बाजुराको रुघाखोकी प्रभावित गाउँमा स्वास्थ्यकर्मीको टोली पुग्याे

A+ A A-

बाजुराको खप्तड छेडेदह गाउँपालिका–३, पुराबाब्लाको सिंगो गाउँ रुघाखोकीले प्रभावित भएपछि गाउँपालिकाबाट स्वास्थ्यकर्मीको टोली त्यहाँ पुगेर उपचार गरी फर्किएको छ । १ सातदेखि फैलिएको रुघाखोकीको संक्रमणले पुराबाब्लाका ३ सयभन्दा बढी परिवार प्रभावित भएका छन् ।

१ घरका २ देखि ५ जनासम्म रुघाखोकी र ज्वरोको प्रकोपबाट बिरामी परेको वडा अध्यक्ष दीपक रावतले बताए । मंगलबार मात्र खप्तड छेडेदह गाउँपालिकाका अध्यक्ष र स्वास्थ्यकर्मीको टोली गाउँ पुगेको थियो ।

उक्त गाउँपालिकाका स्वास्थ्य संयोजक नन्दबहादुर रावतले भने, ‘मौसमी रुघाखोकी मात्र हो । त्यस्तो आत्तिनुपर्ने खासै छैन, बिरामी भएका ५ जनालाई उपचार गरिरहेका छौँ ।’

बिरामीमा सामान्य खोकी लाग्ने, ज्वरो आउने, रिंगटा लाग्ने, खान मन नलाग्ने र शरीर थकित हुनेजस्ता लक्षण देखिएको संयोजक रावतले बताए

‘लकडाउन’को समयमा पुराबाब्लामा रुघाखोकीको प्रकोपको खबर आएपछि गाउँपालिकाका अध्यक्ष नरबहादुर रावतको निर्देशनमा गाउँमा स्वास्थ्यकर्मीको टोली पठाइएको थियो । सिंगो गाउँ नै प्रभावित बनेपछि स्थानीय त्रसित भएका थिए । स्वास्थ्यकर्मीले मैसमी रुघाखोकी भनेपछि जनताको छटपटी कम भएको छ ।

गाउँ नै रुघाखोकीको संक्रमणले थला परेपछि गाउँपालिका अध्यक्षसहित स्वास्थ्यकर्मीको टोली आएर गाउँमै आधारभूत स्वास्थ्य इकाई सञ्चालनसमेत गरिएको छ । स्थानीय उपचारका लागि छिमेकी बुढीगंगा नगरपालिकाका निजी मेडिकल र टाँटे स्वास्थ्य चौकीमा जाने गरेका थिए ।

लकडाउनको समयमा त्यो अवस्था नरहेपछि गाउँमा स्वास्थ्य इकाइ नै सञ्चालन गरिएको गाउँपालिका अध्यक्ष नरबहादुर रावतले बताए । इकाइमा अहेव भगत धामी र अनमी ईश्वरी रावत रहने व्यवस्थासहित उपचार पनि सुरु गरिएको छ ।

गाउँपालिकाले बाह्रबिस बेतालमाडौं बाटो हुँदै भारतबाट आउनेहरू सहजै गाउँपालिका प्रवेश गर्न थालेपछि निगरानी र सुरक्षाका लागि हेल्थ डेस्क पनि सञ्चालन गरेको छ ।