नेताको पहलमा नेपालगञ्जबाट सुत्केरीसहित १ सय ७ यात्रुको उद्धार

A+ A A-

काठमाडौंबाट घर जाँदै गर्दा लकडाउनका कारण नेपालगञ्जमा अलपत्र परेका डोल्पाका १ सय ७ जना यात्रू सकुशल घर पुुगेका छन् ।

उनीहरू काठमाडौंबाट नेपालगञ्ज हुँदै डोल्पा घर जान हिँडेका थिए । नेपालगञ्ज पुगेको दोस्रो दिन बिहान ६ बजेबाट सरकारले लकडाउन घोषणा गरेको थियो ।

लकडाउनपछि उनीहरूलाई घर जान समस्या भएको थियो । विभिन्न व्यक्तिको सहयोगमा डोल्पा पुग्न सफल भएको पर्यटन व्यवसायी जगबहादुर बुढाले बताए । नेपालगञ्जबाट डोल्पा पुग्ने १ सय ७ जना रहेको बुढाले बताए ।

उनीहरू ३ दिन लकडाउनमा नेपालगञ्ज बसेर बिहीबार राति डोल्पाका लागि हिँडेका थिए । उनीहरू ३ दिनसम्म एउटै होटलमा ३० जनाभन्दा बढी बस्न बाध्य भएको बुढाले बताए ।

उनले भने, ‘सबैभन्दा पहिला माननीय जनार्दन शर्मासँग सम्पर्क गरेका थियौँ, उहाँकै पहलमा कर्णाली प्रदेशका प्रदेश सांसददेखि मुख्यमन्त्रीसम्मले सहयोग गरेर अहिले सबै जना सकुशल डोल्पा पुगेर क्वारेन्टाइनमा बसेका छौँ ।’ उनीहरूको टोलीमा १५ दिनकी सुत्केरी महिला पनि थिइन् ।

‘विश्वभरि फैलिएको कोरोना भाइरसको डर हामीलाई पनि थियो । के हुने हो कस्तो हुने हो । तर, अहिलेसम्म सकुशल घर पुगेर क्वारेन्टाइनमा बसेका छौँ । यहाँसम्मका लागि सहयोग गर्ने सबैलाई डोल्पाली जनताको तर्फबाट धेरैधेरै धन्यवाद छ,’ बुढाले भने, ‘नेतृत्वको पहिचान हुने यस्तै आपतबिपदको समयमा त हो, हाम्रा नेताहरूले सहयोग गर्नुभयो, धेरैधेरै धन्यवाद छ सबै नेताहरूलाई ।’

उनीहरूलाई तीनवटा बस व्यवस्था गरेर नेपालगञ्जबाट डोल्पा लगिएको हो । उनीहरू हिजो रातिबाट नै क्वारेन्टाइनमा बसेका छन् । उनीहरूलाई ठूली भेरी नगरपालिका ३ मा स्वास्थ्य परीक्षण गरेर २३ जनालाई क्वारेन्टाइनमा राखेको वडा अध्यक्ष अर्नबहादुर न्यौपानेले बताए ।

‘हिजो राति आइपुग्नुभएका २३ जनालाई हाम्रो वडामा क्वारेन्टाइनमा राखेका छौँ । खान बस्नको व्यवस्था गरेका छौँ । हेल्थडेस्क पनि राखेका छौँ,’ उनले भने ।