कोरोना भाइरसको रोकथाममा अरुण तेस्रोको १ करोड

A+ A A-

महामारीको रूपमा फैलिएको कोरोना भाइरस रोकथामका लागि ९ सय मेगावाटको अरुण तेस्रो जलविद्युत आयोजनाले १ करोड ५ लाख रूपैयाँबराबरको स्वास्थ्य सामग्री सहयोग गरेको छ ।

आयोजना निर्माण गरिरहेको संखुवासभास्थित जिल्ला अस्पताललाई अरुण तेस्रो आयोजनाले १ करोड ५ लाख रुपैयाँबराबरको अत्यावश्यक स्वास्थ्य सामग्री हस्तान्तरण गरेको हो ।

आयोजना निर्माण गरिरहेको भारतीय प्रवर्द्धक कम्पनी एसजेभीएन अरुण– ३ पावर डेलभमेन्टले मुख्य गरी आईसीयूका लागि दुई थान उन्नत भ्यान्टिलेटर, एक थान प्यासेन्ट मोनिटर, ५ थान अक्सिजन कन्सेन्टेटरस, दुई थान लरिङगोस्कोपसेट, ७ थान फाउलर बेड, २ थान पल्स अक्सिमिटर, ३ थान सक्सन मेसिन तथा १५ थान पर्सनल प्रोटेक्टिभ इक्विपमेन्ट (पीपीई) लगायत सामग्री सहयोग गरेको छ ।

कम्पनीका अध्यक्ष नन्दलाल शर्माको पहलमा साे रकमबराबरकाे अत्यावश्यक स्वास्थ्य सामग्री जिल्ला अस्पताललाई मंगलबार हस्तान्तरण गरिएको कम्पनीका प्रमुख कार्यकारी अधिकृत अरुण धिमानले जानकारी दिए ।

सबै सामग्रीहरू संखुवाभामा ल्याएर प्रमुख जिल्ला अधिकारीको उपस्थितिमा प्रमुख कार्यकारी अधिकृत धिमानले जिल्ला अस्पताल व्यवस्थापन समितिका अध्यक्ष सुमन शाक्यलाई हस्तान्तरण गरेका थिए ।

कम्पनीले आयोजनास्थलअन्ततर्गत विभिन्न गाउँहरूमा कोरोनाबारे जनचेतना जगाउने, ब्यानर राख्नुका साथै सरकार, स्थानीय जनता र अन्य आयोजनाका सरोकारवालाहरूका लागि समेत काम गरिरहेको जनाएको छ । आयोजनाका कर्मचारीहरूले कोरोनाको महामारीको रोकथामका लागि उनीहरूको तलबबाट अस्पताललाई ५ लाख दिइएको कम्पनीले जनाएको छ ।

प्रकाशित मिति: मंगलबार, चैत १८, २०७६ १८:२७