विराटनगरका १ लाख विपन्न मजदुरलाई राहत वितरण गरिँदै

A+ A A-

दैनिक ज्यलादारी मजदुरी गर्दै आएका परिवारको जीवनयापनमा समस्या भएपछि विराटनगर महानगरपालिकाका २० हजार घरपरिवारलाई राहत वितरणको तयारी थालिएको छ ।

विराटनगर महानगरपालिकाले दैनिक ज्यालादारी गर्ने मजदुरलाई खाद्यान्न राहत वितरणको तयारी थालेको हो । कोरोना संक्रमण फैलन नदिन सरकारले गरेको लकडाउनको कारण काम बन्द भएपछि समस्यामा परेका मजदुरलाई ‘विराटनगर महानगरपालिका विपत् कोष’ बाट राहतको वितरणको तयारी भएको हो ।

महानगरपालिकाका मेयर भीम पराजुलीले कोषमा महानगरपालिकाले १ करोड रुपैयाँ जम्मा गरेको जानकारी दिए । जसमा मेयर पराजुलीले १ वर्षको आफ्नो तलब ५ लाख ४० हजार रुपैयाँ थप गरेका छन् । त्यस्तै महानगरभरका जनप्रतिनिधिको १ महिनाको तलब ११ लाख र अधिकृतभन्दा माथिका कर्मचारीको ७ दिनको, खरदारभन्दा माथिका कर्मचारीको ५ दिनको र त्यसभन्दा तलका कर्मचारीको ३ दिनको तलब कोषमा जम्मा गर्दा थप १३ लाख थप हुने उनले बताए ।

कोसबाट राहत वितरण गर्न दैनिक ज्यालादारीमा काम गरिरहेका महानगर क्षेत्रभित्रका मजदुरका घरपरिवारको लगत संकलन गर्ने काम भइरहेको जनाइएको छ । महानगरले २० हजार घरपरिवारका १ लाख जनसंख्यालाई राहतका लागि खाद्यान्न वितरण गर्नुपर्ने प्रारम्भिक अनुमान गरेको मेयर पराजुलीले जानकारी दिए । लगत संकलन सकेपछि बिहीबारदेखि राहत बितरण हुनेछ ।

पहिलो चरणमा १२ किलो चामल, २ किलो दाल, ३ किलो आलु, २ किलो चिउरा, १ किलो नुन र आधा लिटर तेल वितरण गर्ने पराजुलीले बताए । ‘दैनिक ज्यालादारीमा काम गर्ने मजदुरका घरमा छिटोभन्दा छिटो खाद्य सामग्री पुगोस् भन्ने लक्ष्यका साथ काम गरिरहेका छौँ ।’ उनले भने ।

महानगरले चामल, दाल, तेल र चिउरा स्थानीय उद्योगहरूबाट कारखाना मूल्यमै खरिद गर्न मंगलबार उद्योगीहरूको बैठक बोलाएको छ । प्रमुख पराजुलीले विपत् कोषमा आवश्यकता अनुसार रकम वृद्धि गर्दै लैजाने र लकडाउन अवधिभर खाद्यान्न वितरणलाई निरन्तरता दिने जानकारी दिए ।

प्रकाशित मिति: मंगलबार, चैत १८, २०७६ १५:२४