'गाँस काटेर बचत गर्नेको जीवन निर्वाहका लागि रकम उपलब्ध गराऊ'

A+ A A-

देश लकडाउनको अवस्थामा रहेको बेला आफ्ना सेयर सदस्यहरूको जीवन निर्वाहका लागि आवश्यक पर्ने रकम उपलब्ध गराउन काठमाडौं महानगरको सहकारी विभागले आज सबै सहकारीहरूलाई पत्राचार गरेको छ ।

विभागले कोरोना भाइरसको विश्वव्यापी संक्रमणको चुनौती सामना गर्नुपरिरहेको वर्तमान अवस्था र सरकारले गरेको लकडाउनको यो घडिमा आफ्नो र परिवारको गाँस कटाएर सहरकारी संस्थामा बचत गर्ने निम्न आय भएका ती परिवारलाई खोजेर भए पनि जीवन निर्वाहका लागि सहयोग गर्न परिपत्र गरेको हो ।

विभागले सहकारीको तर्फबाट सरकार र आफ्ना सदस्य दुवै पक्षलाई सहयोग होस् भनेर यस्तो परिपत्र गरेको बताएको छ ।

सो परिपत्रमा विभागका प्रमुख देवेन्द्रप्रसाद पोखरेलले भनेका छन्, ‘कोरोना भाइरसको संक्रमणबाट बच्न सरकारले विभिन्न मितिमा गरेका निर्णय, राष्ट्र बैङ्कले गरेका परिपत्र, संक्रामक रोग आवश्यक सेवा सञ्चालन ऐन २०१४, संक्रमण रोकथामका लागि महानगरले गरेका व्यवस्थाका आधारमा सहकारीहरूलाई यस्तो अनुरोध गरेका हौँ ।’

‘सहकारीमा न्यून तथा मध्यम आय भएका व्यक्तिहरूले थोरैथोरै गर्दै गाँस कटाएर भए पनि केही बचत गरेका हुन्छन् । उनीहरूको यो बचत भोलि आउने अप्ठ््यारोका लागि हो,’ विभागका उपनिर्देशक सुमन अधिकारी भन्छन्, ‘अहिले शहरी गरिब तथा न्यून र मध्यम आय भएका परिवारलाई जीवन निर्वाह गर्न अप्ठ््यारो परेको छ । उनीहरूलाई खोजेर भए पनि जीवन निर्वाहका लागि सहयोग गर्नोस् भनेका हौँ ।’

उत्पादन र उपभोक्ता सहकारीहरूले उत्पादित वस्तुको सहज वितरणको व्यवस्था मिलाउन आग्रह गर्दै पत्रमा आफ्ना सदस्यहरूलाई सम्भव भए मास्क र स्यानिटाइजर उपलब्ध गराउन र प्रयोग गर्न प्रोत्साहन गरिएको छ ।

त्यस्तै, आफू वा आफ्नो परिवेशनजिक कसैमा भाइरसको शंका लागे महानगरको हटलाइन ११८० मा सम्पर्क गर्न वा महानगरको निगरानी प्रणालीको प्रयोग गरेर शंका निवारण गर्न भनिएको छ । महामारीबाट आफ्ना सदस्य र समाजलाई बचाउन यो सेवा प्रयोग गर्न प्रोत्साहन गर्नसमेत पत्रमार्फत आग्रह गरिएको छ ।

प्रकाशित मिति: मंगलबार, चैत १८, २०७६ २०:३५