउन घोषणा गरेपछि यतिखेर सर्वसाधारण आफ्नो घरआँगन र खेतबारीमा सीमित भएका छन् ।

शहर र चोकहरूमा घुमफिर र हिँड्डुल गर्नु जोखिमपूर्ण भएपछि घरमै सीमित भएका अधिकांश सर्वसाधारण खाली समयलाई खेतीकिसानीमा केन्द्रित गरेका हुन् । देशका अन्य शहर र गाउँजस्तै मोरङको कटहरीमा समेत लकडाउनको प्रत्यक्ष प्रभाव छ ।

कटहरी गाउँपालिकाको वडा नम्बर १ महेशपुरस्थित नहर छेउमा अपरिचित व्यक्ति र सवारीसाधनको आवागमन नहोस् भनेर यस सडकको दुवैतर्फ बाँस तेस्र्याएर छेकिएको छ भने अधिकांश सर्वसाधारण आफ्नै घरआँगनमा सुरक्षित बसेका छन् ।

घरमा बसी मात्र रहन नसक्ने मानवीय प्रवृत्तिले होला यतिखेर अधिकांश सर्वसाधारण आफ्नो करेसाबारी तथा कृषि सम्बन्धित गतिविधिलाई निरन्तरता दिएका छन् । कटहरी १ का देवराज चौधरी यतिखेर आफ्नो घर छेउमै रहेको पोखरीमा माछाको हेरचाहमा दिन बिताउने गरेका छन् ।

माछालाई दाना हाल्नुका साथै कृषिसँग सम्बन्धित अन्य गतिविधिमा उनको दिन बित्ने गरेको छ । नेपाल आदिवासी जनजाति महासंघ मोरङका पूर्वअध्यक्षसमेत रहेका चौधरीले लकडाउनको समयलाई खेतीकिसानीमा सदुपयोग गरिरहेको बताए ।

‘कारोना संक्रमणको जोखिम न्यूनीकरणका लागि लकडाउन एकदमै प्रभावकारी उपाय हो । सबैले घरमै बसेर जोखिम न्यूनीकरणमा सहयोग गर्नुपर्छ । घरमै बसेर पनि थुप्रै काहरु गर्न सकिन्छ’ उनले भने, ‘समयको सदुपयोग गर्न माछाको स्याहार र करेसाबारीमा तरकारी उत्पादन थालेको छु ।’

चौधरीजस्तै कटहरी–१ कै ६२ वर्षीया आशाराम माझीले फुर्सदिलो समयलाई घर तथा करेसाबारीका लागि आवश्यक घेराबेरा निर्माण गर्न खर्च गरिरहेका छन् । घरछेउमै रहेको आफ्नै बाँसघारीबाट काटिएको बाँसबाट उनले आफैँलाई आवश्यक टाटी निर्माण गरिरेका छन् ।

‘लकडाउनको समयमा अन्यत्र हिँड्डुल गर्नु जोखिमपूर्ण छ’ उनले भने, ‘घरमै बसेर सार्थक काममा समयलाई सदुपयोग गरिरहेको छु । बाहिरको कामले कहिल्यै घरको भ्याइँदैन । त्यसैले यो समय घरमै बसेर रचनात्मक काम गर्दैछु । साब सब्जी उब्जाउँदा आफ्नै लागि हो । त्यसैलेले घरवरी परिको खाली जमिन खनेर तयार पारेको छु ।’

चौधरी र माझी मात्र होइनन् जिल्लाका सबै मानिसहरू आ–आफ्नो घर र करेसाबारीमा फुर्सदिलो समयलाई सदुपयोग गरिरहेका छन् । कतिपयले आफूले गर्दै आएको खेतीमा मल हाल्ने, गोडमेल गर्नेलगायतका कृषिजन्य काममा अधिकांशले समय बिताउने गरेका छन् ।

जसले गर्दा शारीरिक व्यायाम पनि हुने र समयको सदुपयोग पनि हुने उनीहरूले बताएका छन् । लकडाउन लम्बिँदै गएका कारण यसले विश्व र मुलुकको अर्थतन्त्रमा नकारात्मक प्रभाव पार्ने भएकाले हालको अवस्थामा उत्पादनशिल क्षेत्रमा समय खर्चिनु सकारात्मक कुरा भएको नेकपाको १ नं. प्रदेश कमिटी सदस्य मृत्युज्यकुमार झाले बताए ।

प्रकाशित मिति: बुधबार, चैत १९, २०७६ १३:४०