देशभरका हब हस्पिटलमा फिबर क्लिनिक सञ्चालन गरिँदै

A+ A A-

सरकारले देशभरका लागि हब हस्पिटलका लागि छुट्टै फिबर क्लिनिक सञ्चालन गर्न प्रतिअस्पताल १० लाख रुपैयाँ उपलब्ध गराएको छ ।

ज्वरो आउने, रुघा लाग्नेजस्ता लक्षण देखिएर कोरोनाको शंकामा जाँचका लागि आएका बिरामीलाई राख्नका लागि छुट्टै फिबर क्लिनिक सञ्चालन गर्नुपर्ने बाध्यकारी व्यवस्था गर्दै सरकारले त्यसका लागि प्रतिअस्पताल १० लाख रुपैया दिएको हो ।

बिहीबार स्वास्थ्य तथा जनसंख्या मन्त्रालयमा आयोजित पत्रकार सम्मेलनमा मन्त्रालयका सचिव यादव कोइरालाले हब अस्पताललाई छुट्टै फिबर क्लिनिक सञ्चालन गर्नुपर्ने व्यवस्था गर्दै ती अस्पताललाई उक्त परिमाणको रकम उपलब्ध गराइएको जानकारी दिए ।

साथै, त्यस्ता बिरामीको जाँचका लागि सरकारले आफ्नै ढंगको पीपीईको मापदण्ड बनाएको र सोही मापदण्ड अपनाउन भनिएको पनि उनले स्पष्ट पारे ।

उनले भने, ‘साधारण रुघाखोकी लागेको बिरामीको जाँच गर्नका लागि भनेर पीपीई गाइडलाइन बनाएका छौँ र सोही गाइडलाइनअनुसार उपचारमा संलग्न हुन भनिएको छ ।’

त्यसैगरी, सरकारले सबै पालिकालाई विदेशबाट आएका व्यक्तिलाई आफ्नो क्षेत्रमा क्वारेन्टाइनमा राख्न निर्देशन दिएको छ । क्वारेन्टाइनमा बसेका व्यक्तिमा कोरोना भाइरस संक्रमणको लक्षण देखिएमा तत्काल आइसोलेसनमा राख्ने तथा आइसोलेसनमा राखिएकाहरूको स्वास्थ्य गम्भीर बन्न थाल्यो भने स्वाव परीक्षण गर्न पठाउन निर्देशन दिएको छ ।

सचिव यादवले क्वारेन्टाइन र आइसोलेसनमा राख्ने तथा त्यसको सम्पूर्ण रिपोर्ट केन्द्र सरकारलाई गराउने सम्बन्धमा स्पष्ट निर्देशिका बनाएर प्रदेश र स्थानीय सरकारलाई पठाइएको बताए । स्थानीय जनप्रतिनिधिलाई दैनिक क्वारेन्टाइनको अनुगमन गरी संक्रमितको, विदेशबाट आएका र आइसोलेसनमा रहेकाको अवस्थाको जानकारी दैनिक रूपमा गृह मन्त्रालयमा गराउन भनिएको उनले स्पष्ट पारे ।

उनले भने, ‘यदि त्यस्तो किसिमको लक्षण देखिँदा श्वासप्रश्वासमा असजिलो भएको छ र लक्षणबाट माथिल्लो स्टेजमा पुगेको छ भने तुरुन्तै स्वाव परीक्षणका लागि केन्द्र वा नजिकको परीक्षण केन्द्रमा पठाउन अनुरोध गरेका छौँ ।’

विदेशबाट आउँदैमा डराइहाल्नुपर्ने अवस्था नभएको भन्दै उनले सेल्फ क्वारेन्टाइनमा बस्न र कोरोना भाइरसको संक्रमण देखिए तत्काल तोकिएको स्वास्थ्य केन्द्रमा सम्पर्क गर्न आग्रह गरे । उनले अहिलेसम्म शंका लागेका ७ सयभन्दा बढी नमुनाको परीक्षण गरिएकोमा ३ जनामा मात्र कोरोना भाइरस देखिएको जानकारी दिए ।

प्रकाशित मिति: बिहीबार, चैत १३, २०७६ २१:०३