सुर्खेतमै उत्पादन गर्न थालियो पीपीई

A+ A A-

कोरोना भाइरस (कोभिड–१९) को परीक्षण तथा सङ्क्रमितको उपचारका लागि स्वास्थ्यकर्मीलाई आवश्यक पर्ने पर्सनल प्रोटेक्टिभ इक्विपमेन्ट (पीपीई)को उत्पादन सुर्खेतमै सुरू गरिएको छ ।

कर्णालीका सबै स्वास्थ्य संस्थाहरूमा पीपीईको अभाव भइरहेका बेला वीरेन्द्रनगरमा सञ्चालित मुनाल गार्मेन्ट उद्योग र देउती होजियारीले यसको उत्पादन सुरू गरेका हुन् ।

पीपीईको अभावमा स्वास्थ्यकर्मीहरू कोरोना आशङ्कित बिरामीसँग संसर्ग गर्न डराउनुपर्ने अवस्थाले स्वास्थ्य संस्थाको सम्पर्कमा आएका ज्वरोका बिरामीलाई औषधि दिएर मात्र पठाउने गरिएको छ ।

प्रदेश सरकारको सामाजिक विकास मन्त्रालयले काठमाडौँमा हालसम्म उपलब्ध नभएको र विदेशबाट आउन समय लाग्ने भएकाले स्थानीयस्तरमै पीपीई तयार गर्न निर्देशन दिएको हो ।

सामाजिक विकासमन्त्री दल रावल र प्रदेश अस्पताल सुर्खेतका चिकित्सक डा. नवराज केसीसँग समन्वय गरेर पीपीई उत्पादन सुरू गरेको गार्मेन्ट सञ्चालकले जनाएका छन् ।

मुनाल गार्मेन्टका सञ्चालक भानुभक्त खड्काले स्वास्थ्यकर्मी र सुरक्षाकर्मीहरूले प्रयोग गर्ने गरी तत्काललाई २ हजार थान व्यक्तिगत सुरक्षा सामग्री (पीपीई) तयार गरिरहेको जानकारी दिए ।

लकडाउनका कारण कच्चा पदार्थ ढुवानीमा समस्या भएको उनको भनाइ छ । नेपाली सेनाका लागि आएको पीपीईको नमुना हेरेर कालिगढले स्वास्थ्यकर्मीका लागि पीपीई तयार गरिरहेका छन् ।

प्रदेश अस्पतालका चिकित्सक डा केसीले पीपीई नहुँदा स्वास्थ्यकर्मीहरूले जोखिम मोलेर कोरोना भाइरसको सम्भावित सङ्क्रमण जाँच गरिरहेको बताए ।