खुला दिसामुक्त क्षेत्र घोषणा गर्ने नाममा राजाजस्तै रातो तुलमा हिँडे मुख्यमन्त्री

खुला दिसामुक्त क्षेत्र घोषणा गर्ने नाममा राजाजस्तै रातो तुलमा हिँडे मुख्यमन्त्री

A+ A A-

नयाँ पत्रिकाले केही दिनदेखि खुला दिसामुक्त क्षेत्र घोषणा गर्ने नाममा गलत तथ्यांक देखाएका समाचारलाई प्राथमिकता साथ प्रकाशित गर्दै आएको छ । आज पनि नयाँ पत्रिकाले सुदूरपश्चिम प्रदेशको दार्चुला जिल्लामा झुटो तथ्यांक देखाएर गत वैशाखमा जिल्लालाई खुला दिसामुक्त क्षेत्र घोषणा गरिएको समाचार प्रकाशित गरेको छ ।

तर, सदरमुकाममै सयभन्दा बढी परिवारको दिसापिसाब महाकाली नदीमा बग्छ । पूर्ण रूपमा चर्पी बनाएर मात्र जिल्लालाई खुला दिसामुक्त क्षेत्र घोषणा गर्न जिल्लाका मिडियाले आवाज उठाउँदा पनि जिल्ला समन्वय समितिले घोषणासभा आयोजना गरेको थियो । बजेट मात्रै फर्स्योट गर्ने उद्देश्यले आयोजित घोषणासभामा सुदूरपश्चिमका मुख्यमन्त्री त्रिलोचन भट्टका लागि रातो तुल बिछ्याइएको थियो । राजाजस्तै तुलमा हिँडेर स्टेजमा गएका उनले दार्चुलालाई पूर्ण सरसफाइयुक्त जिल्ला घोषणा गरेका थिए, समाचारमा भनिएको छ । सुदूरपश्चिमका भौतिक पूर्वाधार विकास मन्त्री पठानसिह बोहरा समेत दार्चुला पुगेका थिए । अतिथि सत्कार मै ६ लाखभन्दा बढी खर्च भएको थियो ।

यस्तै नयाँ पत्रिकाले शतप्रतिशत चर्पी यसरी बने भन्ने शीर्षकमा सिरहाको समाचार प्रकाशित गरेको छ । प्रदेश दुईका मुख्य मन्त्रीले एक भव्य कार्यक्रमका बीच सिरहा जिल्लामा शतप्रतिशत चर्पी बनेको घोषणा गरेपनि यथार्थ फरक रहेको समाचारमा छ । उता तेह्रथुम खुला दिसामुक्त घोषणा भएपनि शिक्षक नै सौच गर्न जंगल छिर्ने गरेको समाचार पनि नयाँ पत्रिकाले प्रकाशित गरेको छ ।

नयाँ पत्रिकाको पहिलो पृष्ठमै सिंहदरवार गेटमा खुल्दै ११ तले होटल, गुप्तर मुख्यालयलाई जोखिम भन्ने समाचार छापेको भने युएस बंगला दुर्घटनाको प्रतिवेदन सार्वजनिक भएको समाचार पनि पहिलो पृष्ठमा प्रकाशित छ ।

प्रकाशित मिति: सोमबार, माघ १४, २०७५ ०७:४९