'जनता कर्फ्यू'मा जे देखियो

A+ A A-

हावाहुरी आउनुभन्दा पहिला वातावरणमा जुन अवस्था हुन्छ, करिब करिब त्यही अवस्था सीमावर्ती भारतीय शहरहरूको थियो । हावाहुरी त थिएन तर सबै त्रासमै देखिन्थे ।

कोरोनाका कारण भारतले लगाएको जनता कर्फ्यूको प्रभाव सबैतिर देखिन्थ्यो । धेरै घरबाट नै निस्किएनन्, जो घरबाट बाहिर आएका थिए, तिनलाई राम्ररी थाहा थियो कि ७ बजेभन्दा पहिला घरमै बन्द हुनुपर्छ ।

जनता कर्फ्यू के रहेछ ? भारतका लागि मात्र नभई हामी नेपालीका लागि पनि नौलो थियो । त्यस कारण त्यसको रिपोर्टिङ गर्न सीमावर्ती भारतको शहरमा म पनि गएकोे थिएँ ।

जयनगर, वासोपट्टी, मधुवन्नी, दरभंगामा गएर दर्जनौँ व्यक्तिलाई भेटेँ । चिया पसलमा अरू दिन घण्टौँ मानिसहरूको भीड हुन्थे । एक कप चिया खानका लागि २-३ घण्टा बस्नेहरू पनि धेरै हुन्थे । देश, विदेशका राजनीतिक गफ त्यहाँ हुने गर्छन् । तर, जनता कर्फ्यू घोषणापछि न चिया खान धेरै व्यक्ति आए, न त पसलले कसैको प्रतीक्षा नै गरे ।

७ बजेपछि सबैतिर जनता कर्फ्यू । ७ बजे पहिला नै सबै बन्द । मलाई पनि अनुमान थिएन बिहान पनि यो रूपमा सफल हुन्छ , प्रभातखबर दैनिकका जयनगर समाचारदाता ललित झाले बताए ।

लकडाउनका कारण नेपालमा पनि अहिले सबै घरमै बन्दी जस्ता छन् तर त्यसबेला यसको कल्पनै गर्न सकिँदैनथ्यो । कोही बाहिर छैन, सबै घरमा, यो पनि कल्पनाभन्दा बाहिर रहेछ । जयनगर होस् वा मधुवन्नी, दरभंगा सबै ठाउँमा मैले यही अवस्था देखेँ ।

एक जना चिया पसलेले भनिरहेका थिए, प्रधानमन्त्रीको आग्रह मानेर पसल बन्द गरेको छु ।

कोरोनाबाट केही व्यक्ति डराएका छन् तर मैले दर्जनौँ व्यक्तिसँग कुरा गर्दा प्रधानमन्त्री नरेन्द्र मोदीले जनता कर्फ्यू लगाउन भनेकाले उनको कुरो मान्न आफूहरू घर गइरहेको बताए ।

दरभंगाका महराज महेश ठाकुर कलेजका प्राध्यापक चन्द्रमोहन झा पडवाले जनता कर्फ्यूकै ठाउँमा प्रशासनले मात्र कर्फ्यू लगाएको भए यस प्रकार सफल हुन्थ्यो भन्ने विश्वास नभएको बताउँछन् । प्रधानमन्त्रीको आग्रह र आफ्नो स्वास्थ्यप्रति सचेतताका कारण सबैलाई आफ्नो घरमा रहन बाध्य बनाएको छ , उनले भने ।

शहरको प्रदेशद्वारमा कोरोना जाँच्ने स्वास्थ्यकर्मी र केही चोकमा प्रहरी र सञ्चारकर्मीबाहेक कोही थिएन ।

हाम्रो टोली राती पनि बस्छ , मधुवन्नीमा स्वास्थ्य जाँच टोलीमा संलग्न सुमिता कुमारीले भनिन् । उनको टोलीले हामी पुगेको दिनसम्म मात्र १ हजार व्यक्तिलाई जाँच गरेको रहेछ ।

नेपाल सीमा नजिक रहेकाले हामी विशेष सतर्कताका साथ सडकमा हिँडने सबैलाई एकचोटि सोधपुछ गर्छौं , उनले भनिन् । तर, सुविधा, साधन सीमित रहेको थियो । हामीले प्रारम्भिक जाँच्ने मात्र हो, शंका लाग्यो भने सदर अस्पताल र त्यसपछि कोरोना जाँच्नेसम्म पठाउने गर्छौं , सुमिताले अगाडि सुनाइन् ।

जनता कर्फ्यूको चर्चा

कोरोना भाइरसको महामारी फैलिरहँदा अहिले त लकडाउन नै भएको छ तर भारतमा एक दिनका लागि जनता कर्फ्यू लगाइएको थियो । जनता कर्फ्यूभन्दा २ दिनअघि मात्र भारतीय प्रधानमन्त्री नरेन्द्र मोदीले जनताको नाममा सम्बोधन गर्दै घोषणा गरेका थिए । जनताको हितका लागि भन्दै उक्त कर्फ्यूलाई ‘जनता कर्फ्यू’ नाम दिइएको थियो ।

सम्बोधनको क्रममा प्रधानमन्त्री मोदीले ‘जनताको, जनताद्वारा, जनताका लागि लगाइएको कर्फ्यू’ भनेका थिए । बिहान ७ बजेदेखि राती ९ बजेसम्मका लागि लगाइएको थियो जनता कर्फ्यू ।

‘घरबाटै गर्न सकिने काम जेसुकै पनि गर्नुहोला, हामीले आफू संक्रमित हुनबाट आफैँ जोगिने सङ्कल्प गर्नुपर्छ , मोदीले भनेका थिए । भारतमा सयौँ व्यक्ति संक्रमित हुनुका साथै दर्जनजतिको मृत्यु भइसकेको छ । थप क्षति नहोस् भनेर सरकारले यस प्रकारका कर्फ्यू र लकडाउन गरेको हो ।

प्रधानमन्त्रीले सम्बोधनको क्रममा पहिलेझैँ बजारमा जाने वा घुम्ने काम नगर्न पनि आग्रह गरेका थिए । उनले भाइरसबाट बच्न जनतालाई स्वयं सङ्कल्प गर्न पनि आग्रह गरेका थिए । संसार नै उक्त भाइरसका कारण सङ्कटमा परिरहेका बेला भारतमा सरकारले नयाँ निर्णय गरेको बताइएको छ ।

डराउनेको संख्या त्यहाँ पनि कम

अहिले स्थितिमा केही परिवर्तन भए पनि एक साताअघि जनकपुरधामतिर मानिस त्यति डराएका थिएनन् । बजारमा भीड नै रहेको थियो । नेपालमा लकडाउनअघि समाजवादी पार्टीले सिरहामा भेला नै गरेको थियो ।

जनकपुरधामका मेयर लालकिशोर साह र उपमेयर रीताकुमारी मिश्रले करिब १ सय जना लिएर कोरोनाबाट पीडितको स्थान खोज्न जनकपुरधामको मनिपाल मेडिकल कलेज पुगेका थिए । यही स्थिति भारतको सीमा क्षेत्रतिर पनि रहेको थियो । तर, जनता कर्फ्यूपछि परिवर्तन भएको छ ।

पहिला चोकचोकमा भीड, तरकारी वजार होस् वा अन्य ठाउँमा यस्तै अवस्था थियो । तर, अब सतर्क बन्नै पर्छ , जयनगरमा रहेका अवकाशप्राप्त शिक्षक पिताम्बर झाले भने । उनीसँगै रहेका सुरेश सिंहले जुन रूपमा १-२ दिनभित्र भारतमा कोरोनाको रोगी बढिरहेका छन्, यसले तेस्रो स्टेज अर्थात् समुदायमा कोरोना आइसकेको देखाउँछ । कसलाई लाग्ने हो ठेगान छैन । सबै सतर्क हुनुपर्ने उनले बताए ।

बिहारका अधिकांश युवा दिल्ली, मुम्बई, कलकत्ता जस्ता शहरमा बस्छन् कोही पढिरहेका छन्, कोही जागिरका लागि गएका थिए । सबै आआफ्नो घर फर्किसकेका छन् ।

भारतका महानगरहरूको अवस्था कोरोनाका कारण भयावह भएको छ । सबैका छुट्टै कथाहरू रहेको जोसँग भेट्दा पनि सुनाउन चाहन्थे ।

प्रकाशित मिति: शनिबार, चैत १५, २०७६ ११:५०