‘लकडाउन’ पालना नभएपछि रौतहटमा ‘सटडाउन’

A+ A A-

कोरोना भाइरस संक्रमण रोक्न सरकारले लगाएको लकडाउनमा पनि जनता बाहिर निस्केर हिँड्न थालेपछि जिल्ला प्रशासन कार्यालयले रौतहटमा आजदेखि सटडाउन(निषेधज्ञा) लागू गरेको छ । लकडाउनमा स्थानीयबासी बाहिर हिँड्डुल गर्न थालेपछि प्रशासनले सटडाउन लगाएको प्रमुख जिल्ला अधिकारी बासुदेव घिमिरेले जानकारी दिए ।

रकारले देशैभरि लकडाउन गरेर बिहान र साँझपख भने मानिसहरू तरकारी, दूध तथा अन्य खाद्यान्न खरिद गर्न बाहिर निस्किने गरेका छन् । जसका कारण किराना पसल तथा तरकारी पसलहरुमा स्थानीयबासीको भिड लाग्ने गर्दछ ।

‘किनमेलकै बहानामा सबैजना घरबाट बाहिर निस्कने, डुल्न जाने जस्ता गतिविधि हेर्दा लकडाउनको मतलव गरेको देखिएन, त्यसैले अब दुई दिन सटडाउन गर्ने निर्णय गरिएको हो,’ प्रमुख जिल्ला अधिकारी घिमिरेले भने ।

सटडाउन लगाएपछि अहिले सदरमुकाम गौर ठप्प रहेको छ । अनिश्चतकालका लागि आइतबारबाट सटडाउन लागू गरिएको प्रजिअ घिमिरेले बताए । सट डाउनमा औषधि पसलबाहेक सबै पसल बन्द रहने उनले जानकारी दिए।

लकडाउनको पालना नभएपछि रौतहटको गौरमा आजबाट दुई दिनसम्म तरकारी र खाद्यान्न पसलसमेत बन्द गराइएको छ । दैनिक उपभोग्य सामान खरिद गर्न बिहान र साँझपख घर बाहिर निस्किने स्थानीयबासीको भिडका कारण संक्रमण फैलने खतरा बढेको भन्दै जिल्ला प्रशासन कार्यालय रौतहटले आइतबार र सोमबार औषधिबाहेकका सबै पसलहरु पूर्णरुपमा बन्द गर्ने निर्णय गरेको हो ।

लकडाउनलाई कडाइका साथ पालना गर्न लगाउने र अवज्ञा गर्नेलाई कारवाही गर्नसमेत सुरक्षा निकायलाई निर्देशन दिएको छ ।

यता लकडाउन भएपछि हालसम्म रौतहटको विभिन्न क्वारेन्टाइनमा ७६ जना बसेका छन् । कोरोना भाइरसको संक्रमण हुन सक्ने बताउँदै विदेशबाट र भारतबाट आएका व्यक्तिहरू क्वारेन्टाइनमा बसेका प्रमुख जिल्ला अधिकारी घिमिरेले जानकारी दिए।

घरदैलोमै सेवा दिने तयारी

बजारहरु बन्द भए पनि अत्यावश्यक खाद्यान्नका लागि उद्योग वाणिज्य संघको सहकार्यमा सहज आपूर्तिको व्यवस्थापन भइरहेको प्रमुख जिल्ला अधिकारी घिमिरेले बताए ।

उद्योग वाणिज्य संघ रौतहटका अध्यक्ष पण्डित जयसवालले बजारमा भिड हुन नदिन र मूल्य वृद्धिसमेत नहुने गरी उपभोक्ताको घरदैलोमै सेवा पुर्याउन आवश्यक काम भइरहेको बताए ।

बजार बन्द भएपछि उद्योग वाणिज्य संघले गौरमा रहेका सम्पूर्ण खाद्यान्न पसलहरुको नाम र मोबाइल नम्बर जारी गर्ने र आवश्यक सामग्री घरसम्म पु¥याउने व्यवस्था गर्न लागेको जयसवालको भनाइ छ ।

प्रकाशित मिति: आइतबार, चैत १६, २०७६ १९:१३