कोभिड- १९ प्रभाव : २ सय ३० करोडभन्दा बढी मानिस घरमै कैद, १० देशमा कर्फ्यू

A+ A A-

विश्वभर महामारीको रूप लिएको कोरोना भाइरस (कोभिड-१९)को रोकथाम तथा नियन्त्रणका लागि संसारभरका ५० भन्दा बढी देशले लकडाउनको घोषणा गरेका छन् । यसका कारण करिब २ सय ३० करोडभन्दा बढी मानिस घरमै कैद हुन बाध्य भएका छन् ।

लकडाउन घोषणा गरेका कतिपय देशले यसलाई अनिवार्य गरेका छन् भने केही देश केही खुकुलो छाडेका छन् । यहाँ मानिसहरूलाई घरबाट बाहिर ननिस्कन मात्र भनिएको छ ।

३५ देशमा अनिवार्य लकडाउन

करिब १ सय ९५ करोड जनसंख्या भएका ३५ देशले अनिवार्य लकडाउन गरेका छन् । अनिवार्य लकडाउनको अर्थ आतिआवश्यकबाहेक घरबाट बाहिर ननिस्किनु र यस्तो गर्ने व्यक्तिलाई जबर्जस्ती गर्न सकिनुका साथै कानुनी कारबाही पनि हुन सक्छ । यी देशमा १ सय ३० करोड जनसंख्या भएको भारत सबैभन्दा ठूलो देश हो ।

यसबाहेक फ्रान्स, इटाली, अर्जेन्टिना, इराक, ग्रिस, रुवान्डा र अमेरिकाको क्यालिफोर्निया राज्य हुन् । मंगलबार कोलम्बिया पनि यो सूची सामेल भएको छ । यता, न्यूजिल्यान्ड पनि बुधबारबाट लकडाउन हुँदै छ । प्राय: देशले अतिआवश्यक सामान खरिद गर्न तथा मेडिकल केयरका लागि मात्र मानिसहरूलाई बाहिर निस्कन छुट दिएका छन् ।

रोमले मानिसहरूको दिल बहलाउनका लागि नयाँ जुक्ति निकालेको छ । रोममा एउटा बिल्डिङमा प्रोजक्टरमार्फत् सन् १९५२ मा निर्माण गरिएको फिल्म ‘थ्री गर्ल्स फ्रम रोम’ देखाइएको छ । यहांँ अनिवार्य लकडाउन घोषित गरिएको छ । लकडाउनका क्रममा मानिसहरूको मन बहलाउन बिल्डिङहरूका भित्तामा फिल्म देखाउन थालिएको हो ।

५ देशमा बाहिर ननिस्कन अपिल

कोरोना भाइरसको महामारीलाई रोक्न ५ देशले आफ्ना नागरिकलाई घरबाट बाहिर ननिस्कन अपिल गरेका छन् । साथै, कमभन्दा कम मानिसहरूसँग सम्पर्क राख्न पनि अनुरोध गरेका छन् । यी देशमा इरान, जर्मनी र ब्रिटेन पनि सामेल छन् ।

यी देशको जनसंख्या करिब २२.८ करोड रहेको छ । ब्रिटेनमा अघिल्लो हप्ता समुद्र तट र पार्कमा भीड जम्मा हुँदा पक्राउ गर्न सकिने चेतावनी दिइएको थियो । इरानमा पनि अघिल्लो हप्ता नयाँ वर्षका बेला लाखौँ मानिस सडकमा निस्किएका थिए । त्यसपछि सबैलाई घरमै रहनका लागि अपिल गरिएको थियो ।

१० देशमा कर्फ्यू

चीनको हुबेई प्रान्तको वुहानबाट फैलिएको कोरोना भाइरसको संक्रमण कम गर्न करिब १० देशमा कर्फ्यू घोषणा गरिएको छ । कर्फ्यू घोषित देशहरूमा बर्किना फासो, चिली, फिलिपिन्स, सर्बिया, म्यरिटानिया र सउदी अरबसमेत हुन् । यी देशको जनसंख्या ११.७ करोड रहेको छ ।

यसबाहेक केही देशले केही शहरहरूलाई मात्र आइसोलेट गरेका छन् । यस्ता देशको जनसंख्या करिब १ करोड भन्दा बढी छ ।

एजेन्सीको सहयोगमा

प्रकाशित मिति: बुधबार, चैत १२, २०७६ २०:१४