नियमित ऋण चुक्ता गर्ने वाणिज्य बैंकका ग्राहकले पाएनन् १० प्रतिशत छुट

A+ A A-

राष्ट्रिय वाणिज्य बैंकले राष्ट्र बैंकले आइतबार गरेको निर्देशन अझै पालना गरेको छैन । राष्ट्र बैंकले कर्जा लिएका ऋणीहरूलाई कोरोनाको कारण देखाउँदै ब्याज तिर्ने समय थप गरेको छ भने समयमै कर्जा बुझाउन चाहने ग्राहकलाई ब्याजको १० प्रतिशत छुट दिन निर्देशन दिएको छ ।

तर, वाणिज्य बैंकले भने अझै छुट दिने कि नदिने भनेर टुङ्गो लगाएको छैन । जसले गर्दा नियमित ब्याज बुझाउने ग्राहकहरूले निर्णय भएको ३ दिन भइसक्दासमेत अझै अन्योलमा छन् ।

भक्तपुर पुरानो ठिमीमा बस्दै आएका हरिराम गुभाजू बैंकले कुनै कुट नदिएको बताउँछन् । उनी भन्छन, ‘नियमित ब्याज बुझाउँदा १० प्रतिशत छुट हुन्छ भनेका थिए, त्यही भएर अनलाइन बैंकिङबाट ब्याज बुझाएँ, तर छुट त पाइनँ । बैंकमा फोन गरेर सोध्दा छुटको विषयमा अझै निर्णय भएको छैन भने । उता समाचारमा सहुलियत दिइएको भनिएको छ । यसरी ढाँट्न पाइन्छ ?’

गुभाजू बैंकले ढाटेको बताउँछन् । बैंककै सानोठिमी शाखाका एक अधिकारी भने ब्याजदरमा छुटको टुंगो नलागिसकेकाले छुट नदिइएको बताए । ‘कस्तो कर्जालाई छुट दिने, कस्तोलाई नदिने भनेर अझै निर्णय भइसकेको छैन । त्यसैले यो छुटको कुरा अहिले कार्यान्वयन भइसकेको छैन,’ उनले भने ।

यता राष्ट्रिय वाणिज्य बैंकका सीईओ किरण श्रेष्ठ भने राष्ट्र बैंकको सबै निर्देशनलाई कार्यान्वयन गरिसकेको बताउँछन् । श्रेष्ठले चैत मसान्तभित्रमा बुझाइसक्नुपर्ने ग्राहकले ब्याज बुझाएमा १० प्रतिशत छुट हुने र यो सबै प्रकारको कर्जामा लागू हुने बताए ।