काेराेना संक्रमणबाट जाेगिन स्थानीयले लगाए ढाट

A+ A A-

सप्तरीको राजविराज नगरपालिका–५ का बासिन्दाहरूले बाहिरी व्यक्तिहरूलाई आवतजावतमा निषेध गरेका छन् । कोरोनो भाइरसबाट जोगिन सरस्वती टोलपारि भलुवाही नदी पूर्व टोलमा युवाहरूले टोल प्रवेश गर्ने मूलबाटो नै छेकिने गरी बाँसको ढाट लगाएर आवत–जावत पूर्ण रूपमा निषेध गरेका हुन् ।

लकडाउनको समयमा अपरिचित व्यक्तिहरूको आवत–जावतसँगै मदिरा सेवन गर्ने उद्देश्यले समेत आउने गरेकाले स्थानीय युवाहरू एवं टोलवासीको सक्रियतामा टोल प्रवेश निषेध गरिएको वडा नम्बर ५ का वडा सदस्य पार्थो सरकारले जानकारी दिएका छन् । उनले लकडाउनको अवधिभर अति आवश्यक कामबाहेक अन्य अवस्थामा घरबाट समेत ननिस्किन टोलवासीलाई अपिल गरेका छन् ।

स्थानीय युवाको पहलका कारण यो अभियान निकै प्रभावकारी भइरहेको छ । कोही बाहिर गएका पनि छैनन् र बाहिरबाट आउनेहरू पनि बाटो छेकेका कारण आउन सकेका छैनन् । सरकारले गरेको लकडाउनको अवधिमा समेत टोलमा आवागमन भइरहेकाले रोक लगाउनुपरेको स्थानीयवासीको भनाइ छ ।

राजविराज नगरपालिका–५ का बासिन्दाहरूको यो अभियान अन्य वडामा पनि सञ्चालन गर्ने माग उठ्न थालेको छ । अभियानलाई स्थानीय प्रशासनले पनि सहयोग गरेको छ ।

सप्तरीको क्वारेन्टाइनमा ११३ जना

सप्तरीमा विदेशबाट आएका तथा केहीमा रूघाखोकी र उच्च ज्वरो देखिएका थप १८ जनालाई निगरानीमा राख्न क्वारेन्टाइनमा राखिएको छ । योसँगै क्वारेन्टाइनमा राखिएका व्यक्तिहरूको संख्या १ सय १३ जना पुगेको छ ।

स्वास्थ्य कार्यालयका अनुसार कोरोना भाइरस (कोभिड—१९) जस्तै लक्षण देखिएका १ सय ४ पुरुष तथा ९ जना महिला गरी १ सय १३ जनालाई क्वारेन्टाइनमा राखिएको हो ।

भाइरसबाट बच्न तथा बचाउनका लागि उच्च सतर्कता अपनाई स्थानीय तहहरूले सञ्चालन गरेको क्वारेन्टाइनबाट अहिलेसम्म ९ जना डिस्चार्ज भएका छन् । विदेशबाट आएका तथा केही व्यक्तिहरूमा रूघाखोकी, ज्वरोसहित भाइरसकै जस्तो लक्षण देखिएपछि सुरूमा निगरानीमा राखिए पनि उपचारका क्रममा त्यस्तो नपाएपछि उनीहरूलाई डिस्चार्ज गरिएको स्वास्थ्य कार्यालय सप्तरीका प्रमुख दुनियालाल यादवले जानकारी दिए ।

सप्तरीमा १८ वटै स्थानीय तहले आफ्नो पालिकामा विदेशबाट आएका र आउने व्यक्तिहरूमाथि निगरानी गर्न ३ सय ९९ शय्याको क्वारेन्टाइन कक्ष सञ्चालन गरेको छ ।

उता, भाइरस संक्रमणको आशंका देखिने व्यक्तिहरूलाई उपचारका लागि ४ वटा अस्पतालमा ५६ शय्याको आइसोलेसन र १३ वटा आईसीयू कक्ष तयारी अवस्थामा रहेको गजेन्द्रनारायण सिंह अस्पतालले जनाएको छ ।

कांग्रेस नेताले क्वारेन्टाइन बनाउन आफ्नै घर दिए

विश्व नै कोरोना भाइरसको जोखिममा रहेको अवस्थामा सप्तरीको राजविराज नगरपालिका निवासी युवानेता रञ्जित कर्णले आफ्नो निजी घर अस्थायी क्वारेन्टाइनका लागि उपलब्ध गराउने घोषणा गरेका छन् ।

उनले राजविराज नगरपालिका– ३ स्थित ७ कोठे सुविधासम्पन्न पक्की घर क्वारेन्टाइनका लागि उपलब्ध गराउने घोषणा गरेका हुन् । कोरोना भाइरस (कोभिड–१९)को त्रासदीपूर्ण अवस्थामा यसबाट जोगिन र जोगाउनका लागि सम्पूर्ण नेपाली जनता एकजुट भई अगाडि बढ्नुपर्ने अवस्था रहेको भन्दै उनले यस्तो अवस्थामा सहयोग गर्नु नै वर्तमान आवश्यकता देखिएकाले आफ्नो निजी घर महामारी नियन्त्रणमा नआउन्जेलसम्मका लागि निःशुल्क उपलब्ध गराउने जानकारी दिए ।

नेपाली कांग्रेसनिकट नेपाल विद्यार्थी संघका पूर्वकेन्द्र अध्यक्षसमेत रहेका संविधानसभा सदस्य कर्णले देश विषम परिस्थितिमा रहेका बेला सरकारलाई सहयोग गर्नु नै हामी सबैको साझा दायित्व भएकाले आफ्नो तवरबाट हुन सक्ने सहयोग गरेको बताए ।

कोरोना भाइरसको संक्रमणबाट बच्नका लागि हामी आफैँले सजगता अपनाउनुपर्नेमा जोड दिँदै सबैलाई सतर्कता अपनाई सुरक्षित रूपमा बस्न उनले आग्रहसमेत गरे । उनले यसअघिका बाढी, पहिरो, भूकम्पलगायतका प्राकृतिक प्रकोपमा समेत सहयोग गर्दैआएका छन् ।

प्रकाशित मिति: आइतबार, चैत १६, २०७६ ११:४१