‘लकडाउन’ले मजदुरको जनजीवन कष्टकर, पाएनन् राहत

A+ A A-

कोरोना भाइरस (कोभिड–१९) संक्रमण नियन्त्रणका लागि सरकारले गरेको ‘लकडाउन’का कारण दैनिक ज्यालामजदुरी गरेर गर्ने वर्ग सबैभन्दा बढी प्रभावित भएका छन् । ‘लकडाउन’ले काम ठप्प भएपछि उनीहरु भोकभोकै बस्नुपर्ने अवस्था सिर्जना भएको छ । तीनै तहको सरकार मिलेर तत्काल राहत वितरण गर्न उनीहरुको माग छ ।

सरकारले आइतबार मात्रै रहत घोषणा गरेको छ । तर, कुनै पनि प्रकारको राहत नपाउँदा दैनिक मजदुरी गरेर गुजारा चलाउने परिवार भोको पेट बस्न बाध्य छन् ।

मोरङ कटहरी गाउँपालिका–४ दलित वस्तीका मुसहर समुदायका व्यक्तिहरु दिनचर्या फेरिएको छ । दैनिक ज्याला मजदुरीमा व्यस्त रहने उनीहरु यतिबेला घरमै बसेका छन् ।

उनीहरुले ‘लकडाउन’मा काम गर्न जान पाइँदैन भन्ने मात्र बुझेका छन् । दैनिक ज्याला मजदुरी गरेर जीविकोपार्जन गर्दै आएका उनीहरुलाई यतिबेला बिहान–बेलुकाको छाक टार्न धौधौ परेको छ ।

कोरोना संक्रमण र ‘लकडाउन’को बारेमा पनि उनीहरु अनभिज्ञ रहेको पाइएको छ । स्थानीय पवनी ऋषिदेवले भनिन्, ‘विराटनगरमा दिनभरी मजदुरी गरेर खान्छौँ । अहिले काम गर्न पाइदैन । सबैतिर बन्द छ । यतिबेला दिनभरी घरमा त्यसै बस्नु परेको छ । अलिकति रहेको दाल, चामल पनि सकिएको छ । अब के खाने भन्ने पिर छ ।’

उनले स्थानीय सरकारले उनीहरुलाई खाद्यान्न उपलब्ध गराउनुपर्ने भए पनि हालसम्म साबुन बाहेक केही नपाएको गुनासो गरिन् । उनीहरु दैनिक ज्याला मजदुरीका लागि विराटनगर आउने गरेका थिए । ‘लकडाउन’पछि उनीहरु काममा जान सकेका छैनन् ।

आर्थिक अभावका कारण उनीहरुले साबुन, मास्क, सेनिटाइजरसमेत किन्न सकेका छैनन् । गाउँपालिकाले अहिलेसम्म राहत स्वरुप सानो परिवारलाई ३ र ठूलो परिवारलाई ५ थान हात धुने साबुन बाहेक केही उपलब्ध नगराएको स्थानीय गुरु ऋषिदेवले बताए ।

‘हामी काममा जान नपाएर भोकभोकै बस्नुपर्ने अवस्था भइसक्यो । कि त हामीलाई काममा जान दिनुपर्यो कि खानाको व्यवस्था हुनुपर्यो । सरसफाई पनि हुनुपर्छ, तर भोको पेट बसेर हात मात्र धोएर के गर्नु?’ उनले भने, ‘यो टोलका सबै बिहान काम गरेर बेलुका खाने छौँ । हाम्रा बालबच्चा भोकभोकै मर्नुपर्ने अवस्था नआओस् । त्यसैले सरकारले चाँडै हामीलाई खानाको गरोस् ।’

यता वडाध्यक्ष मन्टु शेखले पहिलो चरणमा सफा रहनका लागि हातधुने र नुहाउने साबुन वितरण गरिएको र अव खाद्यान्न उपलब्ध गराउने योजना रहेको जानकारी दिए । अधिकांश दलित समुदायको बसोबास रहेको उक्त वडामा दोस्रो चरणमा खाद्यन्न लगायतका अन्य राहत वितरण गर्ने उनले बताए ।

कटहरी गाउँपालिकाका अध्यक्ष रामकुमार कामतले गाउँपालिकाभित्र रहेका दैनिक ज्यालादारी गर्ने परिवारको यतिबेला विवरण संकलन गरिरहेको जानकारी दिए ।

प्रकाशित मिति: सोमबार, चैत १७, २०७६ १२:१२