कोभिड-१९ रोकथाम : कर्णाली सरकारद्वारा ५० करोडको कोष स्थापना

A+ A A-

कर्णाली प्रदेश सरकारले कोरोना भाईरस (कोभिड १९)को रोकथाम तथा प्रतिकार्य योजनाको लागि ५० करोड रुपैयाँको विपत् व्यवस्थापन कोष स्थापना गर्ने निर्णय गरेको छ । सोमबार बसेको कर्णाली प्रदेश मन्त्रिपरिषद्को बैठकले विपत् व्यवस्थापन कोष स्थापना कोष स्थापना गर्ने निर्णय गरेको हो ।

कर्णाली प्रदेशका १० वटै जिल्लामा कोरोना भाईरस (कोभिड १९)को रोकथाम तथा प्रतिकार्य योजनाका बनाउनका लागि जिल्ला विपद व्यवस्थापन कोषमा ५०/५० लाख उपलब्ध गराउने निर्णय गरेको कर्णाली प्रदेश सरकारका प्रवत्ता विमला केसीले बताइन् ।

‘विश्वभर महामारीको रुपमा फैलिएको कोरोना भाईरस (कोभिड-१९)को सम्भावित संक्रमणको प्रभावकारी रोकथाम तथा नियन्त्रण कार्यमा खटिने कर्णाली प्रदेशका चिकित्सक तथा स्वास्थ्यकर्मीहरुलाई संघीय सरकारले तोकेको मापदण्ड अनुरूपको सेवा सुविधामा वृद्धि गर्ने निर्णय भएको छ’ उनले भनिन्, ‘दोहोरो नपर्ने गरि कर्णाली प्रदेश सरकारले सो मापदण्ड अनुसार सेवा सुविधा उपलब्ध गराउने निर्णय भएको छ ।’

कोरोना भाईरस (कोभिड १९)को रोकथाम तथा प्रतिकार्य योजनाको लागि आवश्यक पर्ने आर्थिक तथा भौतिक कार्यलाई व्यवस्थित र प्रभावकारी गराउन प्रमुख सचिवको नेतृत्वमा ९ सदस्यीय कार्यकारी समिति गठन गरिएको केसीले जानकारी दिइन् ।

कर्णाली प्रदेशभित्र कार्यरत सम्पूर्ण विशेषज्ञ, छात्रवृत्ति र करार सेवामा कार्यरत चिकित्सकलाई कर्णाली प्रोत्साहन भत्ता उपलब्ध गराउने निर्णय मन्त्रीपरिषद्को बैठकले गरेको प्रवक्ता केसीले बताइन् ।

त्यस्तै, मन्त्रिपरिषद् बैठकले सुर्खेत जिल्लाको सिम्ता गाउँपालिकाको वजेडिचौरमा रहेको केन्द्र राकमको पातचौर सार्ने गरि भएको गाउँपालिकाको निर्णयलाई नेपाल सरकारसमक्ष सिफारिस गर्ने र सामाजिक विकास मन्त्रालयको कायम मुकायम सचिव पदमा मानव संशाधन विकास केन्द्र सुर्खेतमा कार्यरत अधिकृत दशौँ तहका धर्मजित शाहीलाई जिम्मेवारी दिने निर्णयसमेत गरेको छ ।

प्रकाशित मिति: सोमबार, चैत १०, २०७६ २०:०६