३ दिनमा ८८ हजार सिलिण्डर ग्यास बिक्री

A+ A A-

कोभिड–१९ का कारण देशभर खाना पकाउने एलपी ग्यासको कृत्रिम अभाव सिर्जना भइरहेको उपभोक्ताको गुनासो आइरहँदा ३ दिनमा ८७ हजार सिलिण्डर ग्यास बिक्री भएको छ ।

निगमका प्रवक्ता विनितमणि उपाध्यायले ३ दिनकाे अवधिमा ग्यास उद्योगीले निगमलाई उपलब्ध गराएको तथ्यांकअनुसार शुक्रबार, शनिबार र आइतबार ८७ हजार ६ सय ३० सिलिण्डर ग्यास बिक्री भएको जानकारी दिए ।

उनका अनुसार आइतबार अपराह्न १ बजेसम्म उपभोक्तालाई भरी सिलिण्डर अर्थात् १४.२ किलोको दरमा वितरण गरिएको र १ बजेपछि आधा सिलिण्डर वितरण गरिएको थियो ।

शुक्रबार ३३ हजार ६ सय ५८, शनिबार १४ हजार १ सय ८ सिलिन्डर र आइतबार ३९ हजार ८ सय ६४ सिलिण्डर ग्यास वितरण गरिएको उनले जानकारी दिए ।

औसतमा मासिक ३८ हजार टन ग्यास आयात हुँदै आएकाेमा १८ फागुनदेखि १५ चैत हालसम्मकै उच्च अर्थात् ४५ हजार टन ग्यास आयात भएको निगमले जनाएको छ ।

निगमले उपभोक्ताले अनावश्यक रुपमा ग्यासको मौज्दात राखेको भन्दै आइतबार अपराह्न १ बजेपछि आधा सिलिण्डर मात्र ग्यास वितरण गर्न उद्योगलाई निर्देशन दिएको छ ।

निगमको निर्देशनअनुसार अपराह्नपछि आधा सिलिण्डर मात्रा भएको ग्यास बिक्री गरिएका बिक्रेता महासंघले जनाएको छ । महासंघका कोषाध्यक्ष राजेश दाहालले सोमबारदेखि बजारमा ग्यासको सहज आपूर्ति भएको जानकारी दिए ।

उपभोक्ताको समस्यालाई ध्यानमा राखी नेपाल ग्यासले बालाजु औद्यौगिक क्षेत्रबाट नै १ हजार सिलिण्डर ग्यास वितरण गर्ने भने पनि सो संख्याको ग्यास धेरै माग भएका डिपोमा पठाउँदा उपभोक्तालाई सहज हुने उनले तर्क राखे ।