सरकारद्वारा स्थापित कोरोना रोकथाम कोषमा लक्ष्मी ग्रुपको १ करोड

A+ A A-

लक्ष्मी ग्रुपले नेपाल सरकारबाट स्थापित ‘कोरोना भाइरस संक्रमण रोकथाम, नियन्त्रण र उपचार कोष’ मा १ करोड रुपैयाँ आर्थिक सहयोग गर्ने घोषणा गरेको छ ।

विश्वमा कोरोना भाइरसको संक्रमणले भयाभह रूप लिँदै गएको अवस्थामा नेपालमा पनि कोरोना भाइरसको खतरा बढ्दै गएको र यो अवस्थामा नेपालमा पनि सो महामारीको संक्रमण नियन्त्रण र प्रभावितहरूको उपचारमा उक्त आर्थिक सहयोगले केही मात्रामा भए पनि योगदान पुर्‍याउने लक्ष्मी ग्रुपको विश्वास छ ।

साथै, लक्ष्मी ग्रुपले देशका विभिन्न सार्वजनिक अस्पतालहरूमा कोरोना भाइरसको प्रारम्भिक स्क्रिनिङका लागि ‘फिबर क्लिनिक’हरू स्थापना गर्ने कार्य पनि सुरु गरिसकेको छ । यस्ता क्लिनिकको स्थापनाका लागि लक्ष्मी ग्रुपले आर्थिक सहयोग उपलब्ध गराउने र हेल्थ एट होम प्रालिले कार्यान्वयन साझेदारको रूपमा कार्य गर्ने बताइएको छ ।

लक्ष्मी ग्रुपद्वारा स्थापना गरिएका क्लिनिकमार्फत निम्न अवस्था रहेका सर्वसाधारणहरूलाई सेवा प्रदान गरिनेछः

१. जो पछिल्ला १४ दिनमा विदेशमा रहेका थिए ।
२ं. जो कोभिड १९ संक्रमित मानिसको सम्पर्कमा आएको हुन सक्ने ।
३. जो व्यक्तिमा सम्भावित लक्षणहरू जस्तैः ज्वरो वा ज्वरोविना रुघा, खोकी देखिएको छ ।
४. जो व्यक्ति संक्रमित भएँ भनेर चिन्तित छन् तर कुनै पनि प्रकारको लक्षण देखिएको छैन ।
५. परामर्श लिन वा विश्वस्त हुन चाहने अन्य रोगीहरूका लागि ।

क्लिनिकको उद्देश्य मूल उद्देश्य कोरोना भाइरसका सम्भावित लक्षण देखिएका बिरामीहरूलाई अस्पतालको आपतकालीन विभाग वा संक्रमण नियन्त्रण केन्द्रमा सिधै नपठाई क्लिनिकमार्फत कोरोना भाइरस संक्रमणको सम्भावना भए/नभएको प्रारिम्भक जाँच गर्नु रहेको छ ।

यस्ता क्लिनिकहरूले अस्पतालका आपतकालीन विभाग वा संक्रमण रोकथाम विभागका स्रोत साधनहरूलाई संक्रमण भइसकेका बिरामीहरूको उपचारमा मात्र केन्द्रित हुन मद्दत पुर्‍याउँछन् ।

अन्य देशहरूमा पनि यस्ता क्लिनिकहरूले अस्पतालका आपतकालीन कोठाहरूमा वास्तविक रूपमा दबाब कम गर्न मद्दत पुर्‍याउनुका साथै कोरोनाको व्यवस्थापन र रोक्थाममा महत्त्वपूर्ण भूमिका खेलेको पाइएको छ ।

लक्ष्मी ग्रुपले सधैँ यस्ता परोपकारी काममा आफ्नो सामाजिक उत्तरदायित्व वहन गर्दै आइरहेको छ । कम्पनीले यसअघि २०१५ को महाभूकम्पमा पनि नेपाल रेड क्रसलाई सहयोग, ललितपुरमा सेरेब्रल पाल्सी सेन्टर, श्री चन्द्रोदय आधारभूमि विद्यालय, गोरखाको पुनर्निर्माण, बिन्ध्यवासिनी मन्दिर, पोखरामा लिफ्ट निर्माण र अन्य विभिन्न कार्यमा सहयोग गरिसकेको छ ।

लक्ष्मी गु्रपले हाल नेपालमा आएको कठिन परिस्थितिको संयमताका साथ सामना गर्न र कोरोना भाइरस रोकथाम तथा नियन्त्रणका लागि सम्पुर्ण नेपालीलाई आफ्नोआफ्नो क्षेत्रबाट सहयोग गर्न अपिल गरेको छ ।

प्रकाशित मिति: बुधबार, चैत १२, २०७६ १९:३२